ਫਤਿਹਾਬਾਦ: 13 ਦਸੰਬਰ (ਚੌਧਰੀ ਪ੍ਰਭਜੀਤ ਸਿੰਘ): ਹਰਿਆਣਾ ਦੇ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਫਤਿਹਾਬਾਦ ਜ਼ਿਲ੍ਹੇ ਨੂੰ ਵਿਕਾਸੀ ਤੋਹਫ਼ੇ ਦੇਣ ਜਾ ਰਹੇ ਹਨ। ਮੁੱਖ ਮੰਤਰੀ ਲਗਭਗ 23 ਕਰੋੜ 15 ਲੱਖ 13 ਹਜ਼ਾਰ ਰੁਪਏ ਦੀ ਲਾਗਤ ਨਾਲ ਤਿਆਰ ਹੋਏ ਜ਼ਿਲ੍ਹੇ ਦੇ ਤਿੰਨ ਮਹੱਤਵਪੂਰਨ ਪ੍ਰੋਜੈਕਟਾਂ ਦਾ ਉਦਘਾਟਨ ਕਰਨਗੇ।
ਇਨ੍ਹਾਂ ਵਿੱਚ ਟੋਹਾਣਾ ਵਿੱਚ 10 ਕਰੋੜ 42 ਲੱਖ 13 ਹਜ਼ਾਰ ਰੁਪਏ ਦੀ ਲਾਗਤ ਨਾਲ ਬਣਿਆ ਨਵਾਂ ਬੱਸ ਸਟੈਂਡ, ਨਗਰ ਪਾਲਿਕਾ ਜਾਖਲ ਮੰਡੀ ਵਿੱਚ 7 ਕਰੋੜ 5 ਲੱਖ ਰੁਪਏ ਨਾਲ ਤਿਆਰ ਕੀਤਾ ਮਲਟੀ ਪਰਪਜ਼ ਕੰਪਲੈਕਸ ਅਤੇ ਪਿੰਡ ਮਿਉਂਦ ਵਿੱਚ 5 ਕਰੋੜ 68 ਲੱਖ ਰੁਪਏ ਦੀ ਲਾਗਤ ਨਾਲ ਬਣਿਆ 33 ਕੇ.ਵੀ. ਸਬ-ਸਟੇਸ਼ਨ ਸ਼ਾਮਲ ਹੈ। ਇਹ ਪ੍ਰੋਜੈਕਟ ਆਵਾਜਾਈ, ਵਪਾਰ ਅਤੇ ਬਿਜਲੀ ਸਪਲਾਈ ਨੂੰ ਮਜ਼ਬੂਤ ਕਰਨ ਵਿੱਚ ਅਹੰਮ ਭੂਮਿਕਾ ਨਿਭਾਉਣਗੇ।
ਇਸ ਤੋਂ ਇਲਾਵਾ, ਮੁੱਖ ਮੰਤਰੀ 5 ਕਰੋੜ 26 ਲੱਖ 90 ਹਜ਼ਾਰ ਰੁਪਏ ਦੀ ਲਾਗਤ ਵਾਲੇ ਪੰਜ ਨਵੇਂ ਵਿਕਾਸੀ ਕੰਮਾਂ ਦਾ ਨੀਂਹ ਪੱਥਰ ਵੀ ਰੱਖਣਗੇ। ਇਨ੍ਹਾਂ ਵਿੱਚ ਪਿੰਡ ਮੂਸਾ ਖੇੜਾ ਵਿੱਚ ਫਿਰਨੀ ਦਾ ਨਿਰਮਾਣ, ਪਿੰਡ ਸਾਧਨਵਾਸ ਵਿੱਚ ਇੰਟਰਲੌਕ ਰਸਤੇ ਦੀ ਤਿਆਰੀ, ਪਿੰਡ ਚਾਂਦਪੁਰਾ, ਕਰੰਡੀ ਅਤੇ ਪਾਰਤਾ ਦੇ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲਾਂ ਵਿੱਚ ਨਵੇਂ ਕਲਾਸਰੂਮ, ਐਨਐਸਕਿਊਐਫ ਲੈਬ, ਚਾਰਦੀਵਾਰੀ, ਸ਼ੌਚਾਲਯ, ਪ੍ਰਾਰਥਨਾ ਸ਼ੈੱਡ, ਵਾਟਰ ਟੈਂਕ ਅਤੇ ਹੋਰ ਬੁਨਿਆਦੀ ਸਹੂਲਤਾਂ ਦਾ ਵਿਕਾਸ ਸ਼ਾਮਲ ਹੈ।
ਇਨ੍ਹਾਂ ਪ੍ਰੋਜੈਕਟਾਂ ਨਾਲ ਫਤਿਹਾਬਾਦ ਜ਼ਿਲ੍ਹੇ ਵਿੱਚ ਸਿੱਖਿਆ, ਬੁਨਿਆਦੀ ਢਾਂਚੇ ਅਤੇ ਪਿੰਡਾਂ ਦੇ ਵਿਕਾਸ ਨੂੰ ਵੱਡਾ ਬਲ ਮਿਲਣ ਦੀ ਉਮੀਦ ਹੈ।
