ਯਮੁਨਾਨਗਰ, 29 ਅਕਤੂਬਰ (ਰਾਜੇਸ਼ ਕੁਮਾਰ) – ਵਿਸ਼ਵ ਪ੍ਰਸਿੱਧ ਕਪਾਲਮੋਚਨ ਮੇਲੇ ਲਈ ਯਮੁਨਾਨਗਰ ਰੋਡਵੇਜ਼ ਵਿਭਾਗ ਨੇ ਤਿਆਰੀਆਂ ਪੂਰੀਆਂ ਕਰ ਲਈਆਂ ਹਨ। ਮੇਲਾ 1 ਨਵੰਬਰ ਤੋਂ 5 ਨਵੰਬਰ ਤੱਕ ਮਨਾਇਆ ਜਾਣਾ ਹੈ ਅਤੇ ਇਸ ਦੌਰਾਨ ਲੱਖਾਂ ਸ਼ਰਧਾਲੂਆਂ ਦੇ ਆਉਣ ਦੀ ਉਮੀਦ ਹੈ। ਸ਼ਰਧਾਲੂਆਂ ਦੀ ਸਹੂਲਤ ਲਈ ਲਗਭਗ 100 ਬੱਸਾਂ ਤਾਇਨਾਤ ਕੀਤੀਆਂ ਜਾ ਰਹੀਆਂ ਹਨ ਤਾਂ ਜੋ ਕਿਸੇ ਨੂੰ ਯਾਤਰਾ ਵਿੱਚ ਕਿਸੇ ਕਿਸਮ ਦੀ ਦਿੱਕਤ ਦਾ ਸਾਹਮਣਾ ਨਾ ਕਰਨਾ ਪਵੇ।
ਰੋਡਵੇਜ਼ ਜੀ.ਐਮ. ਸੰਜੇ ਰਾਵਲ ਨੇ ਦੱਸਿਆ ਕਿ ਸ਼ਰਧਾਲੂਆਂ ਦੀ ਸਹੂਲਤ ਲਈ ਚਾਰ ਅਸਥਾਈ ਬੱਸ ਸਟੈਂਡ ਬਣਾਏ ਗਏ ਹਨ—ਯਮੁਨਾਨਗਰ ਰੇਲਵੇ ਸਟੇਸ਼ਨ, ਯਮੁਨਾਨਗਰ ਬੱਸ ਸਟੈਂਡ, ਜਗਾਧਰੀ ਬੱਸ ਸਟੈਂਡ ਅਤੇ ਕਪਾਲਮੋਚਨ ਵਿਖੇ। ਇਨ੍ਹਾਂ ਦੇ ਨਾਲ-ਨਾਲ ਭੇਡਥਲ, ਸਾਧੋਰਾ ਅਤੇ ਕਪਾਲਮੋਚਨ ਵਿੱਚ ਚੌਕੀਆਂ ਵੀ ਸਥਾਪਤ ਕੀਤੀਆਂ ਗਈਆਂ ਹਨ, ਜਿੱਥੇ ਪ੍ਰਬੰਧਕੀ ਅਧਿਕਾਰੀ ਤੈਨਾਤ ਰਹਿਣਗੇ।
ਸੰਜੇ ਰਾਵਲ ਨੇ ਕਿਹਾ ਕਿ ਮੇਲੇ ਦੌਰਾਨ ਯਾਤਰੀਆਂ ਨੂੰ ਸਹੀ ਦਿਸ਼ਾ-ਨਿਰਦੇਸ਼ ਤੇ ਜਾਣਕਾਰੀ ਦੇਣ ਲਈ ਹੈਲਪ ਡੈਸਕ ਵੀ ਸਥਾਪਤ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ, ਜਿਨ੍ਹਾਂ ਸ਼ਰਧਾਲੂਆਂ ਨੂੰ ਪੈਦਲ ਜਾਣ ਵਿੱਚ ਦਿੱਕਤ ਆ ਸਕਦੀ ਹੈ, ਉਨ੍ਹਾਂ ਲਈ ਈ-ਰਿਕਸ਼ਾ ਦੀ ਵੀ ਵਿਵਸਥਾ ਕੀਤੀ ਗਈ ਹੈ।
ਰੋਡਵੇਜ਼ ਵਿਭਾਗ ਨੇ ਦੱਸਿਆ ਕਿ ਮੇਲੇ ਦੇ ਦਿਨਾਂ ਦੌਰਾਨ ਬੱਸਾਂ ਦੀ ਵਾਧੂ ਸੇਵਾ ਚਲਾਈ ਜਾਵੇਗੀ ਅਤੇ ਸਾਰੇ ਸਟਾਫ ਨੂੰ ਵਿਸ਼ੇਸ਼ ਡਿਊਟੀ ਲਈ ਤਾਇਨਾਤ ਕੀਤਾ ਗਿਆ ਹੈ। ਪ੍ਰਸ਼ਾਸਨ ਵੱਲੋਂ ਸੁਰੱਖਿਆ ਤੇ ਟ੍ਰੈਫਿਕ ਪ੍ਰਬੰਧ ਨੂੰ ਲੈ ਕੇ ਵੀ ਪੂਰੇ ਇੰਤਜ਼ਾਮ ਕੀਤੇ ਗਏ ਹਨ ਤਾਂ ਜੋ ਕਪਾਲਮੋਚਨ ਮੇਲਾ ਸ਼ਾਂਤੀਪੂਰਨ ਅਤੇ ਸਫਲ ਢੰਗ ਨਾਲ ਮਨਾਇਆ ਜਾ ਸਕੇ।
