ਮਿਊਨਿਖ/ਮੈਨਚੈਸਟਰ, 11 ਸਤੰਬਰ, 2026 (ਕਾਜਲ) : ਯੂਈਐਫਏ ਚੈਂਪੀਅਨਜ਼ ਲੀਗ ਦੇ ਨਵੇਂ ਸੀਜ਼ਨ ਦੀ ਸ਼ੁਰੂਆਤ ’ਚ ਵੱਡੀਆਂ ਟੀਮਾਂ ਨੇ ਜ਼ਬਰਦਸਤ ਪ੍ਰਦਰਸ਼ਨ ਕੀਤਾ। ਬਾਇਰਨ ਮਿਊਨਿਖ ਨੇ ਬੋਡੋ/ਗਲਿਮਟ ਨੂੰ 5-0 ਨਾਲ ਹਰਾਇਆ, ਜਦਕਿ ਮੈਨਚੈਸਟਰ ਯੂਨਾਈਟਿਡ ਨੇ ਸਬਾਹ ਐਫ.ਕੇ. ਨੂੰ 4-0 ਨਾਲ ਮਾਤ ਦੇ ਕੇ ਮੁਕਾਬਲੇ ’ਚ ਜਿੱਤ ਨਾਲ ਵਾਪਸੀ ਕੀਤੀ। ਬਾਇਰਨ ਦੀ ਜਿੱਤ ਵਿੱਚ ਹੈਰੀ ਕੇਨ ਨੇ ਵੀ ਗੋਲ ਕਰਕੇ ਆਪਣੀ ਸ਼ਾਨਦਾਰ ਗੋਲ ਸਕੋਰਿੰਗ ਫਾਰਮ ਜਾਰੀ ਰੱਖੀ। ਬਾਇਰਨ ਨੇ ਦੂਜੇ ਹਾਫ਼ ਵਿੱਚ ਵਿਰੋਧੀ ਟੀਮ ’ਤੇ ਪੂਰੀ ਤਰ੍ਹਾਂ ਦਬਦਬਾ ਬਣਾਉਂਦਿਆਂ ਪੰਜ ਗੋਲ ਕੀਤੇ। ਕੇਨ ਤੋਂ ਇਲਾਵਾ ਮਾਈਕਲ ਓਲੀਸੇ ਨੇ ਦੋ ਗੋਲ ਕੀਤੇ, ਜਦਕਿ ਜਮਾਲ ਮੁਸਿਆਲਾ ਅਤੇ ਅਲਫੋਂਸੋ ਡੇਵਿਸ ਨੇ ਵੀ ਗੋਲ ਕੀਤੇ।
ਦੂਜੇ ਪਾਸੇ ਮੈਨਚੈਸਟਰ ਯੂਨਾਈਟਿਡ ਨੇ ਓਲਡ ਟ੍ਰੈਫਰਡ ’ਚ ਸਬਾਹ ਨੂੰ 4-0 ਨਾਲ ਹਰਾਇਆ। ਮੈਥਿਉਸ ਕੁਨ੍ਹਾ, ਬਰੂਨੋ ਫਰਨਾਂਡਿਸ, ਬੈਂਜਾਮਿਨ ਸੇਸਕੋ ਅਤੇ ਲਿਸਾਂਦਰੋ ਮਾਰਟੀਨੇਜ਼ ਨੇ ਗੋਲ ਕਰਕੇ ਟੀਮ ਦੀ ਜਿੱਤ ਪੱਕੀ ਕੀਤੀ। ਇਸ ਜਿੱਤ ਨਾਲ ਯੂਨਾਈਟਿਡ ਨੇ ਚੈਂਪੀਅਨਜ਼ ਲੀਗ ਵਿੱਚ ਆਪਣੀ ਵਾਪਸੀ ਨੂੰ ਯਾਦਗਾਰ ਬਣਾਇਆ। ਇਸੇ ਦੌਰਾਨ ਚੈਂਪੀਅਨਜ਼ ਲੀਗ ਵਿੱਚ ਆਪਣੀ ਪਹਿਲੀ ਹਾਜ਼ਰੀ ਦਰਜ ਕਰ ਰਹੇ ਕੋਮੋ ਨੇ ਵੀ ਪ੍ਰਭਾਵਸ਼ਾਲੀ ਸ਼ੁਰੂਆਤ ਕੀਤੀ। ਟੀਮ ਨੇ ਆਰਬੀ ਲਾਈਪਜ਼ਿਗ ਨੂੰ 4-1 ਨਾਲ ਹਰਾ ਕੇ ਯੂਰਪੀ ਫੁੱਟਬਾਲ ਦੇ ਵੱਡੇ ਮੰਚ ’ਤੇ ਆਪਣੀ ਮੌਜੂਦਗੀ ਦਾ ਮਜ਼ਬੂਤ ਸੰਕੇਤ ਦਿੱਤਾ। ਪਹਿਲੇ ਦੌਰ ਦੇ ਇਨ੍ਹਾਂ ਨਤੀਜਿਆਂ ਨੇ ਚੈਂਪੀਅਨਜ਼ ਲੀਗ ਦੇ ਇਸ ਸੀਜ਼ਨ ਵਿੱਚ ਮੁਕਾਬਲੇ ਦੀ ਰੌਚਕਤਾ ਹੋਰ ਵਧਾ ਦਿੱਤੀ ਹੈ।
