ਨਵੀਂ ਦਿੱਲੀ, 27 ਜੂਨ: ਕੈਲਾਸ਼ ਮਾਨਸਰੋਵਰ ਦੀ ਯਾਤਰਾ ‘ਤੇ ਗਏ ਲਗਭਗ 52 ਭਾਰਤੀ ਨਾਗਰਿਕ ਇਸ ਵੇਲੇ ਨੇਪਾਲ ਦੇ ਕਾਠਮੰਡੂ ਵਿੱਚ ਫਸੇ ਹੋਏ ਹਨ ਅਤੇ ਆਪਣੀ ਅਗਲੀ ਸੁਰੱਖਿਅਤ ਯਾਤਰਾ ਲਈ ਤੁਰੰਤ ਮਦਦ ਦੀ ਮੰਗ ਕਰ ਰਹੇ ਹਨ।
ਇਸ ਮੁੱਦੇ ਨੂੰ ਸ਼ਨੀਵਾਰ ਨੂੰ ਨੈਸ਼ਨਲਿਸਟ ਕਾਂਗਰਸ ਪਾਰਟੀ (ਸ਼ਰਦਚੰਦਰ ਪਵਾਰ) ਦੀ ਸਾਂਸਦ ਸੁਪ੍ਰੀਆ ਸੁਲੇ ਵੱਲੋਂ ਉਠਾਇਆ ਗਿਆ, ਜਿਨ੍ਹਾਂ ਨੇ ਵਿਦੇਸ਼ ਮੰਤਰਾਲੇ ਅਤੇ ਭਾਰਤੀ ਦੂਤਾਵਾਸਾਂ ਨੂੰ ਇਸ ਮਾਮਲੇ ਵਿੱਚ ਦਖਲ ਦੇਣ ਅਤੇ ਫਸੇ ਹੋਏ ਸ਼ਰਧਾਲੂਆਂ ਨੂੰ ਤੁਰੰਤ ਸਹਾਇਤਾ ਪ੍ਰਦਾਨ ਕਰਨ ਦੀ ਅਪੀਲ ਕੀਤੀ ਹੈ।
ਉਨ੍ਹਾਂ ਨੇ ਅੱਗੇ ਲਿਖਿਆ, “ਮੈਂ ਡਾਕਟਰ ਐਸ. ਜੈਸ਼ੰਕਰ, ਕਾਠਮੰਡੂ (ਨੇਪਾਲ) ਸਥਿਤ ਭਾਰਤੀ ਦੂਤਾਵਾਸ, ਬੀਜਿੰਗ (ਚੀਨ) ਸਥਿਤ ਭਾਰਤੀ ਦੂਤਾਵਾਸ ਅਤੇ ਭਾਰਤ ਦੇ ਵਿਦੇਸ਼ ਮੰਤਰਾਲੇ ਨੂੰ ਬੇਨਤੀ ਕਰਦੀ ਹਾਂ ਕਿ ਉਹ ਕਿਰਪਾ ਕਰਕੇ ਇਸ ਮਾਮਲੇ ਵੱਲ ਧਿਆਨ ਦੇਣ ਅਤੇ ਸ਼ਰਧਾਲੂਆਂ ਦੀ ਅਗਲੀ ਯਾਤਰਾ ਨੂੰ ਸੁਰੱਖਿਅਤ ਬਣਾਉਣ ਲਈ ਹਰ ਸੰਭਵ ਸਹਾਇਤਾ ਪ੍ਰਦਾਨ ਕਰਨ।”
ਦੱਸ ਦੇਈਏ ਕਿ 20 ਜੂਨ ਨੂੰ ਕੈਲਾਸ਼ ਮਾਨਸਰੋਵਰ ਯਾਤਰਾ 2026 ‘ਤੇ ਜਾਣ ਵਾਲੇ ਸ਼ਰਧਾਲੂਆਂ ਦਾ ਪਹਿਲਾ ਜੱਥਾ ਨਾਥੂ ਲਾ ਪਾਸ ਰਾਹੀਂ ਭਾਰਤ-ਚੀਨ ਸਰਹੱਦ ਪਾਰ ਕਰਕੇ ਚੀਨ ਵਿੱਚ ਦਾਖਲ ਹੋਇਆ ਸੀ।
ਇਸ ਜੱਥੇ ਨੂੰ ਸਿੱਕਮ ਦੇ ਰਾਜਪਾਲ ਓਮ ਪ੍ਰਕਾਸ਼ ਮਾਥੁਰ ਨੇ ਸੈਰ-ਸਪਾਟਾ ਮੰਤਰੀ ਸ਼ੇਰਿੰਗ ਥੈਂਦੁਪ ਭੂਟੀਆ ਅਤੇ ਸਿੱਕਮ ਸੈਰ-ਸਪਾਟਾ ਵਿਕਾਸ ਨਿਗਮ (STDC) ਦੇ ਅਧਿਕਾਰੀਆਂ ਦੀ ਮੌਜੂਦਗੀ ਵਿੱਚ ਹਰੀ ਝੰਡੀ ਦਿਖਾ ਕੇ ਰਵਾਨਾ ਕੀਤਾ ਸੀ। ਓਮ ਪ੍ਰਕਾਸ਼ ਮਾਥੁਰ ਨੇ ਕਿਹਾ ਸੀ, “ਇਹ ਯਾਤਰਾ ਪੰਜ ਸਾਲਾਂ ਲਈ ਮੁਲਤਵੀ ਰਹੀ ਸੀ ਪਰ ਪਿਛਲੇ ਸਾਲ ਦੁਬਾਰਾ ਸ਼ੁਰੂ ਹੋਈ। ਇਹ ਮੇਰੀ ਖੁਸ਼ਕਿਸਮਤੀ ਹੈ ਕਿ ਮੈਨੂੰ ਉਦੋਂ ਵੀ ਪਹਿਲੇ ਜੱਥੇ ਨੂੰ ਹਰੀ ਝੰਡੀ ਦਿਖਾਉਣ ਦਾ ਮੌਕਾ ਮਿਲਿਆ ਸੀ।”
ਰਾਜਪਾਲ ਨੇ ਸਥਿਤੀ ਵਿੱਚ ਆਏ ਸੁਧਾਰ ਨੂੰ ਸਵੀਕਾਰ ਕਰਦਿਆਂ ਕਿਹਾ, “ਪਹਿਲਾਂ ਕੁਝ ਗਲਤਫਹਿਮੀਆਂ ਸਨ, ਪਰ ਬਾਅਦ ਵਿੱਚ ਉਨ੍ਹਾਂ ਨੇ ਸਬੰਧਾਂ ਨੂੰ ਆਮ ਬਣਾਉਣ ਦੀ ਲੋੜ ਅਤੇ ਸਥਿਤੀ ਨੂੰ ਸਮਝਿਆ। ਯਾਤਰਾ ਦੁਬਾਰਾ ਸ਼ੁਰੂ ਹੋਈ, ਅਤੇ ਮੈਂ ਉਨ੍ਹਾਂ ਦਾ ਅਤੇ ਇੱਥੋਂ ਦੀ ਸਥਾਨਕ ਸਰਕਾਰ ਦਾ ਇਸ ਯਾਤਰਾ ਲਈ ਇੰਨੇ ਵਧੀਆ ਪ੍ਰਬੰਧ ਕਰਨ ਲਈ ਧੰਨਵਾਦ ਕਰਦਾ ਹਾਂ।”
ਸਿੱਕਮ ਦੇ ਸੈਰ-ਸਪਾਟਾ ਮੰਤਰੀ ਟੀ.ਟੀ. ਭੂਟੀਆ ਨੇ ਯਾਤਰਾ ਦੀ ਰੂਪ-ਰੇਖਾ ਬਾਰੇ ਦੱਸਦਿਆਂ ਕਿਹਾ, “ਇਸ ਸਾਲ ਸਾਨੂੰ ਅਜਿਹੇ ਘੱਟੋ-ਘੱਟ ਦਸ ਜੱਥਿਆਂ ਦੇ ਯਾਤਰਾ ‘ਤੇ ਜਾਣ ਦੀ ਉਮੀਦ ਹੈ, ਜਿਵੇਂ ਕਿ ਅਸੀਂ ਪਿਛਲੇ ਸਾਲ ਦਸ ਜੱਥਿਆਂ ਦਾ ਪ੍ਰਬੰਧ ਕੀਤਾ ਸੀ। ਉਹ 30 ਤਾਰੀਖ਼ ਨੂੰ ਸਰਹੱਦ ‘ਤੇ ਵਾਪਸ ਪਰਤਣ ਵਾਲੇ ਹਨ। ਮੈਂ ਇਹ ਦੱਸਣਾ ਚਾਹੁੰਦਾ ਹਾਂ ਕਿ ਘੱਟੋ-ਘੱਟ ਪੰਜ ਸਾਲਾਂ ਦੇ ਵਕਫੇ ਤੋਂ ਬਾਅਦ ਇਸ ਯਾਤਰਾ ਦਾ ਦੁਬਾਰਾ ਸ਼ੁਰੂ ਹੋਣਾ ਸਿੱਕਮ ਦੇ ਸੈਰ-ਸਪਾਟੇ ਵਿੱਚ ਵੱਡਾ ਵਾਧਾ ਕਰ ਰਿਹਾ ਹੈ।”
ਵਿਦੇਸ਼ ਮੰਤਰਾਲਾ ਹਰ ਸਾਲ ਜੂਨ ਤੋਂ ਅਗਸਤ/ਸਤੰਬਰ ਦੌਰਾਨ ਦੋ ਵੱਖ-ਵੱਖ ਰੂਟਾਂ – ਲਿਪੁਲੇਖ ਪਾਸ (ਉੱਤਰਾਖੰਡ) ਅਤੇ ਨਾਥੂ ਲਾ ਪਾਸ (ਸਿੱਕਮ) ਰਾਹੀਂ ਕੈਲਾਸ਼ ਮਾਨਸਰੋਵਰ ਯਾਤਰਾ ਦਾ ਆਯੋਜਨ ਕਰਦਾ ਹੈ। ਕੈਲਾਸ਼ ਮਾਨਸਰੋਵਰ ਯਾਤਰਾ (KMY) ਆਪਣੀ ਧਾਰਮਿਕ ਮਾਨਤਾ ਅਤੇ ਸੱਭਿਆਚਾਰਕ ਮਹੱਤਤਾ ਲਈ ਜਾਣੀ ਜਾਂਦੀ ਹੈ। ਹਰ ਸਾਲ ਸੈਂਕੜੇ ਲੋਕਾਂ ਵੱਲੋਂ ਇਹ ਯਾਤਰਾ ਕੀਤੀ ਜਾਂਦੀ ਹੈ। ਹਿੰਦੂਆਂ ਲਈ ਭਗਵਾਨ ਸ਼ਿਵ ਦਾ ਨਿਵਾਸ ਅਸਥਾਨ ਹੋਣ ਕਰਕੇ ਇਸ ਦਾ ਵਿਸ਼ੇਸ਼ ਧਾਰਮਿਕ ਮਹੱਤਵ ਹੈ, ਅਤੇ ਇਹ ਜੈਨ ਤੇ ਬੁੱਧ ਧਰਮ ਦੇ ਲੋਕਾਂ ਲਈ ਵੀ ਬਹੁਤ ਮਹੱਤਵਪੂਰਨ ਹੈ। ਇਹ ਯਾਤਰਾ ਉਨ੍ਹਾਂ ਯੋਗ ਭਾਰਤੀ ਨਾਗਰਿਕਾਂ ਲਈ ਖੁੱਲ੍ਹੀ ਹੈ ਜਿਨ੍ਹਾਂ ਕੋਲ ਵੈਧ ਭਾਰਤੀ ਪਾਸਪੋਰਟ ਹੈ ਅਤੇ ਉਹ ਧਾਰਮਿਕ ਉਦੇਸ਼ਾਂ ਲਈ ਕੈਲਾਸ਼-ਮਾਨਸਰੋਵਰ ਜਾਣਾ ਚਾਹੁੰਦੇ ਹਨ।
