ਕੁਰੂਕਸ਼ੇਤਰ, 16 ਜੁਲਾਈ: (ਸੰਜੀਵ ਸ਼ਰਮਾ): ਭਾਰਤੀ ਖੇਡ ਪ੍ਰਾਧੀਕਰਨ (SAI) ਦੇ ਸਾਬਕਾ ਚੀਫ਼ ਹਾਕੀ ਕੋਚ ਅਤੇ ਕੁਰੂਕਸ਼ੇਤਰ ਦੇ ਪ੍ਰਸਿੱਧ ਹਾਕੀ ਕੋਚ ਗੁਰਵਿੰਦਰ ਸਿੰਘ ਦਾ ਲੰਬੀ ਬਿਮਾਰੀ ਤੋਂ ਬਾਅਦ ਦੇਹਾਂਤ ਹੋ ਗਿਆ। ਵੀਰਵਾਰ ਨੂੰ ਉਹ ਪੰਚ ਤੱਤ ਵਿੱਚ ਵਿਲੀਨ ਹੋ ਗਏ। ਉਨ੍ਹਾਂ ਦੇ ਦਿਹਾਂਤ ਨਾਲ ਹਰਿਆਣਾ ਦੇ ਖੇਡ ਜਗਤ ਵਿੱਚ ਸੋਗ ਦੀ ਲਹਿਰ ਦੌੜ ਗਈ।
ਸਾਬਕਾ ਰਾਜ ਮੰਤਰੀ ਸੁਭਾਸ਼ ਸੁਧਾ ਨੇ ਉਨ੍ਹਾਂ ਨੂੰ ਪੁਸ਼ਪ ਚੱਕਰ ਭੇਟ ਕਰਕੇ ਸ਼ਰਧਾਂਜਲੀ ਅਰਪਿਤ ਕੀਤੀ। ਇਸ ਮੌਕੇ ਹਾਕੀ ਹਰਿਆਣਾ ਦੇ ਮਹਾਂਸਚਿਵ ਸੁਨੀਲ ਮਲਿਕ, ਓਲੰਪੀਅਨ ਸੁਰਿੰਦਰ ਕੁਮਾਰ ਪਲਾੜ, ਕਈ ਰਾਸ਼ਟਰੀ ਅਤੇ ਅੰਤਰਰਾਸ਼ਟਰੀ ਹਾਕੀ ਖਿਡਾਰੀਆਂ, ਪ੍ਰਸ਼ਾਸਨਿਕ ਅਧਿਕਾਰੀਆਂ ਅਤੇ ਸਮਾਜਿਕ ਸੰਸਥਾਵਾਂ ਦੇ ਨੁਮਾਇੰਦਿਆਂ ਨੇ ਵੀ ਨਮ ਅੱਖਾਂ ਨਾਲ ਅੰਤਿਮ ਵਿਦਾਈ ਦਿੱਤੀ। ਗੁਜਰਾਤ ਦੇ ਸਾਬਕਾ ਕੈਬਨਿਟ ਮੰਤਰੀ ਅਤੇ ਵਿਧਾਇਕ ਕਿਰਿਤ ਸਿੰਘ ਜੀਤੂਭਾ ਰਾਣਾ ਨੇ ਵੀ ਪਰਿਵਾਰ ਨਾਲ ਦੁੱਖ ਸਾਂਝਾ ਕੀਤਾ।
ਸੁਭਾਸ਼ ਸੁਧਾ ਨੇ ਕਿਹਾ ਕਿ ਗੁਰਵਿੰਦਰ ਸਿੰਘ ਨੇ ਆਪਣਾ ਪੂਰਾ ਜੀਵਨ ਹਾਕੀ ਅਤੇ ਖਿਡਾਰੀਆਂ ਦੀ ਤਰੱਕੀ ਲਈ ਸਮਰਪਿਤ ਕਰ ਦਿੱਤਾ। ਉਹ ਆਪਣੀ ਬਿਮਾਰੀ ਦੇ ਆਖਰੀ ਦਿਨਾਂ ਤੱਕ ਵੀ ਖਿਡਾਰੀਆਂ ਦੀ ਚੋਣ ਅਤੇ ਸਿਖਲਾਈ ਸਬੰਧੀ ਸਰਗਰਮ ਰਹੇ। ਹਸਪਤਾਲ ਵਿੱਚ ਇਲਾਜ ਦੌਰਾਨ ਵੀ ਉਨ੍ਹਾਂ ਦੀ ਚਿੰਤਾ ਖਿਡਾਰੀਆਂ ਦੇ ਭਵਿੱਖ ਨੂੰ ਲੈ ਕੇ ਹੀ ਰਹਿੰਦੀ ਸੀ।
ਕੁਰੂਕਸ਼ੇਤਰ ਦੇ ਸੈਕਟਰ-7 ਦੇ ਰਹਿਣ ਵਾਲੇ ਗੁਰਵਿੰਦਰ ਸਿੰਘ ਨੇ ਸਾਲ 1986 ਵਿੱਚ ਭਾਰਤੀ ਖੇਡ ਪ੍ਰਾਧੀਕਰਨ ਵਿੱਚ ਹਾਕੀ ਕੋਚ ਵਜੋਂ ਆਪਣੀ ਸੇਵਾ ਸ਼ੁਰੂ ਕੀਤੀ ਸੀ। ਸਾਲ 2021 ਵਿੱਚ ਉਹ ਸਾਈ ਕੁਰੂਕਸ਼ੇਤਰ ਤੋਂ ਚੀਫ਼ ਹਾਕੀ ਕੋਚ ਵਜੋਂ ਸੇਵਾਮੁਕਤ ਹੋਏ, ਪਰ ਇਸ ਤੋਂ ਬਾਅਦ ਵੀ ਖਿਡਾਰੀਆਂ ਨੂੰ ਸਿਖਲਾਈ ਦੇਣ ਦਾ ਕੰਮ ਜਾਰੀ ਰੱਖਿਆ।
ਆਪਣੇ ਕਰੀਬ 35 ਸਾਲਾਂ ਦੇ ਕੋਚਿੰਗ ਕਰੀਅਰ ਦੌਰਾਨ ਉਨ੍ਹਾਂ ਨੇ ਦੋ ਵਾਰ ਦੇ ਓਲੰਪੀਅਨ ਸੁਰਿੰਦਰ ਪਲਾੜ ਸਮੇਤ ਲਗਭਗ 20 ਅੰਤਰਰਾਸ਼ਟਰੀ ਅਤੇ 100 ਤੋਂ ਵੱਧ ਰਾਸ਼ਟਰੀ ਪੱਧਰ ਦੇ ਖਿਡਾਰੀ ਤਿਆਰ ਕੀਤੇ। ਉਨ੍ਹਾਂ ਦੇ ਮਾਰਗਦਰਸ਼ਨ ਹੇਠ ਓਲੰਪੀਅਨ ਸੁਰਿੰਦਰ ਪਲਾੜ, ਅੰਤਰਰਾਸ਼ਟਰੀ ਖਿਡਾਰੀ ਪ੍ਰਦੀਪ ਮੋਰ, ਜਗਵੰਤ ਸਿੰਘ ਅਤੇ ਜੂਨੀਅਰ ਵਿਸ਼ਵ ਕੱਪ ਜੇਤੂ ਮਨਪ੍ਰੀਤ ਸਿੰਘ ਵਰਗੇ ਕਈ ਪ੍ਰਤਿਭਾਸ਼ਾਲੀ ਖਿਡਾਰੀਆਂ ਨੇ ਦੇਸ਼ ਦਾ ਨਾਮ ਰੌਸ਼ਨ ਕੀਤਾ।
ਗੁਰਵਿੰਦਰ ਸਿੰਘ ਦੇ ਦਿਹਾਂਤ ‘ਤੇ ਡਿਪਟੀ ਕਮਿਸ਼ਨਰ ਵਿਸ਼ਰਾਮ ਕੁਮਾਰ ਮੀਣਾ, ਡੀਆਈਪੀਆਰਓ ਡਾ. ਨਰਿੰਦਰ ਸਿੰਘ, ਡੀਐੱਸਓ ਮਨੋਜ ਕੁਮਾਰ, ਸਾਬਕਾ ਡੀਐੱਸਓ ਯਸ਼ਵੀਰ ਸਿੰਘ, ਸੋਹਣ ਲਾਲ, ਨਰਿੰਦਰ ਠਾਕੁਰ, ਬਲਰਾਜ ਸਿੰਘ ਗਰੇਵਾਲ, ਵਿਨੋਦ ਗਰਗ, ਨਰੇਸ਼ ਕੁਮਾਰ, ਚਾਂਦ ਰਾਮ, ਭਾਜਪਾ ਆਗੂ ਤ੍ਰਿਲੋਚਨ ਸਿੰਘ, ਗੁਰਬਾਜ਼ ਸਿੰਘ ਅਤੇ ਹੋਰ ਕਈ ਖੇਡ ਪ੍ਰੇਮੀਆਂ ਨੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕਰਦਿਆਂ ਸ਼ਰਧਾਂਜਲੀ ਭੇਟ ਕੀਤੀ।
