14 ਜੁਲਾਈ(ਮਨੋਜ ਵਰਮਾ):ਵਿਸ਼ਵ ਕੱਪ ਦੇ ਬਹੁ-ਉਡੀਕੇ ਸੈਮੀਫਾਈਨਲ ਤੋਂ ਪਹਿਲਾਂ ਫਰਾਂਸ ਦੇ ਮੁੱਖ ਕੋਚ ਦਿਦੀਏ ਦੇਸ਼ਾਂਪਸ ਨੇ ਸਪਸ਼ਟ ਕੀਤਾ ਹੈ ਕਿ ਉਨ੍ਹਾਂ ਦੀ ਟੀਮ ਸਪੇਨ ਨੂੰ ਗੇਂਦ ‘ਤੇ ਇਕਪੱਖੀ ਕਬਜ਼ਾ ਨਹੀਂ ਕਰਨ ਦੇਵੇਗੀ। ਉਨ੍ਹਾਂ ਕਿਹਾ ਕਿ ਸਪੇਨ ਭਾਵੇਂ ਪਜ਼ੈਸ਼ਨ ਫੁੱਟਬਾਲ ਲਈ ਮਸ਼ਹੂਰ ਹੈ, ਪਰ ਫਰਾਂਸ ਵੀ ਗੇਂਦ ਆਪਣੇ ਕੋਲ ਰੱਖਣ ਅਤੇ ਹਮਲਾਵਰ ਫੁੱਟਬਾਲ ਖੇਡਣ ਦੀ ਸਮਰੱਥਾ ਰੱਖਦਾ ਹੈ।
ਸੋਮਵਾਰ ਨੂੰ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਦੇਸ਼ਾਂਪਸ ਨੇ ਕਿਹਾ, “ਸਪੇਨ ਵਿਰੋਧੀ ਟੀਮ ‘ਤੇ ਕਾਫ਼ੀ ਦਬਾਅ ਬਣਾਉਂਦਾ ਹੈ, ਪਰ ਅਸੀਂ ਵੀ ਅਜਿਹੀ ਟੀਮ ਹਾਂ ਜੋ ਗੇਂਦ ਆਪਣੇ ਕੋਲ ਰੱਖਣਾ ਚਾਹੁੰਦੀ ਹੈ। ਮੈਚ ਵਿੱਚ ਗੇਂਦ ‘ਤੇ ਕਬਜ਼ੇ ਲਈ ਸਖ਼ਤ ਮੁਕਾਬਲਾ ਹੋਵੇਗਾ।”
ਉਨ੍ਹਾਂ ਇਹ ਵੀ ਪੁਸ਼ਟੀ ਕੀਤੀ ਕਿ ਸਟਾਰ ਫਾਰਵਰਡ ਕਿਲੀਅਨ ਐਮਬਾਪੇ ਸੈਮੀਫਾਈਨਲ ਲਈ ਪੂਰੀ ਤਰ੍ਹਾਂ ਫਿੱਟ ਹਨ ਅਤੇ ਚੋਣ ਲਈ ਉਪਲਬਧ ਰਹਿਣਗੇ।
ਦੂਜੇ ਪਾਸੇ, ਫਰਾਂਸ ਦੇ ਮਿਡਫੀਲਡਰ ਵਾਰਨ ਜ਼ਾਇਰੇ-ਐਮਰੀ ਨੇ ਕਿਹਾ ਕਿ ਟੀਮ ਕੋਲ ਵੱਖ-ਵੱਖ ਅੰਦਾਜ਼ ਨਾਲ ਖੇਡਣ ਦੀ ਸਮਰੱਥਾ ਹੈ। ਉਨ੍ਹਾਂ ਕਿਹਾ, “ਸਪੇਨ ਗੇਂਦ ਨਾਲ ਬੇਹੱਦ ਸ਼ਾਨਦਾਰ ਟੀਮ ਹੈ। ਸਾਡੇ ਕੋਲ ਤੇਜ਼ ਕਾਊਂਟਰ ਅਟੈਕ ਕਰਨ, ਗੇਂਦ ‘ਤੇ ਕਬਜ਼ਾ ਬਣਾਈ ਰੱਖਣ ਅਤੇ ਮਜ਼ਬੂਤ ਰੱਖਿਆ ਕਰਨ ਦੀ ਯੋਗਤਾ ਹੈ। ਮੈਚ ਦਾ ਰੁਖ ਤੈਅ ਕਰੇਗਾ ਕਿ ਅਸੀਂ ਕਿਹੜੀ ਰਣਨੀਤੀ ਅਪਣਾਉਂਦੇ ਹਾਂ।”
ਸੈਮੀਫਾਈਨਲ ਵਿੱਚ ਫੁੱਟਬਾਲ ਪ੍ਰੇਮੀਆਂ ਨੂੰ ਦੋ ਮਜ਼ਬੂਤ ਟੀਮਾਂ ਵਿਚਾਲੇ ਰਣਨੀਤੀ, ਪਜ਼ੈਸ਼ਨ ਅਤੇ ਤੇਜ਼ ਹਮਲਿਆਂ ਨਾਲ ਭਰਪੂਰ ਰੋਮਾਂਚਕ ਮੁਕਾਬਲੇ ਦੀ ਉਮੀਦ ਹੈ।
