ਆਈਚੀ–ਨਾਗੋਯਾ [ਜਾਪਾਨ], 3 ਅਕਤੂਬਰ 2026 (ਹਰਸ਼ਪ੍ਰੀਤ ਕੌਰ): ਭਾਰਤ ਦੀ 17 ਸਾਲਾ ਤੀਰਅੰਦਾਜ਼ ਕੁਮਕੁਮ ਮੋਹੋਦ ਨੇ ਏਸ਼ੀਆਈ ਖੇਡਾਂ 2026 ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਮਹਿਲਾ ਰਿਕਰਵ ਵਿਅਕਤੀਗਤ ਮੁਕਾਬਲੇ ਦਾ ਸੋਨ ਤਮਗਾ ਆਪਣੇ ਨਾਮ ਕਰ ਲਿਆ। ਇਸ ਜਿੱਤ ਨਾਲ ਉਹ ਏਸ਼ੀਆਈ ਖੇਡਾਂ ਦੇ ਇਤਿਹਾਸ ਵਿੱਚ ਮਹਿਲਾ ਵਿਅਕਤੀਗਤ ਰਿਕਰਵ ਮੁਕਾਬਲੇ ਵਿੱਚ ਤਮਗਾ ਜਿੱਤਣ ਵਾਲੀ ਪਹਿਲੀ ਭਾਰਤੀ ਬਣ ਗਈ ਹੈ। ਫਾਈਨਲ ਵਿੱਚ ਕੁਮਕੁਮ ਦਾ ਸਾਹਮਣਾ ਦੱਖਣੀ ਕੋਰੀਆ ਦੀ ਓ ਯੇਜਿਨ ਨਾਲ ਹੋਇਆ। ਪੰਜ ਸੈੱਟਾਂ ਤੋਂ ਬਾਅਦ ਦੋਵੇਂ ਤੀਰਅੰਦਾਜ਼ 5-5 ਦੀ ਬਰਾਬਰੀ ’ਤੇ ਰਹੀਆਂ, ਜਿਸ ਤੋਂ ਬਾਅਦ ਸੋਨ ਤਮਗੇ ਦਾ ਫੈਸਲਾ ਸ਼ੂਟ-ਆਫ ਰਾਹੀਂ ਹੋਇਆ। ਫੈਸਲਾਕੁੰਨ ਪਲ ਵਿੱਚ ਓ ਯੇਜਿਨ ਨੇ 8 ਅੰਕ ਹਾਸਲ ਕੀਤੇ, ਜਦਕਿ ਕੁਮਕੁਮ ਨੇ ਦਬਾਅ ਦੇ ਬਾਵਜੂਦ ਬਿਲਕੁਲ ਨਿਸ਼ਾਨੇ ਦੇ ਕੇਂਦਰ ਵਿੱਚ 10 ਅੰਕਾਂ ਦਾ ਤੀਰ ਮਾਰ ਕੇ ਸੋਨ ਤਮਗਾ ਪੱਕਾ ਕਰ ਦਿੱਤਾ।
ਮੁਕਾਬਲੇ ਦੀ ਸ਼ੁਰੂਆਤ ਵਿੱਚ ਓ ਯੇਜਿਨ ਨੇ ਪਹਿਲਾ ਸੈੱਟ 29-27 ਨਾਲ ਜਿੱਤ ਕੇ 2-0 ਦੀ ਬੜ੍ਹਤ ਬਣਾਈ। ਦੂਜਾ ਸੈੱਟ 29-29 ਨਾਲ ਬਰਾਬਰ ਰਿਹਾ, ਜਿਸ ਨਾਲ ਕੋਰੀਆਈ ਤੀਰਅੰਦਾਜ਼ ਦੀ ਬੜ੍ਹਤ 3-1 ਹੋ ਗਈ। ਇਸ ਤੋਂ ਬਾਅਦ ਕੁਮਕੁਮ ਨੇ ਜ਼ਬਰਦਸਤ ਵਾਪਸੀ ਕੀਤੀ। ਤੀਜੇ ਸੈੱਟ ਵਿੱਚ ਉਸ ਨੇ ਲਗਾਤਾਰ ਤਿੰਨ 10 ਦੇ ਨਿਸ਼ਾਨੇ ਲਗਾ ਕੇ 30 ਅੰਕ ਬਣਾਏ ਅਤੇ ਸੈੱਟ 30-29 ਨਾਲ ਜਿੱਤਦਿਆਂ ਸਕੋਰ 3-3 ਕਰ ਦਿੱਤਾ। ਚੌਥੇ ਸੈੱਟ ਵਿੱਚ ਓ ਯੇਜਿਨ ਨੇ 28-27 ਨਾਲ ਜਿੱਤ ਦਰਜ ਕਰਕੇ ਮੁੜ 5-3 ਦੀ ਬੜ੍ਹਤ ਹਾਸਲ ਕਰ ਲਈ। ਪੰਜਵੇਂ ਅਤੇ ਫੈਸਲਾਕੁੰਨ ਸੈੱਟ ਵਿੱਚ ਕੁਮਕੁਮ ’ਤੇ ਮੁਕਾਬਲਾ ਬਚਾਉਣ ਦਾ ਦਬਾਅ ਸੀ। ਪਰ ਉਸ ਨੇ ਤਿੰਨੋਂ ਤੀਰ 10 ਦੇ ਨਿਸ਼ਾਨੇ ’ਤੇ ਲਗਾ ਕੇ 30 ਅੰਕ ਹਾਸਲ ਕੀਤੇ, ਜਦਕਿ ਓ ਯੇਜਿਨ 28 ਅੰਕ ਹੀ ਬਣਾ ਸਕੀ। ਇਸ ਨਾਲ ਮੁਕਾਬਲਾ 5-5 ਦੀ ਬਰਾਬਰੀ ’ਤੇ ਪਹੁੰਚ ਗਿਆ ਅਤੇ ਫੈਸਲਾ ਸ਼ੂਟ-ਆਫ ਨਾਲ ਹੋਇਆ।
ਕੁਮਕੁਮ ਲਈ ਇਹ ਏਸ਼ੀਆਈ ਖੇਡਾਂ ਬੇਹੱਦ ਯਾਦਗਾਰ ਰਹੀਆਂ ਹਨ। ਇਸ ਤੋਂ ਪਹਿਲਾਂ ਉਹ ਮਹਿਲਾ ਰਿਕਰਵ ਟੀਮ ਮੁਕਾਬਲੇ ਵਿੱਚ ਅੰਕਿਤਾ ਭਕਤ ਅਤੇ ਕੀਰਤੀ ਸ਼ਰਮਾ ਨਾਲ ਮਿਲ ਕੇ ਸੋਨ ਤਮਗਾ ਜਿੱਤ ਚੁੱਕੀ ਹੈ। ਭਾਰਤੀ ਟੀਮ ਨੇ ਫਾਈਨਲ ਵਿੱਚ ਦੱਖਣੀ ਕੋਰੀਆ ਨੂੰ 5-3 ਨਾਲ ਹਰਾਇਆ ਸੀ। ਇਸ ਤੋਂ ਇਲਾਵਾ ਕੁਮਕੁਮ ਨੇ ਧੀਰਜ ਬੋਮਾਦੇਵਰਾ ਨਾਲ ਮਿਲ ਕੇ ਮਿਕਸਡ ਰਿਕਰਵ ਟੀਮ ਮੁਕਾਬਲੇ ਵਿੱਚ ਚਾਂਦੀ ਦਾ ਤਮਗਾ ਵੀ ਜਿੱਤਿਆ। ਵਿਅਕਤੀਗਤ ਮੁਕਾਬਲੇ ਵਿੱਚ ਵੀ ਕੁਮਕੁਮ ਦਾ ਸਫ਼ਰ ਸ਼ਾਨਦਾਰ ਰਿਹਾ। ਕੁਆਰਟਰ ਫਾਈਨਲ ਵਿੱਚ ਉਸ ਨੇ ਦੱਖਣੀ ਕੋਰੀਆ ਦੀ ਵਿਸ਼ਵ ਅਤੇ ਓਲੰਪਿਕ ਚੈਂਪੀਅਨ ਕਾਂਗ ਚਾਏਯੰਗ ਨੂੰ 6-4 ਨਾਲ ਹਰਾਇਆ। ਇਸ ਤੋਂ ਬਾਅਦ ਸੈਮੀਫਾਈਨਲ ਵਿੱਚ ਚੀਨ ਦੀ ਵਿਸ਼ਵ ਚੈਂਪੀਅਨਸ਼ਿਪ ਦੀ ਚਾਂਦੀ ਤਮਗਾ ਜੇਤੂ ਝੂ ਜਿੰਗਈ ਨੂੰ 6-2 ਨਾਲ ਮਾਤ ਦੇ ਕੇ ਫਾਈਨਲ ਵਿੱਚ ਜਗ੍ਹਾ ਬਣਾਈ।
ਕੁਮਕੁਮ ਦਾ ਇਹ ਸੋਨ ਤਮਗਾ ਭਾਰਤੀ ਤੀਰਅੰਦਾਜ਼ੀ ਲਈ ਵੀ ਮਹੱਤਵਪੂਰਨ ਉਪਲਬਧੀ ਹੈ। ਏਸ਼ੀਆਈ ਖੇਡਾਂ ਵਿੱਚ ਇਸ ਤੋਂ ਪਹਿਲਾਂ ਭਾਰਤ ਲਈ ਵਿਅਕਤੀਗਤ ਰਿਕਰਵ ਵਿੱਚ ਪੁਰਸ਼ ਵਰਗ ਵਿੱਚ ਤਰੁਣਦੀਪ ਰਾਏ ਨੇ 2010 ਗੁਆਂਗਝੂ ਖੇਡਾਂ ਵਿੱਚ ਚਾਂਦੀ ਦਾ ਤਮਗਾ ਜਿੱਤਿਆ ਸੀ। ਹੁਣ ਕੁਮਕੁਮ ਨੇ ਮਹਿਲਾ ਵਿਅਕਤੀਗਤ ਰਿਕਰਵ ਵਿੱਚ ਭਾਰਤ ਨੂੰ ਪਹਿਲਾ ਤਮਗਾ ਹੀ ਨਹੀਂ, ਸਗੋਂ ਸੋਨ ਤਮਗਾ ਦਿਵਾ ਕੇ ਨਵਾਂ ਇਤਿਹਾਸ ਰਚ ਦਿੱਤਾ ਹੈ। ਕੁਮਕੁਮ ਦੀ ਇਸ ਇਤਿਹਾਸਕ ਜਿੱਤ ਨਾਲ ਏਸ਼ੀਆਈ ਖੇਡਾਂ 2026 ਵਿੱਚ ਭਾਰਤ ਦੇ ਤਮਗਿਆਂ ਦੀ ਗਿਣਤੀ 77 ਹੋ ਗਈ ਹੈ, ਜਿਸ ਵਿੱਚ 17 ਸੋਨ, 25 ਚਾਂਦੀ ਅਤੇ 35 ਕਾਂਸੀ ਦੇ ਤਮਗੇ ਸ਼ਾਮਲ ਹਨ।
