ਪਣਜੀ, 14 ਸਤੰਬਰ, 2026 (ਗੁਰਮੀਤ ਸਿੰਘ ਤੁੰਗ) : ਆਮ ਆਦਮੀ ਪਾਰਟੀ ਅਤੇ ਗੋਆ ਫਾਰਵਰਡ ਪਾਰਟੀ (ਜੀਐਮਪੀ ) ਨੇ 2027 ਦੀਆਂ ਗੋਆ ਵਿਧਾਨ ਸਭਾ ਚੋਣਾਂ ਲਈ ਪ੍ਰੀ-ਪੋਲ ਗਠਜੋੜ ਦਾ ਐਲਾਨ ਕੀਤਾ ਹੈ। ਇਸ ਗਠਜੋੜ ਦਾ ਨਾਮ ਗੋਆ ਫਰਸਟ’ ਰੱਖਿਆ ਗਿਆ ਹੈ। ਦੋਵੇਂ ਪਾਰਟੀਆਂ ਨੇ ਇਸ ਨੂੰ ਬੀਜੇਪੀ ਅਤੇ ਕਾਂਗਰਸ ਤੋਂ ਇਲਾਵਾ ਵੋਟਰਾਂ ਲਈ ਇੱਕ ਨਵੇਂ ਸਿਆਸੀ ਵਿਕਲਪ ਵਜੋਂ ਪੇਸ਼ ਕੀਤਾ ਹੈ। ਆਪ ਦੇ ਕੌਮੀ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੇ ਪਣਜੀ ਵਿੱਚ ਗਠਜੋੜ ਦਾ ਐਲਾਨ ਕਰਦਿਆਂ ਕਿਹਾ ਕਿ ‘ਗੋਆ ਫਰਸਟ’ ਆਉਣ ਵਾਲੀ ਚੋਣ ਵਿੱਚ ਜਿੱਤ ਹਾਸਲ ਕਰਕੇ ਸਰਕਾਰ ਬਣਾਉਣ ਦਾ ਟੀਚਾ ਰੱਖਦਾ ਹੈ। ਉਨ੍ਹਾਂ ਬੀਜੇਪੀ ਅਤੇ ਕਾਂਗਰਸ ਦੋਵਾਂ ’ਤੇ ਸਿਆਸੀ ਮੌਕਾਪ੍ਰਸਤੀ ਦੇ ਦੋਸ਼ ਲਗਾਉਂਦਿਆਂ ਵੋਟਰਾਂ ਨੂੰ ਨਵਾਂ ਵਿਕਲਪ ਦੇਣ ਦੀ ਗੱਲ ਕੀਤੀ।
ਜੀਐੱਫਪੀ ਨਾਲ ਗਠਜੋੜ ਕਿਉਂ ਅਹਿਮ: ਗੋਆ ਫਾਰਵਰਡ ਪਾਰਟੀ ਦੀ ਅਗਵਾਈ ਵਿਜੈ ਸਰਦੇਸਾਈ ਕਰ ਰਹੇ ਹਨ ਅਤੇ ਪਾਰਟੀ ਦੀ ਗੋਆ ਵਿੱਚ ਖੇਤਰੀ ਪਕੜ ਹੈ। 2022 ਦੀਆਂ ਚੋਣਾਂ ਵਿੱਚ ਜੀਐਫਪੀ ਨੇ ਇੱਕ ਸੀਟ ਜਿੱਤੀ ਸੀ, ਜਦਕਿ ਆਪ ਨੇ ਦੋ ਸੀਟਾਂ ਹਾਸਲ ਕੀਤੀਆਂ ਸਨ। ਇਸ ਲਈ ਦੋਵਾਂ ਪਾਰਟੀਆਂ ਲਈ ਇਕੱਠੇ ਹੋਣਾ ਆਪਣੇ ਵੋਟ ਆਧਾਰ ਨੂੰ ਜੋੜਨ ਦੀ ਕੋਸ਼ਿਸ਼ ਵਜੋਂ ਦੇਖਿਆ ਜਾ ਰਿਹਾ ਹੈ।
ਕਾਂਗਰਸ ਲਈ ਝਟਕਾ: ਇਸ ਗਠਜੋੜ ਦਾ ਸਭ ਤੋਂ ਵੱਡਾ ਸਿਆਸੀ ਪ੍ਰਭਾਵ ਕਾਂਗਰਸ ’ਤੇ ਪੈ ਸਕਦਾ ਹੈ। ਜੀਐਫਪੀ ਪਹਿਲਾਂ ਕਾਂਗਰਸ ਨਾਲ ਗਠਜੋੜ ਵਿੱਚ ਰਹਿ ਚੁੱਕੀ ਹੈ, ਪਰ ਹੁਣ ਇਸ ਨੇ ਆਪ ਨਾਲ ਜਾਣ ਦਾ ਫੈਸਲਾ ਕੀਤਾ ਹੈ। ਇਸ ਨਾਲ ਗੋਆ ਵਿੱਚ ਬੀਜੇਪੀ ਵਿਰੋਧੀ ਵੋਟਾਂ ਨੂੰ ਇਕੱਠਾ ਕਰਨ ਦੀ ਕਾਂਗਰਸ ਦੀ ਰਣਨੀਤੀ ਨੂੰ ਚੁਣੌਤੀ ਮਿਲ ਸਕਦੀ ਹੈ। ਇਸ ਦੇ ਨਾਲ ਹੀ ਕਾਂਗਰਸ ਨੇ ਰੈਵੋਲਿਊਸ਼ਨਰੀ ਗੋਨਸ ਪਾਰਟੀ ਨਾਲ 2027 ਚੋਣਾਂ ਲਈ ਸਿਧਾਂਤਕ ਤੌਰ ’ਤੇ ਸਮਝੌਤਾ ਕੀਤਾ ਹੈ। ਇਸ ਕਾਰਨ ਗੋਆ ਦੀ ਸਿਆਸਤ ਵਿੱਚ ਵਿਰੋਧੀ ਧਿਰ ਦੇ ਅੰਦਰ ਵੀ ਨਵੇਂ ਗਠਜੋੜਾਂ ਦੀ ਦੌੜ ਤੇਜ਼ ਹੋ ਗਈ ਹੈ।
ਬੀਜੇਪੀ ਲਈ ਨਵੀਂ ਚੁਣੌਤੀ: 2022 ਦੀਆਂ ਚੋਣਾਂ ਵਿੱਚ BJP ਨੇ 40 ਵਿੱਚੋਂ 20 ਸੀਟਾਂ ਜਿੱਤੀਆਂ ਸਨ ਅਤੇ ਬਾਅਦ ਵਿੱਚ ਕਾਂਗਰਸ ਦੇ ਅੱਠ ਵਿਧਾਇਕ ਬੀਜੇਪੀ ਵਿੱਚ ਸ਼ਾਮਲ ਹੋ ਗਏ ਸਨ। ਹੁਣ ਆਪ -ਜੀਐੱਫਪੀ ਗਠਜੋੜ ਦਾ ਉਦੇਸ਼ ਗੈਰ-BJP ਵੋਟਾਂ ਨੂੰ ਆਪਣੇ ਪੱਖ ਵਿੱਚ ਲਿਆਉਣਾ ਅਤੇ ਬੀਜੇਪੀ ਨੂੰ ਸਿੱਧੀ ਚੁਣੌਤੀ ਦੇਣਾ ਹੈ।
ਕੀ ਹੋਵੇਗਾ ਅਸਰ?: ‘ਗੋਆ ਫਰਸਟ’ ਗਠਜੋੜ ਗੋਆ ਦੀ ਬਹੁਕੋਣੀ ਚੋਣੀ ਲੜਾਈ ਨੂੰ ਹੋਰ ਦਿਲਚਸਪਬਣਾ ਸਕਦਾ ਹੈ। ਆਪ ਆਪਣੀ ਰਾਸ਼ਟਰੀ ਸਿਆਸੀ ਪਹੁੰਚ ਅਤੇ ਜੀਐੱਫਪੀ ਆਪਣੀ ਖੇਤਰੀ ਪਕੜ ਨੂੰ ਜੋੜਨ ਦੀ ਕੋਸ਼ਿਸ਼ ਕਰੇਗੀ। ਹਾਲਾਂਕਿ ਸੀਟਾਂ ਦੀ ਵੰਡ ਅਤੇ ਦੋਵਾਂ ਪਾਰਟੀਆਂ ਦੀ ਜ਼ਮੀਨੀ ਰਣਨੀਤੀ ਬਾਰੇ ਹੋਰ ਵੇਰਵੇ ਆਉਣੇ ਬਾਕੀ ਹਨ। 2027 ਦੀਆਂ ਗੋਆ ਚੋਣਾਂ ਵਿੱਚ ਹੁਣ ਮੁੱਖ ਮੁਕਾਬਲਾ ਬੀਜੇਪੀ , ਕਾਂਗਰਸ ਅਤੇ ਆਪ -ਜੀਐਫਪੀ ਦੇ ‘ਗੋਆ ਫਰਸਟ’ ਗਠਜੋੜ ਵਿਚਕਾਰ ਹੋਰ ਤਿੱਖਾ ਹੋਣ ਦੇ ਆਸਾਰ ਹਨ।
