Homeਪੰਜਾਬਯੰਗ ਪ੍ਰੋਗਰੈਸਿਵ ਸਿੱਖ ਫੋਰਮ (YPSF) ਵੱਲੋਂ UPSC ਅਤੇ PCS ਦੀ ਮੁਫ਼ਤ ਤਿਆਰੀ...
ਯੰਗ ਪ੍ਰੋਗਰੈਸਿਵ ਸਿੱਖ ਫੋਰਮ (YPSF) ਵੱਲੋਂ UPSC ਅਤੇ PCS ਦੀ ਮੁਫ਼ਤ ਤਿਆਰੀ ਲਈ ਰਜਿਸਟ੍ਰੇਸ਼ਨ ਸ਼ੁਰੂ;
ਰਹਿਣ-ਖਾਣ ਅਤੇ ਕੋਚਿੰਗ ਦਾ ਸਾਰਾ ਖਰਚਾ ਸੰਸਥਾ (YPSF) ਚੁੱਕੇਗੀ- ਡਾ. ਪ੍ਰਭਲੀਨ ਸਿੰਘ
ਚੰਡੀਗੜ੍ਹ: 16 ਮਈ 2026 (ਛਤਰਪਾਲ ਸਿੰਘ) : ਸਿੱਖਿਆ ਦੇ ਖੇਤਰ ਵਿੱਚ ਲੰਬੇ ਸਮੇਂ ਤੋਂ ਨਿਸ਼ਕਾਮ ਸੇਵਾਵਾਂ ਨਿਭਾਅ ਰਹੀ ਪ੍ਰਮੁੱਖ ਸੰਸਥਾ ‘ਯੰਗ ਪ੍ਰੋਗਰੈਸਿਵ ਸਿੱਖ ਫੋਰਮ’ (Young Progressive Sikh Forum) ਵੱਲੋਂ ਦੇਸ਼ ਅਤੇ ਸੂਬੇ ਦੀਆਂ ਉੱਚ ਪ੍ਰਸ਼ਾਸਨਿਕ ਸੇਵਾਵਾਂ (UPSC ਅਤੇ PCS) ਦੀ ਤਿਆਰੀ ਕਰ ਰਹੇ ਹੋਣਹਾਰ ਵਿਦਿਆਰਥੀਆਂ ਲਈ ਇੱਕ ਬਹੁਤ ਹੀ ਸ਼ਲਾਘਾਯੋਗ ਉਪਰਾਲਾ ਕੀਤਾ ਗਿਆ ਹੈ। ਸੰਸਥਾ ਨੇ ਨਵੇਂ ਸੈਸ਼ਨ ਲਈ ਮੁਫ਼ਤ ਕੋਚਿੰਗ ਬੈਚ ਵਾਸਤੇ ਰਜਿਸਟ੍ਰੇਸ਼ਨ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਹੈ।
ਪਿਛਲੇ ਬੈਚਾਂ ਦੇ ਰਹੇ ਸ਼ਾਨਦਾਰ ਨਤੀਜੇ
ਸੰਸਥਾ ਦੇ ਪ੍ਰੈਸੀਡੈਂਟ ਡਾ. ਪ੍ਰਭਲੀਨ ਸਿੰਘ ਨੇ ਜਾਣਕਾਰੀ ਦਿੱਤੀ ਕਿ ਫੋਰਮ ਪਿਛਲੇ ਲੰਬੇ ਸਮੇਂ ਤੋਂ ਸਕੂਲੀ ਸਿੱਖਿਆ, ਹਾਇਰ ਐਜੂਕੇਸ਼ਨ ਅਤੇ ਖਾਸ ਤੌਰ ‘ਤੇ ਰਾਗੀ, ਪਾਠੀ, ਕੀਰਤਨੀਏ ਅਤੇ ਪੁਜਾਰੀ ਸਿੰਘਾਂ ਦੇ ਬੱਚਿਆਂ ਦੀ ਪੜ੍ਹਾਈ ਲਈ ਲਗਾਤਾਰ ਕੰਮ ਕਰ ਰਹੀ ਹੈ। ਪਿਛਲੇ ਦੋ ਸਾਲਾਂ ਦੀ ਸਖ਼ਤ ਮਿਹਨਤ ਦੇ ਬਹੁਤ ਹੀ ਸਕਾਰਾਤਮਕ ਨਤੀਜੇ ਸਾਹਮਣੇ ਆਏ ਹਨ। ਸੰਸਥਾ ਦੇ 17 ਬੱਚਿਆਂ ਦੇ ਬੈਚ ਵਿੱਚੋਂ:
-
ਇੱਕ ਲੜਕੀ ਨੇ UPSC (ਸਿਵਲ ਸੇਵਾਵਾਂ) ਦੀ ਪ੍ਰੀਖਿਆ ਕਲੀਅਰ ਕਰ ਲਈ ਹੈ।
-
ਇੱਕ ਹੋਰ ਵਿਦਿਆਰਥੀ ਇੰਟਰਵਿਊ ਤੱਕ ਪਹੁੰਚਣ ਵਿੱਚ ਸਫ਼ਲ ਰਿਹਾ।
-
ਇਸ ਤੋਂ ਇਲਾਵਾ, 12 ਵਿਦਿਆਰਥੀਆਂ ਨੇ ਸਟੇਟ PCS ਦਾ ਪ੍ਰੀਲਿਮਸ (ਪ੍ਰਾਇਮਰੀ) ਪੇਪਰ ਕਲੀਅਰ ਕੀਤਾ ਹੈ ਅਤੇ ਹੁਣ ਉਹ ਮੇਨਜ਼ (Mains) ਦੀ ਪ੍ਰੀਖਿਆ ਵਿੱਚ ਅਪੀਅਰ ਹੋਏ ਹਨ।
ਰਹਿਣ, ਖਾਣ ਅਤੇ ਕੋਚਿੰਗ ਦਾ ਸਾਰਾ ਖਰਚਾ ਬਿਲਕੁਲ ਮੁਫ਼ਤ
ਇਸ ਵਾਰ ਵੀ ਚੁਣੇ ਗਏ ਵਿਦਿਆਰਥੀਆਂ ਦੇ ਚੰਡੀਗੜ੍ਹ ਵਿਖੇ ਰਹਿਣ, ਖਾਣ-ਪੀਣ, ਡਰੈੱਸ ਅਤੇ ਹਾਈ-ਕਲਾਸ ਕੋਚਿੰਗ ਦਾ ਸਾਰਾ ਖਰਚਾ ਯੰਗ ਪ੍ਰੋਗਰੈਸਿਵ ਸਿੱਖ ਫੋਰਮ ਵੱਲੋਂ ਦਾਨੀ ਸੱਜਣਾਂ (ਜਿਨ੍ਹਾਂ ਵਿੱਚ ਕੰਧਾਰੀ ਗਰੁੱਪ, ਰਾਜੂ ਚੱਡਾ ਜੀ, ਬਾਂਗਾ ਸਾਹਿਬ ਅਤੇ ਹੋਰ ਪਤਵੰਤੇ ਸ਼ਾਮਲ ਹਨ) ਦੇ ਸਹਿਯੋਗ ਨਾਲ ਬਿਲਕੁਲ ਮੁਫ਼ਤ ਕੀਤਾ ਜਾਵੇਗਾ।
ਇਸ ਵਾਰ 2 ਵਿਸ਼ੇਸ਼ ਬੈਚ ਕੀਤੇ ਜਾ ਰਹੇ ਹਨ ਸ਼ੁਰੂ:
-
ਗ੍ਰੈਜੂਏਸ਼ਨ ਪਾਸ ਵਿਦਿਆਰਥੀਆਂ ਲਈ: ਜਿਨ੍ਹਾਂ ਬੱਚਿਆਂ ਦੀ ਗ੍ਰੈਜੂਏਸ਼ਨ ਮੁਕੰਮਲ ਹੋ ਚੁੱਕੀ ਹੈ।
-
ਪਲੱਸ-ਟੂ (12ਵੀਂ) ਪਾਸ ਵਿਦਿਆਰਥੀਆਂ ਲਈ: ਇਸ ਵਾਰ ਇੱਕ ਨਵਾਂ ਬੈਚ ਸ਼ੁਰੂ ਕੀਤਾ ਗਿਆ ਹੈ, ਜਿਸ ਵਿੱਚ 12ਵੀਂ ਤੋਂ ਬਾਅਦ ਗ੍ਰੈਜੂਏਸ਼ਨ ਦੇ ਨਾਲ-ਨਾਲ ਹੀ UPSC ਦੀ ਤਿਆਰੀ ਕਰਵਾਈ ਜਾਵੇਗੀ।
ਕਿਵੇਂ ਕਰੀਏ ਰਜਿਸਟ੍ਰੇਸ਼ਨ ਅਤੇ ਕੀ ਹੈ ਆਖਰੀ ਤਾਰੀਖ਼?
ਸੰਸਥਾ ਵੱਲੋਂ ਨਵਾਂ ਬੈਚ 1 ਜੁਲਾਈ ਤੋਂ ਸ਼ੁਰੂ ਕੀਤਾ ਜਾ ਰਿਹਾ ਹੈ। ਅਗਲੇ ਡੇਢ ਮਹੀਨੇ ਦੇ ਅੰਦਰ ਰਜਿਸਟ੍ਰੇਸ਼ਨ, ਲਿਖਤੀ ਪ੍ਰੀਖਿਆ ਅਤੇ ਇੰਟਰਵਿਊ ਦੀ ਪ੍ਰਕਿਰਿਆ ਪੂਰੀ ਕਰਕੇ ਬੱਚਿਆਂ ਦੀ ਚੋਣ ਕੀਤੀ ਜਾਵੇਗੀ।
-
ਹੈਲਪਲਾਈਨ ਨੰਬਰ: ਚਾਹਵਾਨ ਵਿਦਿਆਰਥੀ ਤੁਰੰਤ 98729-98720 ‘ਤੇ ਸੰਪਰਕ ਕਰਕੇ ਆਪਣੀ ਰਜਿਸਟ੍ਰੇਸ਼ਨ ਕਰਵਾ ਸਕਦੇ ਹਨ। ਰਜਿਸਟ੍ਰੇਸ਼ਨ ਤੋਂ ਬਾਅਦ ਸੰਸਥਾ ਵੱਲੋਂ ਖੁਦ ਵਿਦਿਆਰਥੀਆਂ ਨਾਲ ਰਾਬਤਾ ਕਾਇਮ ਕੀਤਾ ਜਾਵੇਗਾ।
ਸੰਸਥਾ ਨੇ ਨੌਜਵਾਨਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਇਸ ਸੁਨਹਿਰੀ ਮੌਕੇ ਦਾ ਵੱਧ ਤੋਂ ਵੱਧ ਲਾਹਾ ਲੈਣ, ਆਪਣੇ ਜੀਵਨ ਦੇ 2 ਸਾਲ ਸੰਸਥਾ ਦੀ ਗਾਈਡੈਂਸ ਵਿੱਚ ਮਿਹਨਤ ਨੂੰ ਦੇਣ ਤਾਂ ਜੋ ਉਹ ਅਫ਼ਸਰ ਬਣ ਕੇ ਸਮਾਜ ਅਤੇ ਆਪਣੀ ਕੌਮ ਦਾ ਨਾਮ ਰੌਸ਼ਨ ਕਰ ਸਕਣ।
