ਕਰਨਾਲ,9 ਜੂਨ (ਸੰਜੀਵ ਸ਼ਰਮਾ): ਹਰਿਆਣਾ ਦੇ ਕਰਨਾਲ ਜ਼ਿਲ੍ਹੇ ਦੇ ਪਿੰਡ ਬਾਲ-ਬਾਲਰਾਗੜਾਨ ਵਿੱਚ ਉਸ ਵੇਲੇ ਮਾਤਮ ਛਾ ਗਿਆ, ਜਦੋਂ ਅਮਰੀਕਾ ਵਿੱਚ ਇੱਕ ਸੜਕ ਹਾਦਸੇ ਦੌਰਾਨ ਜਾਨ ਗਵਾਉਣ ਵਾਲੇ 24 ਸਾਲਾ ਗੌਰਵ ਦੀ ਮ੍ਰਿਤਕ ਦੇਹ ਬੀਤੇ ਦਿਨ ਉਸ ਦੇ ਜੱਦੀ ਪਿੰਡ ਪਹੁੰਚੀ। ਜਦੋਂ ਇਕਲੌਤੇ ਪੁੱਤ ਦੀ ਲਾਸ਼ ਘਰ ਦੇ ਵਿਹੜੇ ਵਿੱਚ ਰੱਖੀ ਗਈ, ਤਾਂ ਮਾਂ ਅਤੇ ਭੈਣ ਬੇਸੁੱਧ ਹੋ ਕੇ ਡਿੱਗ ਪਈਆਂ। ਅੰਤਿਮ ਦਰਸ਼ਨਾਂ ਤੋਂ ਬਾਅਦ ਹਿੰਦੂ ਰੀਤੀ-ਰਿਵਾਜਾਂ ਅਨੁਸਾਰ ਪਿੰਡ ਦੇ ਸ਼ਮਸ਼ਾਨਘਾਟ ਵਿਖੇ ਗੌਰਵ ਦਾ ਅੰਤਿਮ ਸਸਕਾਰ ਕਰ ਦਿੱਤਾ ਗਿਆ, ਜਿੱਥੇ ਰੋਦੇ-ਕੁਰਲਾਉਂਦੇ ਪਿਤਾ ਨੇ ਆਪਣੇ ਪੁੱਤ ਨੂੰ ਮੁਖਾਗਨੀ ਦਿੱਤੀ।
50 ਲੱਖ ਲਗਾ ਕੇ ‘ਡੰਕੀ’ ਰੂਟ ਰਾਹੀਂ ਗਿਆ ਸੀ ਅਮਰੀਕਾ
ਪਰਿਵਾਰਕ ਮੈਂਬਰਾਂ ਨੇ ਦੱਸਿਆ ਕਿ ਗੌਰਵ ਪਰਿਵਾਰ ਦੀ ਆਰਥਿਕ ਸਥਿਤੀ ਨੂੰ ਮਜ਼ਬੂਤ ਕਰਨ ਲਈ ਦੋ ਸਾਲ ਪਹਿਲਾਂ ਅਮਰੀਕਾ ਗਿਆ ਸੀ। ਪਿਤਾ ਰਾਮਫਲ ਨੇ ਦੱਸਿਆ ਕਿ ਉਨ੍ਹਾਂ ਨੇ ਗੌਰਵ ਨੂੰ ਬਹੁਤ ਰੋਕਿਆ ਸੀ, ਪਰ ਉਹ ਨਹੀਂ ਮੰਨਿਆ।
-
ਪੁੱਤਰ ਨੂੰ ਅਮਰੀਕਾ ਭੇਜਣ ਲਈ ਪਿਤਾ ਨੇ ਆਪਣੇ ਜ਼ਮੀਨ ਦਾ ਇੱਕ ਪਲਾਟ ਅਤੇ ਇੱਕ ਦੁਕਾਨ ਵੇਚ ਦਿੱਤੀ ਸੀ।
-
ਲਗਭਗ 50 ਲੱਖ ਰੁਪਏ ਖਰਚ ਕਰਕੇ ਗੌਰਵ 6 ਮਹੀਨਿਆਂ ਦੀ ਖ਼ਤਰਨਾਕ ਯਾਤਰਾ ਤੋਂ ਬਾਅਦ ‘ਡੰਕੀ’ (ਗੈਰ-ਕਾਨੂੰਨੀ ਰੂਟ) ਰਾਹੀਂ ਅਮਰੀਕਾ ਪਹੁੰਚਿਆ ਸੀ।
ਲਾਸ਼ ਘਰ ਲਿਆਉਣ ‘ਤੇ ਆਇਆ 25 ਲੱਖ ਦਾ ਖਰਚਾ
ਪਰਿਵਾਰ ਨੇ ਦੱਸਿਆ ਕਿ ਗੌਰਵ ਦੀ ਮ੍ਰਿਤਕ ਦੇਹ ਨੂੰ ਅਮਰੀਕਾ ਤੋਂ ਭਾਰਤ ਵਾਪਸ ਲਿਆਉਣ ਵਿੱਚ ਹੀ 25 ਲੱਖ ਰੁਪਏ ਤੋਂ ਵੱਧ ਦਾ ਖਰਚਾ ਆਇਆ ਹੈ। ਪਰਿਵਾਰ ਵੱਲੋਂ ਸਰਕਾਰ ਅਤੇ ਪ੍ਰਸ਼ਾਸਨ ਨੂੰ ਮਦਦ ਦੀ ਗੁਹਾਰ ਲਗਾਈ ਗਈ ਸੀ, ਜਿਸ ਤੋਂ ਬਾਅਦ ਪਿੰਡ ਵਾਸੀਆਂ ਅਤੇ ਅਮਰੀਕਾ ਵਿੱਚ ਰਹਿਣ ਵਾਲੇ ਪ੍ਰਵਾਸੀ ਭਾਰਤੀਆਂ (NRIs) ਦੇ ਆਰਥਿਕ ਸਹਿਯੋਗ ਸਦਕਾ ਲਾਸ਼ ਨੂੰ ਵਾਪਸ ਲਿਆਂਦਾ ਜਾ ਸਕਿਆ।
ਕਿਵੇਂ ਹੋਇਆ ਹਾਦਸਾ? ਲਗਭਗ 13 ਦਿਨ ਪਹਿਲਾਂ ਪਰਿਵਾਰ ਨੂੰ ਅਮਰੀਕਾ ਤੋਂ ਇੱਕ ਫੋਨ ਆਇਆ, ਜਿਸ ਨੇ ਉਨ੍ਹਾਂ ਦੀ ਦੁਨੀਆ ਉਜਾੜ ਦਿੱਤੀ। ਕੈਲੀਫੋਰਨੀਆ ਵਿੱਚ ਗੌਰਵ ਦਾ ਟਰੱਕ ਬੇਕਾਬੂ ਹੋ ਕੇ ਇੱਕ ਡੂੰਘੀ ਖੱਡ ਵਿੱਚ ਡਿੱਗ ਗਿਆ ਸੀ, ਜਿਸ ਕਾਰਨ ਉਸ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ।
