ਨਵਾਂ ਸ਼ਹਿਰ: ਪੰਜਾਬੀ ਨੌਜਵਾਨ ਜਸ਼ਨਦੀਪ ਲੱਧੜ ਨੇ ਇਟਲੀ ਦੀ ਸਮੁੰਦਰੀ ਸੈਨਾ ਵਿੱਚ ਭਰਤੀ ਹੋ ਕੇ ਨਾ ਸਿਰਫ਼ ਆਪਣੇ ਪਰਿਵਾਰ, ਸਗੋਂ ਸਮੂਹ ਪੰਜਾਬੀ ਭਾਈਚਾਰੇ ਦਾ ਮਾਣ ਵਧਾਇਆ ਹੈ। ਜਸ਼ਨਦੀਪ ਲੱਧੜ ਆਪਣੇ ਪਿਤਾ ਅਮਰਨਾਥ ਅਤੇ ਮਾਤਾ ਕੁਲਵਿੰਦਰ ਕੌਰ ਨਾਲ ਪਿੰਡ ਪਾਲੋ ਦੈਲ ਕੋਲੇ, ਜ਼ਿਲ੍ਹਾ ਬਾਰੀ (ਇਟਲੀ) ਵਿੱਚ ਰਹਿ ਰਿਹਾ ਹੈ।
ਜਸ਼ਨਦੀਪ 2012 ਵਿੱਚ ਇਟਲੀ ਗਿਆ ਸੀ, ਜਿੱਥੇ ਉਸ ਨੇ ਆਪਣੀ ਮੁਢਲੀ ਸਿਖਿਆ ਪਿੰਡ ਪਾਲੋ ਦੈਲ ਕੋਲੇ ਤੋਂ ਹੀ ਪ੍ਰਾਪਤ ਕੀਤੀ। ਉੱਚ ਸਿਖਿਆ ਲਈ ਉਸ ਨੇ ਯੂਕਲੀਡ ਕਰਾਸੀਓਲੇ ਨੋਟੀਕਲ ਟੈਕਨੀਕਲ ਆਫ਼ ਬਾਰੀ ਤੋਂ ਸਮੁੰਦਰੀ ਸੈਨਾ ਦਾ ਡਿਪਲੋਮਾ ਹਾਸਲ ਕੀਤਾ। ਇਸ ਤੋਂ ਬਾਅਦ ਉਸ ਨੇ ਉੱਚ ਪੱਧਰ ਦੇ ਇਮਤਿਹਾਨ ਪਾਸ ਕਰਕੇ 16 ਫਰਵਰੀ ਨੂੰ ਇਟਲੀ ਦੀ ਸਮੁੰਦਰੀ ਸੈਨਾ ਵਿੱਚ ਭਰਤੀ ਹੋਣ ਦਾ ਮਾਣ ਪ੍ਰਾਪਤ ਕੀਤਾ।
ਇਸ ਵੇਲੇ ਜਸ਼ਨਦੀਪ ਲੱਧੜ ਟਰੈਤੋ (ਇਟਲੀ) ਵਿੱਚ ਆਪਣੀ ਸੇਵਾ ਨਿਭਾ ਰਿਹਾ ਹੈ। ਉਸ ਨੇ ਆਪਣੀ ਕਾਮਯਾਬੀ ਦਾ ਸਿਹਰਾ ਆਪਣੇ ਮਾਤਾ-ਪਿਤਾ ਨੂੰ ਦਿੰਦਿਆਂ ਕਿਹਾ ਕਿ ਉਨ੍ਹਾਂ ਦੀ ਮਿਹਨਤ ਅਤੇ ਹੌਸਲਾ ਅਫਜ਼ਾਈ ਨਾਲ ਹੀ ਉਹ ਇਸ ਮਕਾਮ ਤੱਕ ਪਹੁੰਚਿਆ ਹੈ।
ਜਸ਼ਨਦੀਪ ਨੇ ਇਟਲੀ ਵਿੱਚ ਵਸਦੇ ਪੰਜਾਬੀ ਭਾਈਚਾਰੇ ਨੂੰ ਸੰਦੇਸ਼ ਦਿੰਦਿਆਂ ਕਿਹਾ ਕਿ ਆਪਣੇ ਬੱਚਿਆਂ ਨੂੰ ਵੱਧ ਤੋਂ ਵੱਧ ਸਿੱਖਿਆ ਦਿਓ, ਕਿਉਂਕਿ ਉੱਚ ਵਿਦਿਆ ਹੀ ਕਾਮਯਾਬੀ ਦੀ ਕੁੰਜੀ ਹੈ। ਉਸ ਦੀ ਇਹ ਪ੍ਰਾਪਤੀ ਸਮੂਹ ਪੰਜਾਬੀਆਂ ਲਈ ਮਾਣ ਅਤੇ ਪ੍ਰੇਰਣਾ ਦਾ ਸਰੋਤ ਹੈ।
**ਸ਼ੇਅਰ ਕਰੋ:** ਇਸ ਪ੍ਰੇਰਣਾਦਾਇਕ ਖ਼ਬਰ ਨੂੰ ਆਪਣੇ ਦੋਸਤਾਂ ਅਤੇ ਪਰਿਵਾਰ ਨਾਲ ਸਾਂਝਾ ਕਰੋ।
