ਨਵੀਂ ਚੰਡੀਗੜ੍ਹ 29 ਮਈ,(ਹਰਸ਼ਲੀਨ ਸਿੰਘ)(ਮੁੱਲਾਂਪੁਰ) : ਟਾਟਾ ਆਈ.ਪੀ.ਐੱਲ. 2026 (IPL 2026) ਆਪਣੇ ਆਖਰੀ ਪੜਾਅ ‘ਤੇ ਪਹੁੰਚ ਚੁੱਕਾ ਹੈ। ਅੱਜ ਯਾਨੀ ਸ਼ੁੱਕਰਵਾਰ (29 ਮਈ) ਨੂੰ ਨਵੀਂ ਚੰਡੀਗੜ੍ਹ ਦੇ ਮਹਾਰਾਜਾ ਯਾਦਵਿੰਦਰਾ ਸਿੰਘ ਇੰਟਰਨੈਸ਼ਨਲ ਕ੍ਰਿਕਟ ਸਟੇਡੀਅਮ ਵਿੱਚ ਸੀਜ਼ਨ ਦਾ ਸਭ ਤੋਂ ਰੋਮਾਂਚਕ ਅਤੇ ਅਹਿਮ ਮੁਕਾਬਲਾ ‘ਕੁਆਲੀਫਾਇਰ-2’ ਖੇਡਿਆ ਜਾਵੇਗਾ। ਇਸ ਮਹਾ-ਮੁਕਾਬਲੇ ਵਿੱਚ ਸ਼ੁਭਮਨ ਗਿੱਲ ਦੀ ਅਗਵਾਈ ਵਾਲੀ ਗੁਜਰਾਤ ਟਾਈਟਨਸ (GT) ਅਤੇ ਰਿਆਨ ਪਰਾਗ ਦੀ ਰਾਜਸਥਾਨ ਰਾਇਲਜ਼ (RR) ਆਹਮੋ-ਸਾਹਮਣੇ ਹੋਣਗੀਆਂ।
ਇਸ ਮੈਚ ਨੂੰ ਜਿੱਤਣ ਵਾਲੀ ਟੀਮ ਸਿੱਧਾ ਫਾਈਨਲ ਵਿੱਚ ਪ੍ਰਵੇਸ਼ ਕਰੇਗੀ, ਜਿੱਥੇ 31 ਮਈ ਨੂੰ ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ ਵਿੱਚ ਉਸਦਾ ਸਾਹਮਣਾ ਪਹਿਲਾਂ ਹੀ ਫਾਈਨਲ ‘ਚ ਪਹੁੰਚ ਚੁੱਕੀ ਰੌਇਲ ਚੈਲੰਜਰਜ਼ ਬੈਂਗਲੁਰੂ (RCB) ਨਾਲ ਹੋਵੇਗਾ।
ਟੀਮਾਂ ਦਾ ਹਾਲੀਆ ਸਫ਼ਰ:
-
ਗੁਜਰਾਤ ਟਾਈਟਨਸ (GT): ਕੁਆਲੀਫਾਇਰ-1 ਵਿੱਚ ਬੈਂਗਲੁਰੂ (RCB) ਹੱਥੋਂ ਹਾਰ ਦਾ ਸਾਹਮਣਾ ਕਰਨ ਤੋਂ ਬਾਅਦ ਗੁਜਰਾਤ ਲਈ ਫਾਈਨਲ ਵਿੱਚ ਪਹੁੰਚਣ ਦਾ ਇਹ ਆਖਰੀ ਮੌਕਾ ਹੈ। ਟੀਮ ਅੱਜ ਹਰ ਹਾਲ ਵਿੱਚ ਵਾਪਸੀ ਕਰਨਾ ਚਾਹੇਗੀ।
-
ਰਾਜਸਥਾਨ ਰਾਇਲਜ਼ (RR): ਰਾਜਸਥਾਨ ਦੀ ਟੀਮ ਪੂਰੇ ਆਤਮਵਿਸ਼ਵਾਸ ਨਾਲ ਲਬਰੇਜ਼ ਹੈ। ਉਨ੍ਹਾਂ ਨੇ ‘ਐਲੀਮੀਨੇਟਰ’ ਮੈਚ ਵਿੱਚ ਸਨਰਾਈਜ਼ਰਜ਼ ਹੈਦਰਾਬਾਦ (SRH) ਨੂੰ 47 ਦੌੜਾਂ ਨਾਲ ਕਰਾਰੀ ਸ਼ਿਕਸਤ ਦੇ ਕੇ ਕੁਆਲੀਫਾਇਰ-2 ਵਿੱਚ ਜਗ੍ਹਾ ਬਣਾਈ ਹੈ। ਟੀਮ ਦੇ 15 ਸਾਲਾ ਨੌਜਵਾਨ ਸਟਾਰ ਬੱਲੇਬਾਜ਼ ਵੈਭਵ ਸੂਰਿਆਵੰਸ਼ੀ ਨੇ ਪਿਛਲੇ ਮੈਚ ਵਿੱਚ ਮਹਿਜ਼ 29 ਗੇਂਦਾਂ ‘ਚ 97 ਦੌੜਾਂ ਦੀ ਇਤਿਹਾਸਕ ਪਾਰੀ ਖੇਡੀ ਸੀ।
