ਮੇਰਠ, 25 ਅਗਸਤ, 2026 (ਰਾਜੇਸ਼ ਕੁਮਾਰ) : ਉੱਤਰ ਪ੍ਰਦੇਸ਼ ਦੇ ਮੇਰਠ ਵਿੱਚ ਯੂਟਿਊਬ ’ਤੇ ਦੇਖੀ ‘ਸੀਕ੍ਰੇਟ ਹਾਊਸ’ ਗੇਮ ਤੋਂ ਪ੍ਰਭਾਵਿਤ ਹੋ ਕੇ ਦੋ ਬੱਚੇ ਘਰੋਂ ਬਿਨਾਂ ਦੱਸੇ ਚਲੇ ਗਏ। 11 ਅਤੇ 7 ਸਾਲ ਦੇ ਦੋਵੇਂ ਭੈਣ-ਭਰਾ ਇੱਕ ਫਾਰਮਹਾਊਸ ਨੇੜੇ ਲੁਕਣ ਦੀ ਜਗ੍ਹਾ ਬਣਾ ਕੇ 24 ਘੰਟਿਆਂ ਦੀ ਚੁਣੌਤੀ ਪੂਰੀ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਸਨ। ਪੁਲਿਸ ਮੁਤਾਬਕ ਦੋਵੇਂ ਬੱਚੇ ਹਸਤਿਨਾਪੁਰ ਦੀ ਬੀ-ਬਲਾਕ ਕਾਲੋਨੀ ਵਿੱਚ ਰਹਿੰਦੇ ਹਨ ਅਤੇ ਐਤਵਾਰ ਦੁਪਹਿਰ ਅਚਾਨਕ ਘਰੋਂ ਲਾਪਤਾ ਹੋ ਗਏ। ਪਰਿਵਾਰ ਨੇ ਪਹਿਲਾਂ ਆਸ-ਪਾਸ ਅਤੇ ਰਿਸ਼ਤੇਦਾਰਾਂ ਕੋਲ ਬੱਚਿਆਂ ਦੀ ਭਾਲ ਕੀਤੀ। ਜਦੋਂ ਕੋਈ ਸੁਰਾਗ ਨਹੀਂ ਮਿਲਿਆ ਤਾਂ ਪੁਲਿਸ ਨੂੰ ਸੂਚਿਤ ਕੀਤਾ ਗਿਆ। ਮਵਾਨਾ ਦੇ ਸਰਕਲ ਅਫਸਰ ਪੰਕਜ ਲਵਾਨੀਆ ਨੇ ਦੱਸਿਆ ਕਿ ਪੁਲਿਸ ਅਤੇ ‘ਮਿਸ਼ਨ ਸ਼ਕਤੀ’ ਟੀਮ ਨੇ ਤੁਰੰਤ ਤਲਾਸ਼ੀ ਮੁਹਿੰਮ ਸ਼ੁਰੂ ਕੀਤੀ। ਲਗਭਗ ਦੋ ਘੰਟਿਆਂ ਦੀ ਕੋਸ਼ਿਸ਼ ਤੋਂ ਬਾਅਦ ਦੋਵੇਂ ਬੱਚਿਆਂ ਨੂੰ ਸੁਰੱਖਿਅਤ ਲੱਭ ਲਿਆ ਗਿਆ ਅਤੇ ਉਨ੍ਹਾਂ ਨੂੰ ਪਰਿਵਾਰ ਹਵਾਲੇ ਕਰ ਦਿੱਤਾ ਗਿਆ। ਪੁੱਛਗਿੱਛ ਦੌਰਾਨ ਬੱਚਿਆਂ ਨੇ ਦੱਸਿਆ ਕਿ ਉਹ ਯੂਟਿਊਬ ’ਤੇ ‘ਸੀਕ੍ਰੇਟ ਹਾਊਸ’ ਗੇਮ ਨਾਲ ਸਬੰਧਤ ਵੀਡੀਓ ਦੇਖ ਰਹੇ ਸਨ। ਵੀਡੀਓ ਤੋਂ ਪ੍ਰਭਾਵਿਤ ਹੋ ਕੇ ਉਨ੍ਹਾਂ ਨੇ ਖੁਦ ਵੀ ਅਜਿਹਾ ਕਰਨ ਦਾ ਫ਼ੈਸਲਾ ਕੀਤਾ ਅਤੇ ਫਾਰਮਹਾਊਸ ਨੇੜੇ ਲੁਕਣ ਲਈ ਥਾਂ ਬਣਾਈ। ਪੁਲਿਸ ਨੇ ਬੱਚਿਆਂ ਨੂੰ ਸੁਰੱਖਿਅਤ ਪਰਿਵਾਰ ਤੱਕ ਪਹੁੰਚਾ ਦਿੱਤਾ। ਇਸ ਘਟਨਾ ਨੇ ਬੱਚਿਆਂ ਵੱਲੋਂ ਆਨਲਾਈਨ ਵੀਡੀਓਜ਼ ਅਤੇ ਚੈਲੇਂਜਾਂ ਦੀ ਨਕਲ ਕਰਨ ਦੇ ਮਾਮਲੇ ਨੂੰ ਲੈ ਕੇ ਮਾਪਿਆਂ ਦੀ ਨਿਗਰਾਨੀ ਦੀ ਮਹੱਤਤਾ ਨੂੰ ਵੀ ਉਜਾਗਰ ਕੀਤਾ ਹੈ।
