ਮਨੋਰੰਜਨ:16ਜੁਲਾਈ (ਛਤਰਪਾਲ ਸਿੰਘ):ਬਾਲੀਵੁੱਡ ਅਦਾਕਾਰ ਆਮਿਰ ਖਾਨ ਅਤੇ ਗੌਰੀ ਸਪ੍ਰੈਟ ਨੇ ਇਸ ਮਹੀਨੇ ਮੁੰਬਈ ਸਥਿਤ ਆਪਣੇ ਨਿਵਾਸ ‘ਤੇ ਇੱਕ ਨਿੱਜੀ ਸਮਾਗਮ ਦੌਰਾਨ ਵਿਆਹ ਕਰਵਾ ਲਿਆ। ਇਸ ਵਿਆਹ ਵਿੱਚ ਪਰਿਵਾਰਕ ਮੈਂਬਰਾਂ ਅਤੇ ਕੁਝ ਨਜ਼ਦੀਕੀ ਦੋਸਤਾਂ ਨੇ ਹੀ ਸ਼ਿਰਕਤ ਕੀਤੀ। ਸਮਾਗਮ ਦੀ ਸਾਦਗੀ ਅਤੇ ਨਿੱਜਤਾ ਨੇ ਕਈਆਂ ਦਾ ਧਿਆਨ ਆਪਣੇ ਵੱਲ ਖਿੱਚਿਆ।
ਆਮਿਰ ਦੇ ਕਰੀਬੀ ਦੋਸਤ ਅਤੇ ਅਦਾਕਾਰ ਅਮੀਨ ਹਾਜੀ ਨੇ ਵਿਆਹ ਨਾਲ ਜੁੜੀਆਂ ਕੁਝ ਖਾਸ ਗੱਲਾਂ ਸਾਂਝੀਆਂ ਕਰਦਿਆਂ ਦੱਸਿਆ ਕਿ ਇਹ ਕੋਈ ਰਵਾਇਤੀ ਵਿਆਹ ਸਮਾਰੋਹ ਨਹੀਂ ਸੀ। ਉਨ੍ਹਾਂ ਮੁਤਾਬਕ ਨਾ ਤਾਂ ਸੰਗੀਤ ਸਮਾਗਮ ਰੱਖਿਆ ਗਿਆ ਅਤੇ ਨਾ ਹੀ ਹੋਰ ਰਵਾਇਤੀ ਰਸਮਾਂ ਨਿਭਾਈਆਂ ਗਈਆਂ। ਦੋਵੇਂ ਪਰਿਵਾਰ ਇਕੱਠੇ ਹੋਏ, ਗੱਲਬਾਤ ਕੀਤੀ ਅਤੇ ਖੁਸ਼ੀ ਦੇ ਪਲ ਸਾਂਝੇ ਕੀਤੇ।
ਅਮੀਨ ਹਾਜੀ ਨੇ ਇਹ ਵੀ ਸਪਸ਼ਟ ਕੀਤਾ ਕਿ ਆਮਿਰ ਦੀ ਸਾਬਕਾ ਪਤਨੀ ਕਿਰਨ ਰਾਓ ਵਿਆਹ ਸਮੇਂ ਬ੍ਰਿਟੇਨ ਵਿੱਚ ਮੌਜੂਦ ਸੀ, ਇਸ ਲਈ ਉਹ ਸਮਾਗਮ ਵਿੱਚ ਸ਼ਾਮਲ ਨਹੀਂ ਹੋ ਸਕੀ। ਉਨ੍ਹਾਂ ਕਿਹਾ ਕਿ ਆਮਿਰ ਅਤੇ ਕਿਰਨ ਅੱਜ ਵੀ ਦੋਸਤਾਨਾ ਸਬੰਧ ਸਾਂਝੇ ਕਰਦੇ ਹਨ ਅਤੇ ਕਈ ਸਮਾਜਿਕ ਪ੍ਰੋਜੈਕਟਾਂ ਵਿੱਚ ਇਕੱਠੇ ਕੰਮ ਕਰ ਰਹੇ ਹਨ।
ਰੀਨਾ ਦੱਤਾ ਦੀ ਗੈਰਹਾਜ਼ਰੀ ਬਾਰੇ ਗੱਲ ਕਰਦਿਆਂ ਅਮੀਨ ਨੇ ਕਿਹਾ ਕਿ ਹਰ ਸਮਾਗਮ ਵਿੱਚ ਹਰ ਕਿਸੇ ਦੀ ਮੌਜੂਦਗੀ ਜ਼ਰੂਰੀ ਨਹੀਂ ਹੁੰਦੀ ਅਤੇ ਇਸ ਦਾ ਮਤਲਬ ਰਿਸ਼ਤਿਆਂ ਵਿੱਚ ਦੂਰੀ ਨਹੀਂ ਹੁੰਦਾ। ਉਨ੍ਹਾਂ ਦੇ ਅਨੁਸਾਰ ਆਮਿਰ ਦੇ ਆਪਣੇ ਦੋਵੇਂ ਸਾਬਕਾ ਜੀਵਨ ਸਾਥੀਆਂ ਨਾਲ ਅਜੇ ਵੀ ਸਤਿਕਾਰਪੂਰਨ ਅਤੇ ਸਿਹਤਮੰਦ ਸਬੰਧ ਹਨ।
ਵਿਆਹ ਤੋਂ ਇੱਕ ਦਿਨ ਪਹਿਲਾਂ ਦੋਵੇਂ ਪਰਿਵਾਰਾਂ ਲਈ ਇੱਕ ਗੈਰ-ਰਸਮੀ ਮਿਲਣੀ ਵੀ ਰੱਖੀ ਗਈ ਸੀ, ਜਿਸ ਦੌਰਾਨ ਸਭ ਨੇ ਇਕ-ਦੂਜੇ ਨੂੰ ਜਾਣਨ ਦਾ ਮੌਕਾ ਮਿਲਿਆ। ਅਮੀਨ ਨੇ ਕਿਹਾ ਕਿ ਗੌਰੀ ਦਾ ਪਰਿਵਾਰ ਬਹੁਤ ਹੀ ਸਾਦਾ ਅਤੇ ਮਿਲਣਸਾਰ ਹੈ, ਜਿਸ ਕਾਰਨ ਪਹਿਲੀ ਮੁਲਾਕਾਤ ਵੀ ਪੁਰਾਣੀ ਜਾਣ-ਪਛਾਣ ਵਰਗੀ ਮਹਿਸੂਸ ਹੋਈ।
ਜ਼ਿਕਰਯੋਗ ਹੈ ਕਿ ਆਮਿਰ ਖਾਨ ਨੇ ਇਸ ਸਾਲ ਮਾਰਚ ਵਿੱਚ ਆਪਣੇ 60ਵੇਂ ਜਨਮਦਿਨ ਮੌਕੇ ਗੌਰੀ ਸਪ੍ਰੈਟ ਨੂੰ ਜਨਤਕ ਤੌਰ ‘ਤੇ ਮੀਡੀਆ ਨਾਲ ਰੂਬਰੂ ਕਰਵਾਇਆ ਸੀ। ਕੁਝ ਸਮੇਂ ਦੀ ਦੋਸਤੀ ਅਤੇ ਰਿਸ਼ਤੇ ਤੋਂ ਬਾਅਦ ਦੋਹਾਂ ਨੇ ਵਿਆਹ ਕਰਨ ਦਾ ਫੈਸਲਾ ਕੀਤਾ। ਇਸ ਨਵੇਂ ਅਧਿਆਇ ਦੀ ਸ਼ੁਰੂਆਤ ਨੂੰ ਲੈ ਕੇ ਆਮਿਰ ਦੇ ਦੋਸਤ ਅਤੇ ਪਰਿਵਾਰਕ ਮੈਂਬਰ ਉਨ੍ਹਾਂ ਨੂੰ ਸ਼ੁਭਕਾਮਨਾਵਾਂ ਦੇ ਰਹੇ ਹਨ।
