ਪੰਜਾਬ, 2ਜੂਨ (ਹਰਸ਼ਪ੍ਰੀਤ ਕੌਰ):ਸੰਗਰੂਰ ਜ਼ਿਲ੍ਹੇ ਦੇ ਹਲਕਾ ਦਿੜ੍ਹਬਾ ਦੇ ਪਿੰਡ ਖਡਿਆਲ ਦੀ ਹੋਣਹਾਰ ਅਥਲੀਟ ਧੀ ਸ਼ਹਿਨੂਰ ਬਾਵਾ ਨੇ ਅੰਤਰਰਾਸ਼ਟਰੀ ਪੱਧਰ ‘ਤੇ ਵੱਡੀ ਪ੍ਰਾਪਤੀ ਕਰਦਿਆਂ ਪੂਰੇ ਦੇਸ਼ ਅਤੇ ਪੰਜਾਬ ਦਾ ਨਾਂ ਰੌਸ਼ਨ ਕੀਤਾ ਹੈ। ਚੀਨ ਵਿਖੇ ਹੋ ਰਹੀ ਅੰਡਰ-20 ਅਥਲੈਟਿਕਸ ਚੈਂਪੀਅਨਸ਼ਿਪ ਦੀ 400 ਮੀਟਰ ਰਿਲੇਅ ਰੇਸ ਵਿੱਚ ਸ਼ਹਿਨੂਰ ਬਾਵਾ ਨੇ ਸੋਨੇ ਦਾ ਤਗਮਾ (Gold Medal) ਜਿੱਤ ਕੇ ਇਤਿਹਾਸ ਦੇ ਪੰਨਿਆਂ ‘ਤੇ ਆਪਣਾ ਨਾਂ ਸੁਨਹਿਰੀ ਅੱਖਰਾਂ ਵਿੱਚ ਲਿਖ ਦਿੱਤਾ ਹੈ।
ਇਸ ਭਾਰਤੀ ਰਿਲੇਅ ਰੇਸ ਟੀਮ ਵਿੱਚ ਪੰਜਾਬ ਦੀ ਨੁਮਾਇੰਦਗੀ ਕਰਨ ਵਾਲੀ ਉਹ ਇੱਕੋ-ਇੱਕ ਖਿਡਾਰਨ ਸੀ, ਜਿਸ ਨੇ ਹੋਰਨਾਂ ਸੂਬਿਆਂ ਦੀਆਂ ਅਥਲੀਟਾਂ ਨਾਲ ਮਿਲ ਕੇ ਦੇਸ਼ ਦਾ ਤਿਰੰਗਾ ਪੂਰੀ ਦੁਨੀਆ ਵਿੱਚ ਬੁਲੰਦ ਕੀਤਾ।
ਪਿੰਡ ਪਹੁੰਚਣ ‘ਤੇ ਢੋਲ-ਧਮੱਕਿਆਂ ਨਾਲ ਹੋਇਆ ਬੇਮਿਸਾਲ ਸਵਾਗਤ
ਇਸ ਇਤਿਹਾਸਕ ਜਿੱਤ ਤੋਂ ਬਾਅਦ ਜਦੋਂ ਸ਼ਹਿਨੂਰ ਬਾਵਾ ਆਪਣੇ ਪਿੰਡ ਖਡਿਆਲ ਪਹੁੰਚੀ, ਤਾਂ ਪੂਰਾ ਪਿੰਡ ਉਸ ਦੇ ਸਵਾਗਤ ਲਈ ਸੜਕਾਂ ‘ਤੇ ਉਤਰ ਆਇਆ। ਪਿੰਡ ਵਾਸੀਆਂ ਨੇ ਢੋਲ-ਵਾਜਿਆਂ, ਫੁੱਲਾਂ ਦੇ ਹਾਰਾਂ ਅਤੇ ਲੱਡੂ ਵੰਡ ਕੇ ਅੰਤਰਰਾਸ਼ਟਰੀ ਜੇਤੂ ਧੀ ਦਾ ਨਿੱਘਾ ਸਵਾਗਤ ਕੀਤਾ।
-
ਭਾਵੁਕ ਹੋਇਆ ਪਰਿਵਾਰ: ਇਸ ਖ਼ੁਸ਼ੀ ਦੇ ਮੌਕੇ ‘ਤੇ ਪਰਿਵਾਰ ਦੀਆਂ ਅੱਖਾਂ ਨਮ ਹੋ ਗਈਆਂ। ਸ਼ਹਿਨੂਰ ਦੇ ਮਾਤਾ-ਪਿਤਾ ਨੇ ਬੇਹੱਦ ਮਾਣ ਨਾਲ ਕਿਹਾ, “ਅਸੀਂ ਇਸ ਨੂੰ ਆਪਣੀ ਬੇਟੀ ਨਹੀਂ, ਸਗੋਂ ਆਪਣਾ ਪੁੱਤ ਮੰਨਦੇ ਹਾਂ, ਜਿਸ ਨੇ ਸਾਡਾ ਸਿਰ ਪੂਰੀ ਦੁਨੀਆ ਵਿੱਚ ਉੱਚਾ ਕਰ ਦਿੱਤਾ ਹੈ।”
ਸ਼ਹਿਨੂਰ ਦਾ ਨੌਜਵਾਨ ਪੀੜ੍ਹੀ ਨੂੰ ਸੰਦੇਸ਼
“ਆਪਣੀ ਇਸ ਇਤਿਹਾਸਕ ਸਫ਼ਲਤਾ ਤੋਂ ਬਾਅਦ ਸ਼ਹਿਨੂਰ ਬਾਵਾ ਨੇ ਅੱਜ ਦੀ ਨੌਜਵਾਨ ਪੀੜ੍ਹੀ ਨੂੰ ਇੱਕ ਵਿਸ਼ੇਸ਼ ਅਤੇ ਪ੍ਰੇਰਨਾਦਾਇਕ ਸੰਦੇਸ਼ ਦਿੱਤਾ। ਉਸ ਨੇ ਕਿਹਾ ਕਿ ਅੱਜ ਦੇ ਦੌਰ ਵਿੱਚ ਨੌਜਵਾਨਾਂ ਨੂੰ ਨਸ਼ਿਆਂ ਅਤੇ ਹੋਰ ਸਮਾਜਿਕ ਬੁਰਾਈਆਂ ਤੋਂ ਦੂਰ ਰਹਿ ਕੇ ਖੇਡਾਂ ਵੱਲ ਵਿਸ਼ੇਸ਼ ਧਿਆਨ ਦੇਣਾ ਚਾਹੀਦਾ ਹੈ। ਮਿਹਨਤ ਅਤੇ ਦ੍ਰਿੜ ਇਰਾਦੇ ਨਾਲ ਕਿਸੇ ਵੀ ਮੁਕਾਮ ਨੂੰ ਹਾਸਲ ਕੀਤਾ ਜਾ ਸਕਦਾ ਹੈ।”
