ਹਕੀਮਪੁਰ 23 ਨਵੰਬਰ 2025 (ਸ਼.ਅ.ਬਿਓਰੋ): ਪੱਛਮੀ ਬੰਗਾਲ ਵਿੱਚ ਵੋਟਰ ਸੂਚੀਆਂ ਦੀ ਵਿਸ਼ੇਸ਼ ਤੀਬਰ ਸੋਧ (SIR) ਸ਼ੁਰੂ ਹੋਣ ਤੋਂ ਬਾਅਦ ਸਰਹੱਦ ਰਾਹੀਂ ਗੈਰ-ਦਸਤਾਵੇਜ਼ੀ ਬੰਗਲਾਦੇਸ਼ੀ ਨਾਗਰਿਕਾਂ ਦੀ ਵਾਪਸੀ ਵਿੱਚ ਵੱਡਾ ਵਾਧਾ ਦਰਜ ਕੀਤਾ ਗਿਆ ਹੈ। ਬੀਐਸਐਫ ਦੇ ਜਵਾਨ ਹਰ ਰੋਜ਼ 150 ਤੋਂ 200 ਲੋਕਾਂ ਨੂੰ ਤਸਦੀਕ ਤੋਂ ਬਾਅਦ ਵਾਪਸ ਭੇਜ ਰਹੇ ਹਨ।
ਬਿਨਾਂ ਕਾਗਜ਼ਾਂ ਦੇ ਪਿਛਲੇ ਕਈ ਸਾਲਾਂ ਤੋਂ ਪੱਛਮੀ ਬੰਗਾਲ ਵਿੱਚ ਕੰਮ ਕਰ ਰਹੇ ਬੇਸ਼ਤਰ ਲੋਕ ਦਲਾਲਾਂ ਰਾਹੀਂ ਆਧਾਰ, ਰਾਸ਼ਨ ਜਾਂ ਵੋਟਰ ਕਾਰਡ ਬਣਵਾਉਣ ਦਾ ਦਾਅਵਾ ਕਰਦੇ ਹਨ। ਕਾਗਜ਼ਾਂ ਦੀ ਜਾਂਚ ਦੇ ਡਰ ਕਾਰਨ ਕਈ ਲੋਕ ਆਪਣੇ ਪਰਿਵਾਰਾਂ ਸਮੇਤ ਵਾਪਸ ਜਾਣ ਨੂੰ ਤਰਜੀਹ ਦੇ ਰਹੇ ਹਨ।
ਕੋਲਕਾਤਾ, ਨਿਊ ਟਾਊਨ, ਬਿਰਾਤੀ ਅਤੇ ਹਾਵੜਾ ਸਮੇਤ ਕਈ ਇਲਾਕਿਆਂ ਤੋਂ ਪਿਛਲੇ ਦਿਨਾਂ ਵਿੱਚ ਲੰਬੀਆਂ ਕਤਾਰਾਂ ਦੇ ਰੂਪ ਵਿੱਚ ਲੋਕ ਸਰਹੱਦ ਚੈਕਪੋਸਟਾਂ ‘ਤੇ ਪਹੁੰਚ ਰਹੇ ਹਨ। ਬੀਐਸਐਫ ਕੈਂਪਾਂ ਵਿੱਚ ਭੋਜਨ ਦੀ ਵਿਵਸਥਾ ਕੀਤੀ ਜਾਂਦੀ ਹੈ, ਜਦਕਿ ਕੁਝ ਲੋਕ ਸੜਕ ਕਿਨਾਰੇ ਸਟਾਲਾਂ ਤੋਂ ਖਾਣਾ ਖਰੀਦ ਕੇ ਰਹੇ ਹਨ।
