ਮਨੋਰੰਜਨ, 5 ਸਤੰਬਰ 2026 (ਹਰਸ਼ਪ੍ਰੀਤ ਕੌਰ): ਫ਼ਰਹਾਨ ਅਖ਼ਤਰ ਦੀ ਫ਼ਿਲਮ ‘ਦਿਲ ਚਾਹਤਾ ਹੈ’ ਨੂੰ ਰਿਲੀਜ਼ ਹੋਏ 25 ਸਾਲ ਹੋ ਗਏ ਹਨ, ਪਰ ਇਸ ਦੀ ਦੋਸਤੀ, ਜੀਵਨਸ਼ੈਲੀ ਅਤੇ ਨੌਜਵਾਨੀ ਵਾਲਾ ਅੰਦਾਜ਼ ਅੱਜ ਵੀ ਦਰਸ਼ਕਾਂ ਨੂੰ ਪ੍ਰਭਾਵਿਤ ਕਰਦਾ ਹੈ। 2001 ਵਿੱਚ ਆਈ ਇਸ ਫ਼ਿਲਮ ਨੇ ਆਕਾਸ਼, ਸਿਦਾਰਥ ਅਤੇ ਸਮੀਰ ਦੀ ਦੋਸਤੀ ਰਾਹੀਂ ਬਾਲੀਵੁੱਡ ਵਿੱਚ ਦੋਸਤੀਆਂ ਨੂੰ ਪੇਸ਼ ਕਰਨ ਦਾ ਨਵਾਂ ਤਰੀਕਾ ਦਿਖਾਇਆ। ਗੋਆ ਦੀ ਅਚਾਨਕ ਰੋਡ ਟ੍ਰਿਪ, ਸ਼ਹਿਰੀ ਨਾਈਟਲਾਈਫ ਅਤੇ ਦੋਸਤਾਂ ਵਿਚਕਾਰ ਹਲਕੀ-ਫੁਲਕੀ ਗੱਲਬਾਤ ਨੇ ਨੌਜਵਾਨ ਪੀੜ੍ਹੀ ਦੀ ਬਦਲ ਰਹੀ ਸੋਚ ਨੂੰ ਪਰਦੇ ’ਤੇ ਖੂਬਸੂਰਤੀ ਨਾਲ ਦਰਸਾਇਆ। ਫ਼ਿਲਮ ਦੀ ਖ਼ਾਸ ਗੱਲ ਇਸ ਦਾ ਸਾਦਾ ਪਰ ਆਕਰਸ਼ਕ ਵਿਜ਼ੂਅਲ ਅੰਦਾਜ਼ ਸੀ। ਕਿਰਦਾਰਾਂ ਦੇ ਕੱਪੜੇ ਅਤੇ ਲੋਕੇਸ਼ਨ ਉਨ੍ਹਾਂ ਦੀ ਸ਼ਖ਼ਸੀਅਤ ਨਾਲ ਜੋੜੇ ਗਏ, ਜਿਸ ਕਾਰਨ ਫ਼ਿਲਮ ਨੇ ਉਸ ਦੌਰ ਦੀ ਸ਼ਹਿਰੀ ਨੌਜਵਾਨੀ ਲਈ ਇੱਕ ਨਵਾਂ ‘ਕੂਲ’ ਸਟਾਈਲ ਕਾਇਮ ਕੀਤਾ। 25 ਸਾਲ ਬਾਅਦ ਵੀ ‘ਦਿਲ ਚਾਹਤਾ ਹੈ’ ਨੂੰ ਬਾਲੀਵੁੱਡ ਦੀਆਂ ਉਨ੍ਹਾਂ ਫ਼ਿਲਮਾਂ ਵਿੱਚ ਗਿਣਿਆ ਜਾਂਦਾ ਹੈ, ਜਿਨ੍ਹਾਂ ਨੇ ਦੋਸਤੀ ਅਤੇ ਨੌਜਵਾਨ ਜੀਵਨ ਨੂੰ ਪਰਦੇ ’ਤੇ ਪੇਸ਼ ਕਰਨ ਦਾ ਅੰਦਾਜ਼ ਬਦਲ ਦਿੱਤਾ।
