ਮੁੰਬਈ, 3 ਸਤੰਬਰ 2026 (ਕਾਜਲ) : ਸੰਜੇ ਲੀਲਾ ਭੰਸਾਲੀ ਦੀ ਫ਼ਿਲਮ ‘ਪਦਮਾਵਤ’ ਰਿਲੀਜ਼ ਤੋਂ ਕਈ ਸਾਲ ਬਾਅਦ ਵੀ ਵਿਵਾਦਾਂ ਵਿੱਚ ਬਣੀ ਹੋਈ ਹੈ। ਅਦਾਕਾਰਾ ਸਵਰਾ ਭਾਸਕਰ ਵੱਲੋਂ ਫ਼ਿਲਮ ਦੇ ਜੌਹਰ ਵਾਲੇ ਦ੍ਰਿਸ਼ ਨੂੰ ‘ਸਮੱਸਿਆਜਨਕ’ ਦੱਸੇ ਜਾਣ ਤੋਂ ਬਾਅਦ ਹੁਣ ਫ਼ਿਲਮ ਦੇ ਸਹਿ-ਲੇਖਕ ਪ੍ਰਕਾਸ਼ ਕਪਾਡੀਆ ਨੇ ਇਸ ਦਾ ਬਚਾਅ ਕੀਤਾ ਹੈ। ਪ੍ਰਕਾਸ਼ ਕਪਾਡੀਆ ਨੇ ਕਿਹਾ ਕਿ ਫ਼ਿਲਮ ਨੂੰ ਇਤਿਹਾਸਕ ਖੋਜ ਅਤੇ ਇਤਿਹਾਸ ਦੀਆਂ ਕਿਤਾਬਾਂ ਵਿੱਚ ਦਰਜ ਤੱਥਾਂ ਦੇ ਆਧਾਰ ’ਤੇ ਤਿਆਰ ਕੀਤਾ ਗਿਆ ਸੀ। ਉਨ੍ਹਾਂ ਮੁਤਾਬਕ ਫ਼ਿਲਮ ਵਿੱਚ ਦਿਖਾਇਆ ਗਿਆ ਜੌਹਰ ਉਸ ਸਮੇਂ ਦੀ ਹਕੀਕਤ ਦਾ ਹਿੱਸਾ ਸੀ ਅਤੇ ਉਸ ਨੂੰ ਅੱਜ ਦੇ ਨਜ਼ਰੀਏ ਨਾਲ ਬਦਲਿਆ ਨਹੀਂ ਜਾ ਸਕਦਾ। ਉਨ੍ਹਾਂ ਨੇ ਸਵਰਾ ਭਾਸਕਰ ਦੀਆਂ ਟਿੱਪਣੀਆਂ ’ਤੇ ਹੋ ਰਹੀ ਚਰਚਾ ਨੂੰ ਵੀ ਬੇਲੋੜੀ ਦੱਸਦਿਆਂ ਕਿਹਾ ਕਿ ਹਰ ਦਰਸ਼ਕ ਫ਼ਿਲਮ ਨੂੰ ਆਪਣੇ ਨਜ਼ਰੀਏ ਅਤੇ ਮਨੋਦਸ਼ਾ ਅਨੁਸਾਰ ਸਮਝਦਾ ਹੈ। ਉਨ੍ਹਾਂ ਕਿਹਾ ਕਿ ‘ਪਦਮਾਵਤ’ ਨੂੰ ਲੈ ਕੇ ਰਿਲੀਜ਼ ਤੋਂ ਪਹਿਲਾਂ ਵੀ ਵਿਰੋਧ ਹੋਇਆ ਸੀ ਅਤੇ ਲੋਕਾਂ ਨੇ ਫ਼ਿਲਮ ਦੇਖਣ ਤੋਂ ਪਹਿਲਾਂ ਹੀ ਇਸ ’ਤੇ ਇਤਰਾਜ਼ ਜਤਾਉਣੇ ਸ਼ੁਰੂ ਕਰ ਦਿੱਤੇ ਸਨ।
ਸਵਰਾ ਭਾਸਕਰ ਨੇ ਜੌਹਰ ਦ੍ਰਿਸ਼ ’ਤੇ ਕੀ ਕਿਹਾ ਸੀ?
ਹਾਲ ਹੀ ਵਿੱਚ ਦਿੱਲੀ ਦੇ ਇੱਕ ਸਮਾਗਮ ਵਿੱਚ ਸਵਰਾ ਭਾਸਕਰ ਨੇ ‘ਪਦਮਾਵਤ’ ਨਾਲ ਜੁੜੇ ਆਪਣੇ ਪੁਰਾਣੇ ਖੁੱਲ੍ਹੇ ਪੱਤਰ ਅਤੇ ਫ਼ਿਲਮ ਬਾਰੇ ਵਿਚਾਰ ਸਾਂਝੇ ਕੀਤੇ। ਉਨ੍ਹਾਂ ਨੇ ਕਿਹਾ ਕਿ ਫ਼ਿਲਮ ਵਿੱਚ ਸੈਂਕੜੇ ਔਰਤਾਂ ਨੂੰ ਜੌਹਰ ਕਰਦੇ ਦਿਖਾਉਣਾ ਉਨ੍ਹਾਂ ਲਈ ਪਰੇਸ਼ਾਨ ਕਰਨ ਵਾਲਾ ਸੀ। ਸਵਰਾ ਨੇ ਸਵਾਲ ਉਠਾਇਆ ਕਿ ਜੇਕਰ ਕੋਈ ਬਲਾਤਕਾਰ ਤੋਂ ਬਚੀ ਹੋਈ ਔਰਤ ਇਹ ਦ੍ਰਿਸ਼ ਦੇਖੇ ਤਾਂ ਕੀ ਉਹ ਇਹ ਮਹਿਸੂਸ ਕਰੇਗੀ ਕਿ ਇੱਜ਼ਤ ਬਚਾਉਣ ਲਈ ਖੁਦਕੁਸ਼ੀ ਕਰਨਾ ਹੀ ਬਹਾਦਰੀ ਹੈ। ਉਨ੍ਹਾਂ ਕਿਹਾ ਕਿ ਅਜਿਹੀ ਪੇਸ਼ਕਾਰੀ ਸਮਾਜ ਵਿੱਚ ਬਲਾਤਕਾਰ ਤੋਂ ਬਚਣ ਵਾਲੀਆਂ ਔਰਤਾਂ ਨੂੰ ਕੀ ਸੰਦੇਸ਼ ਦਿੰਦੀ ਹੈ, ਇਸ ’ਤੇ ਗੰਭੀਰਤਾ ਨਾਲ ਸੋਚਣ ਦੀ ਲੋੜ ਹੈ। ‘ਪਦਮਾਵਤ’ ਵਿੱਚ ਦੀਪਿਕਾ ਪਾਦੁਕੋਣ, ਰਣਵੀਰ ਸਿੰਘ ਅਤੇ ਸ਼ਾਹਿਦ ਕਪੂਰ ਨੇ ਮੁੱਖ ਭੂਮਿਕਾਵਾਂ ਨਿਭਾਈਆਂ ਸਨ।
