ਵ੍ਰਿੰਦਾਵਨ, 3ਜੂਨ (ਹਰਸ਼ਪ੍ਰੀਤ ਕੌਰ): ਇੰਡੀਅਨ ਪ੍ਰੀਮੀਅਰ ਲੀਗ (IPL) ਦਾ ਵੱਕਾਰੀ ਖ਼ਿਤਾਬ ਆਪਣੇ ਨਾਮ ਕਰਨ ਤੋਂ ਤੁਰੰਤ ਬਾਅਦ ਭਾਰਤੀ ਕ੍ਰਿਕਟ ਟੀਮ ਦੇ ਸਟਾਰ ਬੱਲੇਬਾਜ਼ ਵਿਰਾਟ ਕੋਹਲੀ ਅਧਿਆਤਮਕ ਰੰਗ ਵਿੱਚ ਰੰਗੇ ਨਜ਼ਰ ਆਏ। ਵਿਰਾਟ ਕੋਹਲੀ ਆਪਣੀ ਪਤਨੀ ਅਤੇ ਬਾਲੀਵੁੱਡ ਅਦਾਕਾਰਾ ਅਨੁਸ਼ਕਾ ਸ਼ਰਮਾ ਦੇ ਨਾਲ ਉੱਤਰ ਪ੍ਰਦੇਸ਼ ਦੇ ਵ੍ਰਿੰਦਾਵਨ ਵਿਖੇ ਪ੍ਰਸਿੱਧ ਸੰਤ ਪੂਜਨੀਕ ਸ਼੍ਰੀ ਹਿਤ ਪ੍ਰੇਮਾਨੰਦ ਗੋਵਿੰਦ ਸ਼ਰਨ ਜੀ ਮਹਾਰਾਜ ਦੇ ਆਸ਼ਰਮ ਵਿੱਚ ਆਸ਼ੀਰਵਾਦ ਲੈਣ ਪਹੁੰਚੇ। ਇਸ ਦੌਰਾਨ ਸੋਸ਼ਲ ਮੀਡੀਆ ‘ਤੇ ਦੋਵਾਂ ਦੀਆਂ ਸਾਦਗੀ ਭਰੀਆਂ ਤਸਵੀਰਾਂ ਅਤੇ ਵੀਡੀਓਜ਼ ਤੇਜ਼ੀ ਨਾਲ ਵਾਇਰਲ ਹੋ ਰਹੀਆਂ ਹਨ।
ਆਸ਼ਰਮ ਵਿੱਚ ਨੰਗੇ ਪੈਰੀਂ ਨਜ਼ਰ ਆਇਆ ‘ਵਿਰੁਸ਼ਕਾ’
ਆਸ਼ਰਮ ਤੋਂ ਸਾਹਮਣੇ ਆਈਆਂ ਤਸਵੀਰਾਂ ਵਿੱਚ ਵਿਰਾਟ ਕੋਹਲੀ ਅਤੇ ਅਨੁਸ਼ਕਾ ਸ਼ਰਮਾ ਬੇਹੱਦ ਸਾਧਾਰਨ ਪਹਿਰਾਵੇ ਵਿੱਚ ਦੇਖੇ ਗਏ। ਦੋਵੇਂ ਸਟਾਰ ਸੈਲੀਬ੍ਰਿਟੀਜ਼ ਵ੍ਰਿੰਦਾਵਨ ਆਸ਼ਰਮ ਦੀ ਪਵਿੱਤਰ ਧਰਤੀ ‘ਤੇ ਬਿਨਾਂ ਜੁੱਤੀ-ਚੱਪਲ ਦੇ ਬਿਲਕੁਲ ਨੰਗੇ ਪੈਰੀਂ ਚੱਲਦੇ ਹੋਏ ਨਜ਼ਰ ਆਏ। ਉਨ੍ਹਾਂ ਦੀ ਇਸ ਅਥਾਹ ਸ਼ਰਧਾ ਅਤੇ ਸਾਦਗੀ ਨੇ ਦੇਸ਼-ਵਿਦੇਸ਼ ਵਿੱਚ ਬੈਠੇ ਲੱਖਾਂ ਪ੍ਰਸ਼ੰਸਕਾਂ ਦਾ ਦਿਲ ਜਿੱਤ ਲਿਆ ਹੈ।
ਸੰਤ ਪ੍ਰੇਮਾਨੰਦ ਜੀ ਦਾ ਲਿਆ ਆਸ਼ੀਰਵਾਦ
ਦਰਬਾਰ ਵਿੱਚ ਹੋਈ ਅਧਿਆਤਮਕ ਚਰਚਾ: ਵਿਰਾਟ ਅਤੇ ਅਨੁਸ਼ਕਾ ਨੇ ਪ੍ਰੇਮਾਨੰਦ ਜੀ ਮਹਾਰਾਜ ਦੇ ਸਾਹਮਣੇ ਜ਼ਮੀਨ ‘ਤੇ ਬੈਠ ਕੇ ਉਨ੍ਹਾਂ ਦੇ ਪ੍ਰਵਚਨ ਸੁਣੇ ਅਤੇ ਹੱਥ ਜੋੜ ਕੇ ਉਨ੍ਹਾਂ ਦਾ ਅਸ਼ੀਰਵਾਦ ਲਿਆ। ਮਹਾਰਾਜ ਜੀ ਵੱਲੋਂ ਦੋਵਾਂ ਨੂੰ ਰਾਧਾ ਨਾਮ ਦੀ ਚੁੰਨੀ ਅਤੇ ਪ੍ਰਸਾਦ ਭੇਟ ਕਰਕੇ ਅਸ਼ੀਰਵਾਦ ਦਿੱਤਾ ਗਿਆ।
