ਜਨਹਿਤ ਸਮਿਤੀ ਦੀ ਪਹਿਲ ਨਾਲ ਲੋੜਵੰਦ ਮਹਿਲਾਵਾਂ ਨੂੰ ਰੋਜ਼ਗਾਰ ਦਾ ਮਿਲਿਆ ਰਾਹ, ਸਮਾਜ ਸੇਵਿਕਾਵਾਂ ਨੇ ਕੀਤੀ ਸ਼ਲਾਘਾ
ਪਟਿਆਲਾ: 7 ਜੁਲਾਈ 2026 (ਛਤਰਪਾਲ ਸਿੰਘ): ਰਾਜਪੁਰਾ ਕਾਲੋਨੀ ਦੀਆਂ ਝੁੱਗੀ-ਝੌਂਪੜੀਆਂ ਵਿੱਚ ਜਨਹਿਤ ਸਮਿਤੀ (ਰਜਿ.) ਵੱਲੋਂ ਚਲਾਇਆ ਜਾ ਰਿਹਾ ਮੁਫ਼ਤ ਸਿਲਾਈ-ਕਢਾਈ ਸਿਖਲਾਈ ਕੇਂਦਰ ਲੋੜਵੰਦ ਮਹਿਲਾਵਾਂ ਅਤੇ ਲੜਕੀਆਂ ਲਈ ਸਵੈ-ਨਿਰਭਰਤਾ ਦਾ ਇੱਕ ਸਫ਼ਲ ਮਾਡਲ ਬਣ ਕੇ ਉਭਰ ਰਿਹਾ ਹੈ। ਸਮਾਜ ਸੇਵਿਕਾ ਸੋਨੀਆ ਪੁਰੀ ਨੇ ਕੇਂਦਰ ਦਾ ਦੌਰਾ ਕਰਦਿਆਂ ਕਿਹਾ ਕਿ ਅਜਿਹੇ ਸਿਖਲਾਈ ਕੇਂਦਰ ਖੋਲ੍ਹਣਾ ਸਮਾਜ ਸੇਵਾ ਦਾ ਮਹਾਨ ਕਾਰਜ ਹੈ, ਜੋ ਲੋੜਵੰਦ ਪਰਿਵਾਰਾਂ ਨੂੰ ਆਤਮ-ਨਿਰਭਰ ਬਣਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾ ਰਿਹਾ ਹੈ।
ਅੰਤਰਰਾਸ਼ਟਰੀ ਟੀਵੀ ਐਂਕਰ ਅਤੇ ਲੇਖਿਕਾ ਅਮਰਜੀਤ ਕੌਰ ਸਾਹੀਵਾਲ ਅਤੇ ਜਨਹਿਤ ਸਮਿਤੀ ਦੇ ਸੰਸਥਾਪਕ ਮੈਂਬਰ ਅਨਿਲ ਕੁਮਾਰ ਭਾਰਤੀ ਨਾਲ ਕੇਂਦਰ ਦਾ ਦੌਰਾ ਕਰਨ ਦੌਰਾਨ ਸੋਨੀਆ ਪੁਰੀ ਨੇ ਕਿਹਾ ਕਿ 1987 ਤੋਂ ਸਮਾਜ ਸੇਵਾ ਲਈ ਸਮਰਪਿਤ ਜਨਹਿਤ ਸਮਿਤੀ ਅੱਜ ਵੀ ਨਿਰਧਨ ਅਤੇ ਲੋੜਵੰਦ ਲੋਕਾਂ ਲਈ ਉਮੀਦ ਦੀ ਕਿਰਨ ਬਣੀ ਹੋਈ ਹੈ।
ਇਸ ਮੌਕੇ ਅਮਰਜੀਤ ਕੌਰ ਸਾਹੀਵਾਲ ਨੇ ਸਿਖਲਾਈ ਲੈ ਰਹੀਆਂ ਲੜਕੀਆਂ ਅਤੇ ਮਹਿਲਾਵਾਂ ਨੂੰ ਸਿਲਾਈ-ਕਢਾਈ ਦਾ ਹੁਨਰ ਸਿੱਖ ਕੇ ਆਰਥਿਕ ਤੌਰ ‘ਤੇ ਮਜ਼ਬੂਤ ਬਣਨ ਲਈ ਪ੍ਰੇਰਿਤ ਕੀਤਾ। ਉਨ੍ਹਾਂ ਨੇ ਪਰਿਵਾਰਕ ਕਦਰਾਂ, ਵੱਡਿਆਂ ਦੇ ਸਤਿਕਾਰ, ਮਿਹਨਤ, ਇਮਾਨਦਾਰੀ ਅਤੇ ਨਸ਼ਿਆਂ ਤੋਂ ਦੂਰ ਰਹਿਣ ਦਾ ਸੰਦੇਸ਼ ਵੀ ਦਿੱਤਾ।
ਕੇਂਦਰ ਵਿੱਚ ਸਿਖਲਾਈ ਪ੍ਰਾਪਤ ਕਰ ਰਹੀਆਂ ਮਹਿਲਾਵਾਂ ਨੇ ਦੱਸਿਆ ਕਿ ਇਸ ਕੇਂਦਰ ਨੇ ਉਨ੍ਹਾਂ ਦੀ ਜ਼ਿੰਦਗੀ ਵਿੱਚ ਵੱਡਾ ਬਦਲਾਅ ਲਿਆਇਆ ਹੈ। ਹੁਣ ਉਹ ਆਪਣੇ ਪਰਿਵਾਰ ਦੇ ਕੱਪੜੇ ਖ਼ੁਦ ਸਿਲਣ ਦੇ ਨਾਲ-ਨਾਲ ਹੋਰ ਲੋਕਾਂ ਦੇ ਕੱਪੜੇ ਸਿਲ ਕੇ ਆਮਦਨ ਵੀ ਕਮਾ ਰਹੀਆਂ ਹਨ। ਉਨ੍ਹਾਂ ਨੇ ਕੇਂਦਰ ਦੀ ਅਧਿਆਪਿਕਾ ਦੀ ਵੀ ਪ੍ਰਸ਼ੰਸਾ ਕੀਤੀ, ਜੋ ਸਿਖਲਾਈ ਦੇ ਨਾਲ-ਨਾਲ ਉਨ੍ਹਾਂ ਨੂੰ ਜੀਵਨ ਨਾਲ ਜੁੜੀ ਸਹੀ ਸਲਾਹ ਵੀ ਦਿੰਦੀ ਹੈ।
ਜਨਹਿਤ ਸਮਿਤੀ ਦੇ ਸੰਸਥਾਪਕ ਮੈਂਬਰ ਅਨਿਲ ਕੁਮਾਰ ਭਾਰਤੀ ਨੇ ਦੱਸਿਆ ਕਿ ਸੰਸਥਾ ਸਿਹਤ, ਸਿੱਖਿਆ ਅਤੇ ਹੁਨਰ ਵਿਕਾਸ ਦੇ ਖੇਤਰ ਵਿੱਚ ਲਗਾਤਾਰ ਸੇਵਾ ਨਿਭਾ ਰਹੀ ਹੈ। ਸਮਿਤੀ ਵੱਲੋਂ ਹੁਣ ਤੱਕ ਹਜ਼ਾਰਾਂ ਲੋੜਵੰਦਾਂ ਦਾ ਇਲਾਜ, ਮੁਫ਼ਤ ਮੈਡੀਕਲ ਕੈਂਪ, ਖੂਨਦਾਨ ਕੈਂਪ, ਵਿਦਿਆਰਥੀਆਂ ਨੂੰ ਵਿੱਤੀ ਸਹਾਇਤਾ ਅਤੇ ਮੁਫ਼ਤ ਟ੍ਰੇਨਿੰਗ ਕੇਂਦਰਾਂ ਰਾਹੀਂ ਸੈਂਕੜੇ ਮਹਿਲਾਵਾਂ ਨੂੰ ਰੋਜ਼ਗਾਰ ਦੇ ਯੋਗ ਬਣਾਇਆ ਜਾ ਚੁੱਕਾ ਹੈ।
ਸਮਿਤੀ ਦੇ ਪ੍ਰਧਾਨ ਐਸ. ਕੇ. ਗੌਤਮ ਅਤੇ ਜਨਰਲ ਸਕੱਤਰ ਵਿਨੋਦ ਕੁਮਾਰ ਸ਼ਰਮਾ ਨੇ ਸਮਾਜ ਸੇਵਾ ਦੀ ਸੋਚ ਰੱਖਣ ਵਾਲੇ ਲੋਕਾਂ ਨੂੰ ਜਨਹਿਤ ਸਮਿਤੀ ਨਾਲ ਜੁੜ ਕੇ ਲੋੜਵੰਦਾਂ ਦੀ ਸੇਵਾ ਵਿੱਚ ਆਪਣਾ ਯੋਗਦਾਨ ਪਾਉਣ ਦੀ ਅਪੀਲ ਕੀਤੀ।
