ਮਾਨਵਤਾ ਦੀ ਸੇਵਾ ਵਿੱਚ ਜਨਹਿਤ ਸਮਿਤੀ ਅਤੇ ਅਪਣਾ ਘਰ ਆਸ਼ਰਮ, ਭਰਤਪੁਰ ਦਾ ਸਾਂਝਾ ਕਦਮ
ਪਟਿਆਲਾ/ਰਾਏਪੁਰ ਮੰਡਲਾ: 3 ਸਤੰਬਰ, 2026 (ਜਗਜੀਤ ਸਿੰਘ) : ਮਾਨਵਤਾ ਅਤੇ ਸੇਵਾ ਦੀ ਮੂਰਤ ਅਪਣਾ ਘਰ ਆਸ਼ਰਮ ਸੰਸਥਾ, ਭਰਤਪੁਰ (ਰਾਜਸਥਾਨ) ਦੇ ਸਹਿਯੋਗ ਨਾਲ ਪਿੰਡ ਰਾਏਪੁਰ ਮੰਡਲਾ ਸਥਿਤ ਜਨਹਿਤ ਸਮਿਤੀ ਭਵਨ ਵਿਖੇ ਇੱਕ ਬੇਸਹਾਰਾ ਜਨਹਿਤ ਪੇਸ਼ੇਂਟ ਹੈਲਥ ਕੇਅਰ ਸੈਂਟਰ ਅਤੇ ਬਿਰਧ ਆਸ਼ਰਮ ਬਣਾਉਣ ਦਾ ਕੰਮ ਜ਼ੋਰਾਂ ਸ਼ੋਰਾਂ ਨਾਲ ਜਾਰੀ ਹੈ। ਇਸ ਸੈਂਟਰ ਨੂੰ ਖੋਲ੍ਹਣ ਦਾ ਮੁੱਖ ਉਦੇਸ਼ ਇਲਾਕੇ ਵਿੱਚ ਬੇਸਹਾਰਾ, ਅਨਾਥ ਅਤੇ ਮਾਨਸਿਕ ਤੌਰ ‘ਤੇ ਗੰਭੀਰ ਬਿਮਾਰ ਵਿਅਕਤੀਆਂ ਲਈ ਸੇਵਾ ਕਾਰਜ ਕਰਨਾ ਹੈ।
ਇਸ ਮੌਕੇ ਜਨਹਿਤ ਸਮਿਤੀ ਦੇ ਪ੍ਰਧਾਨ ਸ੍ਰੀ ਐਸ. ਕੇ. ਗੌਤਮ ਦੀ ਕੁਸ਼ਲ ਰਹਿਨੁਮਾਈ ਹੇਠ ਜਨਰਲ ਸਕੱਤਰ ਸ੍ਰੀ ਵਿਨੋਦ ਕੁਮਾਰ ਸ਼ਰਮਾ, ਅੰਤਰਰਾਸ਼ਟਰੀ ਲੇਖਕ ਅਤੇ ਸਿੱਖਿਆ ਸ਼ਾਸਤਰੀ ਸ੍ਰੀ ਅਨਿਲ ਕੁਮਾਰ ਭਾਰਤੀ (ਸੰਸਥਾਪਕ ਮੈਂਬਰ), ਮੈਨੇਜਰ ਸ੍ਰੀ ਸਤੀਸ਼ ਚੰਦਰ ਜੋਸ਼ੀ ਅਤੇ ਸੇਵਾ ਮੁਕਤ ਐੱਸ.ਡੀ.ਓ. ਸ੍ਰੀ ਰਣਜੀਤ ਸਿੰਘ ਵਿਸ਼ੇਸ਼ ਤੌਰ ‘ਤੇ ਸਹਿਯੋਗ ਅਤੇ ਮਾਰਗਦਰਸ਼ਨ ਦਿੱਤਾ ਜਾ ਰਿਹਾ ਹੈ।
ਸਮਿਤੀ ਦੇ ਅਹੁਦੇਦਾਰਾਂ ਵੱਲੋਂ ਜਨਹਿਤ ਸਮਿਤੀ ਭਵਨ, ਰਾਏਪੁਰ ਮੰਡਲਾ ਵਿੱਚ ਪ੍ਰਸਤਾਵਿਤ ‘ਜਨਹਿਤ ਪੇਸ਼ੈਂਟ ਹੈਲਥ ਕੇਅਰ ਸੈਂਟਰ’ ਅਤੇ ‘ਬਿਰਧ ਆਸ਼ਰਮ’ ਦੀ ਰੂਪਰੇਖਾ ਪੂਰੀ ਤਰ੍ਹਾਂ ਨਾਲ ਤਿਆਰ ਕਰ ਲਿੱਤੀ ਗਈ ਹੈ। ਪ੍ਰਧਾਨ ਸ਼੍ਰੀ ਐਸ ਕੇ ਗੌਤਮ ਅਤੇ ਜਨਰਲ ਸਕੱਤਰ ਵਿਨੋਦ ਕੁਮਾਰ ਸ਼ਰਮਾ ਨੇ ਇਸ ਬਾਰੇ ਵਿਸਥਾਰ ਨਾਲ ਦੱਸਿਆ ਕਿ ਕਿਸ ਤਰ੍ਹਾਂ ਇਹ ਕੇਂਦਰ ਸਮਾਜ ਦੇ ਉਨ੍ਹਾਂ ਪਛੜੇ ਵਰਗਾਂ, ਬੇਸਹਾਰਾ ਬਜ਼ੁਰਗਾਂ ਅਤੇ ਮਾਨਸਿਕ ਤੌਰ ‘ਤੇ ਅਸਵਸਥ ਲੋਕਾਂ ਲਈ ਵਰਦਾਨ ਸਾਬਤ ਹੋਵੇਗਾ, ਜਿਨ੍ਹਾਂ ਨੂੰ ਦੇਖਭਾਲ ਅਤੇ ਇਲਾਜ ਦੀ ਸਖ਼ਤ ਲੋੜ ਹੈ।
ਇਮਾਰਤ ਦਾ ਨਿਰੀਖਣ ਵੀ:
ਅਪਣਾ ਘਰ ਆਸ਼ਰਮ ਭਰਤਪੁਰ ਰਾਜਸਥਾਨ ਦੀ ਟੀਮ ਵੱਲੋਂ ਪੂਰੀ ਇਮਾਰਤ ਦਾ ਬਾਰੀਕੀ ਨਾਲ ਮੁਆਇਨਾ ਕੀਤਾ ਜਾ ਚੁੱਕਾ ਹੈ। ਟੀਮ ਦੇ ਮੈਂਬਰਾਂ ਨੇ ਇਮਾਰਤ ਦੀ ਬਣਤਰ ਅਤੇ ਉਪਲਬਧ ਸਹੂਲਤਾਂ ਨੂੰ ਸੇਵਾ ਕਾਰਜ ਲਈ ਬਹੁਤ ਢੁਕਵਾਂ ਪਾਇਆ। ਇਸ ਨੇਕ ਕਾਰਜ ਦੇ ਆਗਾਜ਼ ਲਈ ਉਨ੍ਹਾਂ ਨੇ ਨਾ ਸਿਰਫ਼ ਆਪਣਾ ਕੀਮਤੀ ਮਾਰਗਦਰਸ਼ਨ ਦਿੱਤਾ, ਸਗੋਂ ਸੇਵਾ ਦੇ ਇਸ ਮਹਾਂਯੱਗ ਵਿੱਚ ਹਰ ਸੰਭਵ ਸਹਿਯੋਗ ਦੇਣ ਦਾ ਭਰੋਸਾ ਵੀ ਦਿੱਤਾ।
ਤਕਨੀਕੀ ਸਹਾਇਤਾ ਅਤੇ ਸਿਖਲਾਈ ਦਾ ਭਰੋਸਾ: ਦੌਰੇ ਦੇ ਅੰਤ ਵਿੱਚ ਟੀਮ ਦੇ ਆਗੂਆਂ ਨੇ ਆਪਣੀਆਂ ਸ਼ੁਭਕਾਮਨਾਵਾਂ ਵੀ ਦਿੱਤੀਆਂ ਅਤੇ ਕਿਹਾ ਕਿ ਅਪਣਾ ਘਰ ਆਸ਼ਰਮ ਹੈੱਡਕੁਆਰਟਰ, ਭਰਤਪੁਰ (ਰਾਜਸਥਾਨ) ਵੱਲੋਂ ਇਸ ਕੇਂਦਰ ਨੂੰ ਸ਼ੁਰੂ ਕਰਨ ਲਈ ਸਮੁੱਚੀ ਲੋੜੀਂਦੀ ਤਕਨੀਕੀ ਸਹਾਇਤਾ ਮੁਹੱਈਆ ਕਰਵਾਈ ਜਾਵੇਗੀ। ਉਨ੍ਹਾਂ ਨੇ ਇਹ ਵੀ ਐਲਾਨ ਕੀਤਾ ਕਿ ਇਸ ਸੇਵਾ ਕਾਰਜ ਵਿੱਚ ਸਮਰਪਿਤ ਰਹਿਣ ਵਾਲੇ ਸੇਵਾਦਾਰਾਂ ਨੂੰ ਹੈੱਡਕੁਆਰਟਰ ਵੱਲੋਂ ਵਿਸ਼ੇਸ਼ ਸਿਖਲਾਈ (ਟ੍ਰੇਨਿੰਗ) ਵੀ ਦਿੱਤੀ ਜਾਵੇਗੀ, ਤਾਂ ਜੋ ਉਹ ਪੀੜਤ ਮਾਨਵਤਾ ਦੀ ਸੇਵਾ ਹੋਰ ਕੁਸ਼ਲਤਾ ਅਤੇ ਸੰਵੇਦਨਸ਼ੀਲਤਾ ਨਾਲ ਕਰ ਸਕਣ।
ਸਮਾਜ ਸੇਵਾ ਦੇ ਖੇਤਰ ਵਿੱਚ ਆਪਣਾ ਵਡਮੁੱਲਾ ਯੋਗਦਾਨ ਪਾ ਰਹੀਆਂ ਇਨ੍ਹਾਂ ਦੋਵਾਂ ਸੰਸਥਾਵਾਂ ਦਾ ਇਹ ਮਿਲਣ ਇਸ ਅਨੂਪਮ ਸੇਵਾ ਦੇ ਖੇਤਰ ਵਿੱਚ ਇੱਕ ਨਵੀਂ ਅਲਖ ਜਗਾਉਣ ਵਾਲਾ ਸਿੱਧ ਹੋਇਆ ਹੈ। ਜਨਹਿਤ ਸਮਿਤੀ ਅਤੇ ਅਪਣਾ ਘਰ ਆਸ਼ਰਮ ਦੇ ਇਸ ਸਾਂਝੇ ਯਤਨ ਨਾਲ ਆਉਣ ਵਾਲੇ ਸਮੇਂ ਵਿੱਚ ਰਾਏਪੁਰ ਮੰਡਲਾ ਦਾ ਇਹ ਜਨਹਿਤ ਭਵਨ ਬੇਸਹਾਰਾ ਲੋਕਾਂ ਲਈ ਉਮੀਦ ਦੀ ਇੱਕ ਨਵੀਂ ਕਿਰਨ ਬਣੇਗਾ।
ਵਿਨੋਦ ਕੁਮਾਰ ਸ਼ਰਮਾ
ਜਨਰਲ ਸਕੱਤਰ,
ਜਨਹਿਤ ਸਮਿਤੀ (ਰਜਿਸਟਰਡ), ਪਟਿਆਲਾ।
