ਟੈਕਨੋਲੋਜੀ, 28 ਜੁਲਾਈ, 2026 (ਮਨੋਜ ਵਰਮਾ) : ਚੀਨੀ ਏਆਈ ਲੈਬ ਮੂਨਸ਼ਾਟ ਦੇ ਕਿਮੀ ਕੇ3 ਮਾਡਲ ਦੀ ਚਰਚਾ ਤੋਂ ਬਾਅਦ ਅਮਰੀਕਾ ਦੀਆਂ ਕਈ ਵੱਡੀਆਂ ਟੈਕਨਾਲੋਜੀ ਕੰਪਨੀਆਂ ਨੇ ਓਪਨ-ਵੇਟ (Open-Weight) ਏਆਈ ਮਾਡਲਾਂ ਦੇ ਹੱਕ ਵਿੱਚ ਆਵਾਜ਼ ਬੁਲੰਦ ਕੀਤੀ ਹੈ। ਐਂਥਰਾਪਿਕ ਨੂੰ ਛੱਡ ਕੇ 60 ਤੋਂ ਵੱਧ ਕੰਪਨੀਆਂ ਨੇ 24 ਜੁਲਾਈ ਨੂੰ ਇੱਕ ਸਾਂਝੇ ਖੁੱਲ੍ਹੇ ਪੱਤਰ ‘ਤੇ ਦਸਤਖ਼ਤ ਕਰਦੇ ਹੋਏ ਕਿਹਾ ਕਿ ਅਮਰੀਕਾ ਨੂੰ ਓਪਨ-ਵੇਟ ਏਆਈ ਮਾਡਲਾਂ ਦੇ ਵਿਕਾਸ ਅਤੇ ਉਪਯੋਗ ਨੂੰ ਉਤਸ਼ਾਹਿਤ ਕਰਨਾ ਚਾਹੀਦਾ ਹੈ।
ਪੱਤਰ ਵਿੱਚ ਓਪਨ-ਵੇਟ ਅਤੇ ਕਲੋਜ਼ਡ ਏਆਈ ਮਾਡਲਾਂ ਦੇ ਫਾਇਦਿਆਂ ਅਤੇ ਨੁਕਸਾਨਾਂ ਦਾ ਵਿਸ਼ਲੇਸ਼ਣ ਕੀਤਾ ਗਿਆ। ਕੰਪਨੀਆਂ ਦਾ ਕਹਿਣਾ ਹੈ ਕਿ ਓਪਨ-ਵੇਟ ਮਾਡਲ ਉਪਭੋਗਤਾਵਾਂ ਨੂੰ ਵੱਧ ਆਜ਼ਾਦੀ ਅਤੇ ਲਚਕਤਾ ਪ੍ਰਦਾਨ ਕਰਦੇ ਹਨ। ਇਸ ਨਾਲ ਡਿਵੈਲਪਰ ਅਤੇ ਸੰਸਥਾਵਾਂ ਆਪਣੀਆਂ ਲੋੜਾਂ ਮੁਤਾਬਕ ਏਆਈ ਨੂੰ ਅਨੁਕੂਲ ਬਣਾ ਸਕਦੀਆਂ ਹਨ, ਜਦਕਿ ਕਲੋਜ਼ਡ ਮਾਡਲਾਂ ਵਿੱਚ ਉਪਭੋਗਤਾ ਇੱਕ ਹੀ ਸੇਵਾ ਪ੍ਰਦਾਤਾ ਤੱਕ ਸੀਮਤ ਰਹਿ ਜਾਂਦੇ ਹਨ।
ਹਾਲਾਂਕਿ, ਐਂਥਰਾਪਿਕ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਨੇ ਇਸ ਰੁਖ਼ ਨਾਲ ਅਸਹਿਮਤੀ ਜਤਾਈ ਹੈ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਓਪਨ-ਵੇਟ ਮਾਡਲਾਂ ਨਾਲ ਸਾਈਬਰ ਸੁਰੱਖਿਆ ਅਤੇ ਦੁਰਵਰਤੋਂ ਦੇ ਖ਼ਤਰੇ ਵੱਧ ਸਕਦੇ ਹਨ, ਜਿਸ ਕਾਰਨ ਸਾਵਧਾਨੀ ਨਾਲ ਅੱਗੇ ਵਧਣ ਦੀ ਲੋੜ ਹੈ।
ਏਆਈ ਖੇਤਰ ਵਿੱਚ ਓਪਨ ਅਤੇ ਕਲੋਜ਼ਡ ਮਾਡਲਾਂ ਨੂੰ ਲੈ ਕੇ ਚੱਲ ਰਹੀ ਇਹ ਬਹਿਸ ਭਵਿੱਖ ਵਿੱਚ ਤਕਨਾਲੋਜੀ ਦੇ ਵਿਕਾਸ ਅਤੇ ਇਸ ਦੀ ਨਿਯਮਾਵਲੀ ‘ਤੇ ਅਹਿਮ ਅਸਰ ਪਾ ਸਕਦੀ ਹੈ।
