ਮੁੱਖ ਸਕੱਤਰ ਸ੍ਰੀ ਅਨੁਰਾਗ ਰਸਤੋਗੀ ਵੱਲੋਂ ਨੋਟੀਫਿਕੇਸ਼ਨ ਜਾਰੀ
ਚੰਡੀਗੜ੍ਹ, 18 ਜੂਨ: (ਸੰਜੀਵ ਸਿੰਗਲਾ): ਹਰਿਆਣਾ ਵਿੱਚ ਹੁਣ ਸਰਕਾਰੀ ਦਫ਼ਤਰਾਂ ਦੇ ਗੇੜੇ ਮਾਰਨ ਤੋਂ ਜਨਤਾ ਨੂੰ ਵੱਡੀ ਰਾਹਤ ਮਿਲਣ ਜਾ ਰਹੀ ਹੈ। ਸੂਬਾ ਸਰਕਾਰ ਨੇ ਪ੍ਰਸ਼ਾਸਨਿਕ ਸੁਧਾਰਾਂ ਵੱਲ ਇੱਕ ਵੱਡਾ ਕਦਮ ਚੁੱਕਦੇ ਹੋਏ ਗ੍ਰਹਿ ਵਿਭਾਗ ਦੀਆਂ 33 ਅਹਿਮ ਸੇਵਾਵਾਂ ਨੂੰ ‘ਹਰਿਆਣਾ ਸੇਵਾ ਦਾ ਅਧਿਕਾਰ ਐਕਟ, 2014’ (Right to Service Act) ਦੇ ਦਾਇਰੇ ਵਿੱਚ ਲਿਆ ਦਿੱਤਾ ਹੈ। ਮੁੱਖ ਸਕੱਤਰ ਸ੍ਰੀ ਅਨੁਰਾਗ ਰਸਤੋਗੀ ਵੱਲੋਂ ਜਾਰੀ ਨੋਟੀਫਿਕੇਸ਼ਨ ਅਨੁਸਾਰ, ਇਨ੍ਹਾਂ ਸਾਰੀਆਂ ਸੇਵਾਵਾਂ ਲਈ ਦਿਨ ਨਿਰਧਾਰਤ ਕਰ ਦਿੱਤੇ ਗਏ ਹਨ ਤਾਂ ਜੋ ਨਾਗਰਿਕਾਂ ਨੂੰ ਪਾਰਦਰਸ਼ੀ ਅਤੇ ਸਮਾਂਬੱਧ ਤਰੀਕੇ ਨਾਲ ਸੁਵਿਧਾਵਾਂ ਮਿਲ ਸਕਣ।
ਜੇਕਰ ਅਧਿਕਾਰੀ ਤੈਅ ਸਮੇਂ ਦੇ ਅੰਦਰ ਕੰਮ ਨਹੀਂ ਕਰਨਗੇ, ਤਾਂ ਜਨਤਾ ਕੋਲ ਸ਼ਿਕਾਇਤ ਨਿਵਾਰਨ ਅਥਾਰਟੀ ਦੇ ਸਾਹਮਣੇ ਅਪੀਲ ਕਰਨ ਦਾ ਅਧਿਕਾਰ ਹੋਵੇਗਾ।
ਕਿਸ ਕੰਮ ਲਈ ਕਿੰਨਾ ਸਮਾਂ? (ਮੁੱਖ ਸੇਵਾਵਾਂ ਦੀ ਸੂਚੀ)
ਸਰਕਾਰ ਵੱਲੋਂ ਜਾਰੀ ਨਵੇਂ ਨਿਯਮਾਂ ਮੁਤਾਬਕ ਵੱਖ-ਵੱਖ ਸੇਵਾਵਾਂ ਲਈ ਹੇਠ ਲਿਖੇ ਅਨੁਸਾਰ ਸਮਾਂ-ਸੀਮਾ ਤੈਅ ਕੀਤੀ ਗਈ ਹੈ:
1. ਤੁਰੰਤ ਮਿਲਣ ਵਾਲੀਆਂ ਸੇਵਾਵਾਂ
ਐਫ.ਆਈ.ਆਰ. (FIR) ਜਾਂ ਡੀ.ਡੀ.ਰ. (DDR) ਦੀ ਕਾਪੀ: ਇਹ ਸੇਵਾ ਤੁਰੰਤ ਆਨਲਾਈਨ ਜਾਂ ਆਫਲਾਈਨ ਮਿਲੇਗੀ।
ਵਿਦੇਸ਼ੀਆਂ ਦੀ ਰਜਿਸਟ੍ਰੇਸ਼ਨ: ਆਗਮਨ ਅਤੇ ਪ੍ਰਸਥਾਨ ਦੀ ਪ੍ਰਕਿਰਿਆ ਮੌਕੇ ‘ਤੇ ਹੀ ਪੂਰੀ ਕੀਤੀ ਜਾਵੇਗੀ।
2. 5 ਤੋਂ 7 ਦਿਨਾਂ ਦੇ ਅੰਦਰ (ਹਫ਼ਤੇ ਭਰ ਵਿੱਚ)
7 ਦਿਨ: ਹਥਿਆਰ ਲਾਇਸੰਸ ਵਿੱਚ ਨਵਾਂ ਹਥਿਆਰ ਜੋੜਨਾ/ਹਟਾਉਣਾ, ਹਥਿਆਰ ਖਰੀਦਣ ਦੀ ਮਿਆਦ ਵਧਾਉਣਾ ਅਤੇ ਜਲੂਸ, ਹੜਤਾਲ ਜਾਂ ਸੱਭਿਆਚਾਰਕ ਪ੍ਰੋਗਰਾਮਾਂ ਦੀ ਮਨਜ਼ੂਰੀ।
5 ਦਿਨ: ਲਾਊਡਸਪੀਕਰ ਦੀ ਵਰਤੋਂ, ਮੇਲੇ/ਪ੍ਰਦਰਸ਼ਨੀ ਲਈ NOC, ਪੁਰਾਣੇ ਵਾਹਨਾਂ ਦੀ NOC, ਅਤੇ ਵਿਦੇਸ਼ੀਆਂ ਦੇ ਰਿਹਾਇਸ਼ੀ ਪਰਮਿਟ ਦਾ ਵਿਸਤਾਰ।
3. 15 ਤੋਂ 25 ਦਿਨਾਂ ਦੇ ਅੰਦਰ
15 ਦਿਨ: ਹਥਿਆਰ ਲਾਇਸੰਸ ਦਾ ਨਵੀਨੀਕਰਨ (ਜੇਕਰ ਮਿਆਦ ਖ਼ਤਮ ਨਾ ਹੋਈ ਹੋਵੇ) ਅਤੇ ਪੈਟਰੋਲ ਪੰਪ ਜਾਂ ਸਿਨੇਮਾ ਹਾਲ ਦੀ ਸਥਾਪਨਾ ਲਈ NOC।
21 ਦਿਨ: ਕਿਰਾਏਦਾਰ, ਘਰੇਲੂ ਸਹਾਇਕ (ਨੌਕਰ), ਅਤੇ ਕਰਮਚਾਰੀਆਂ ਦੀ ਵੈਰੀਫਿਕੇਸ਼ਨ, ਚਰਿੱਤਰ ਸਰਟੀਫਿਕੇਟ (Character Certificate), ਅਤੇ ਪੁਲਿਸ ਕਲੀਅਰੈਂਸ ਸਰਟੀਫਿਕੇਟ (PCC)।
22 ਦਿਨ: ਹਥਿਆਰ ਲਾਇਸੰਸ ਦੇ ਨਵੀਨੀਕਰਨ ਲਈ ਪੁਲਿਸ ਵੈਰੀਫਿਕੇਸ਼ਨ ਦੀ ਪ੍ਰਕਿਰਿਆ (6 ਸਾਲ ਦੇ ਚੱਕਰ ਤੋਂ ਬਾਅਦ)।
25 ਦਿਨ: ਸਿਨੇਮਾ ਲਾਇਸੰਸ ਦੇ ਨਵੀਨੀਕਰਨ ਦੀ ਪ੍ਰਕਿਰਿਆ।
4. 30 ਤੋਂ 60 ਦਿਨਾਂ ਦੇ ਅੰਦਰ
30 ਦਿਨ: ਨਵਾਂ ਸਿਨੇਮਾ ਲਾਇਸੰਸ ਜਾਰੀ ਕਰਨਾ, ਪੈਟਰੋਲ/ਆਤਿਸ਼ਬਾਜ਼ੀ ਦੇ ਭੰਡਾਰਨ ਦੀ NOC, ਸਾਈਬਰ ਕੈਫੇ ਅਤੇ ਹੋਟਲ ਸੰਚਾਲਕਾਂ/ਗਾਹਕਾਂ ਦੀ ਰਜਿਸਟ੍ਰੇਸ਼ਨ ਵੈਰੀਫਿਕੇਸ਼ਨ।
60 ਦਿਨ: ਆਨਲਾਈਨ ਸ਼ਿਕਾਇਤਾਂ ਦਾ ਨਿਪਟਾਰਾ ਅਤੇ ਨਿੱਜੀ ਸੁਰੱਖਿਆ ਏਜੰਸੀ (Private Security Agency) ਦੀ ਵੈਰੀਫਿਕੇਸ਼ਨ।
