ਸਮਾਣਾ/ਪਟਿਆਲਾ, 3ਜੂਨ (ਹਰਸ਼ਪ੍ਰੀਤ ਕੌਰ): ਸਮਾਣਾ ਬਲਾਕ ਦੇ ਅਧੀਨ ਆਉਂਦੇ ਪਿੰਡ ਬੀਬੀਪੁਰ ਵਿੱਚ ਮਸਜਿਦ ਦੇ ਨਿਰਮਾਣ ਅਤੇ ਕੰਧ ਕੱਢਣ ਨੂੰ ਲੈ ਕੇ ਦੋ ਭਾਈਚਾਰਿਆਂ ਵਿਚਾਲੇ ਵਿਵਾਦ ਖੜ੍ਹਾ ਹੋਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਸ ਮਸਲੇ ਕਾਰਨ ਪਿੰਡ ਵਿੱਚ ਫਿਲਹਾਲ ਤਣਾਅਪੂਰਨ ਮਾਹੌਲ ਬਣਿਆ ਹੋਇਆ ਹੈ, ਪਰ ਰਾਹਤ ਦੀ ਗੱਲ ਇਹ ਹੈ ਕਿ ਦੋਵਾਂ ਹੀ ਧਿਰਾਂ ਦੇ ਮੋਹਤਬਰਾਂ ਨੇ ਆਪਸੀ ਸਾਂਝ ਤੇ ਭਾਈਚਾਰਾ ਬਰਕਰਾਰ ਰੱਖਣ ਦੀ ਗੱਲ ਆਖਦਿਆਂ ਪ੍ਰਸ਼ਾਸਨ ਤੋਂ ਜਲਦ ਹੱਲ ਦੀ ਮੰਗ ਕੀਤੀ ਹੈ।
ਕੀ ਹੈ ਪੂਰਾ ਮਾਮਲਾ ਅਤੇ ਵਿਵਾਦ ਦੀ ਵਜ੍ਹਾ?
ਪਿੰਡ ਬੀਬੀਪੁਰ ਵਿੱਚ ਗੁਰਦੁਆਰਾ ਸਾਹਿਬ, ਮੰਦਰ ਦੀ ਜਗ੍ਹਾ ਅਤੇ ਮੁਸਲਿਮ ਭਾਈਚਾਰੇ ਦੇ ਕਬਰਿਸਤਾਨ ਦੀ ਜ਼ਮੀਨ ਆਪਸ ਵਿੱਚ ਬਿਲਕੁਲ ਸਟੇ ਹੋਏ ਹਨ। ਮੁਸਲਿਮ ਸਮਾਜ ਵੱਲੋਂ ਕਬਰਿਸਤਾਨ ਵਾਲੀ ਥਾਂ ਵਿੱਚ ਮਸਜਿਦ ਦਾ ਨਿਰਮਾਣ ਕਰਵਾਇਆ ਗਿਆ ਹੈ। ਅਸਲ ਵਿਵਾਦ ਮਸਜਿਦ ਦੇ ਨਾਲ ਬਣਾਈ ਜਾ ਰਹੀ ਇੱਕ ਨਵੀਂ ਕੰਧ ਨੂੰ ਲੈ ਕੇ ਸ਼ੁਰੂ ਹੋਇਆ।
-
ਪਹਿਲੀ ਧਿਰ ਦਾ ਪੱਖ: ਪਿੰਡ ਦੇ ਨਿਵਾਸੀ ਤਰਸੇਮ ਸਿੰਘ ਦਾ ਕਹਿਣਾ ਹੈ ਕਿ ਜਿਸ ਜਗ੍ਹਾ ਕੰਧ ਕੱਢੀ ਜਾ ਰਹੀ ਹੈ, ਉਹ ਮੰਦਰ ਦੀ ਜ਼ਮੀਨ ਦੇ ਨਾਲ ਲੱਗਦੀ ਹੈ। ਉਨ੍ਹਾਂ ਮੰਗ ਕੀਤੀ ਕਿ ਪਹਿਲਾਂ ਸਰਕਾਰੀ ਤੌਰ ‘ਤੇ ਜ਼ਮੀਨ ਦੀ ਪੂਰੀ ਨਿਸ਼ਾਨਦੇਹੀ (ਮਿਣਤੀ) ਕਰਵਾਈ ਜਾਵੇ, ਉਸ ਤੋਂ ਬਾਅਦ ਹੀ ਅਗਲਾ ਨਿਰਮਾਣ ਕਾਰਜ ਸ਼ੁਰੂ ਹੋਣਾ ਚਾਹੀਦਾ ਹੈ।
-
ਦੂਜੀ ਧਿਰ ਦਾ ਪੱਖ: ਦੂਜੇ ਪਾਸੇ, ਮੁਸਲਿਮ ਭਾਈਚਾਰੇ ਦੇ ਨੁਮਾਇੰਦੇ ਇਤਖਾਨ ਮੁਕਾਬ ਨੇ ਸਾਫ਼ ਕੀਤਾ ਕਿ ਮਸਜਿਦ ਦਾ ਨਿਰਮਾਣ ਉਨ੍ਹਾਂ ਦੀ ਆਪਣੀ ਕਬਰਿਸਤਾਨ ਵਾਲੀ ਜ਼ਮੀਨ ਵਿੱਚ ਹੀ ਹੋਇਆ ਹੈ ਅਤੇ ਜਦੋਂ ਕੰਮ ਸ਼ੁਰੂ ਹੋਇਆ ਸੀ, ਉਦੋਂ ਕਿਸੇ ਨੇ ਇਤਰਾਜ਼ ਨਹੀਂ ਜਤਾਇਆ ਸੀ। ਉਨ੍ਹਾਂ ਵੱਡਾ ਦਿਲ ਦਿਖਾਉਂਦੇ ਹੋਏ ਕਿਹਾ ਕਿ ਜੇਕਰ ਸਰਕਾਰੀ ਨਿਸ਼ਾਨਦੇਹੀ ਦੌਰਾਨ ਕੋਈ ਹਿੱਸਾ ਮੰਦਰ ਦੀ ਜ਼ਮੀਨ ਵਿੱਚ ਨਿਕਲਦਾ ਹੈ, ਤਾਂ ਉਹ ਉਸ ਥਾਂ ਨੂੰ ਛੱਡਣ ਲਈ ਬਿਲਕੁਲ ਤਿਆਰ ਹਨ।
ਅਮਨ-ਕਾਨੂੰਨ ਬਣਾਈ ਰੱਖਣ ਲਈ ਪੰਚਾਇਤ ਸਰਗਰਮ
ਪਿੰਡ ਦੇ ਸਰਪੰਚ ਦੇਵੀ ਲਾਲ ਅਨੁਸਾਰ: “ਇਸ ਪੂਰੇ ਮਾਮਲੇ ਦੀ ਲਿਖਤੀ ਸੂਚਨਾ ਸਬੰਧਤ ਬਲਾਕ ਅਧਿਕਾਰੀ (BDPO) ਨੂੰ ਦੇ ਦਿੱਤੀ ਗਈ ਹੈ। ਪਿੰਡ ਦੀ ਆਪਸੀ ਸਾਂਝ, ਸ਼ਾਂਤੀ ਅਤੇ ਭਾਈਚਾਰਕ ਤਾਣੇ-ਬਾਣੇ ਨੂੰ ਕੋਈ ਆਂਚ ਨਹੀਂ ਆਉਣ ਦਿੱਤੀ ਜਾਵੇਗੀ। ਇਸ ਮਸਲੇ ਦਾ ਜਲਦ ਤੋਂ ਜਲਦ ਨਿਪਟਾਰਾ ਹੋਣਾ ਬੇਹੱਦ ਜ਼ਰੂਰੀ ਹੈ।”
