–ਸ਼ੋਅ ਵਿਚ ਪੰਜਾਬ ਸਮੇਤ ਦੇਸ਼ ਭਰ ਤੋਂ ਲਗਭਗ 32 ਨਸਲਾਂ ਦੇ 233 ਕੁੱਤਿਆਂ ਨੇ ਹਿੱਸਾ ਲਿਆ
ਪਟਿਆਲਾ, 15 ਫਰਵਰੀ (ਮਨੋਜ ਵਰਮਾ): ਪਟਿਆਲਾ ਹੈਰੀਟੇਜ ਫੈਸਟੀਵਲ-2026 ਦੇ ਚੌਥੇ ਦਿਨ ਅੱਜ ਇੱਥੇ ਪੋਲੋ ਗਰਾਊਂਡ ਵਿਖੇ ਕਰਵਾਏ ਗਏ ਪਟਿਆਲਾ ਕੈਨਲ ਕਲੱਬ ਦੇ 64ਵੇਂ ਅਤੇ 65ਵੇਂ ਆਲ ਬਰੀਡ ਚੈਂਪੀਅਨਸ਼ਿਪ ਡੌਗ ਸ਼ੋਅ ਨੇ ਦਰਸ਼ਕਾਂ ਦਾ ਮਨ ਮੋਹ ਲਿਆ। ਜ਼ਿਲ੍ਹਾ ਪ੍ਰਸ਼ਾਸਨ ਦੇ ਸਹਿਯੋਗ ਨਾਲ ਕਰਵਾਏ ਗਏ ਇਸ ਸ਼ੋਅ ਵਿੱਚ ਦੇਸ਼ ਦੇ ਕੋਨੇ-ਕੋਨੇ ਤੋਂ ਆਏ ਕੁੱਤਿਆਂ ਦੇ ਮਾਲਕਾਂ ਨੇ ਹਿੱਸਾ ਲਿਆ।
-ਡਾਬਰਮੈਨ, ਅਫਗਾਨ ਹਾਉਂਡ, ਬਾਕਸਰ, ਰੋਟ ਵਿਲਰ, ਲੈਬਰੇਡਾਰ, ਬੀਗਲ, ਜੀ.ਐਸ.ਡੀ ਸਾਈਬੇਰੀਅਨ ਹਸਕੀ, ਕੈਰਾਵਨ ਹਾਉਂਡ, ਰਾਜ ਪਾਲਯਨ, ਬਿਚੋਨ ਫਰਾਈਜਮ ਡੱਚ ਸ਼ੰਡ (ਵਾਇਰ ਹੇਅਰਡ) ਵਿਸ਼ੇਸ਼ ਖਿੱਚ ਦਾ ਕੇਂਦਰ ਰਹੇ
ਦੇਸ਼ ਭਰ ਤੋਂ ਪਹੁੰਚੀਆਂ 32 ਨਸਲਾਂ
ਇਸ ਸ਼ੋਅ ਵਿੱਚ ਲਗਭਗ 32 ਵੱਖ-ਵੱਖ ਨਸਲਾਂ ਦੇ 233 ਕੁੱਤਿਆਂ ਨੇ ਆਪਣੀ ਸੁੰਦਰਤਾ ਅਤੇ ਫੁਰਤੀ ਦਾ ਪ੍ਰਦਰਸ਼ਨ ਕੀਤਾ।
-
ਮੁੱਖ ਨਸਲਾਂ: ਸ਼ੋਅ ਵਿੱਚ ਡੌਬਰਮੈਨ (26), ਜਰਮਨ ਸ਼ੈਫਰਡ (25), ਲੈਬਰਾਡੋਰ (22), ਗੋਲਡਨ ਰਿਟਰੀਵਰ (18), ਪੋਮੇਰੀਅਨ (16) ਅਤੇ ਬੀਗਲ (15) ਨਸਲ ਦੇ ਕੁੱਤੇ ਵਿਸ਼ੇਸ਼ ਖਿੱਚ ਦਾ ਕੇਂਦਰ ਰਹੇ।
-
ਦੂਰ-ਦੁਰਾਡੇ ਤੋਂ ਆਮਦ: ਪੰਜਾਬ ਤੋਂ ਇਲਾਵਾ ਕੰਨਿਆ ਕੁਮਾਰੀ, ਕੋਇੰਬਟੋਰ, ਚੇਨਈ, ਹੈਦਰਾਬਾਦ, ਕੋਲਕਾਤਾ, ਦਿੱਲੀ, ਗੁਜਰਾਤ ਅਤੇ ਹਰਿਆਣਾ ਤੋਂ ਕੁੱਤਿਆਂ ਦੇ ਮਾਲਕ ਪੁੱਜੇ ਹੋਏ ਸਨ।
ਕੌਮਾਂਤਰੀ ਪੱਧਰ ਦੀ ਜੱਜਿੰਗ
ਕੈਨਲ ਕਲੱਬ ਆਫ ਇੰਡੀਆ ਵੱਲੋਂ ਪਟਿਆਲਾ ਕੈਨਲ ਕਲੱਬ ਨੂੰ ਨੋਡਲ ਕਲੱਬ ਵਜੋਂ ਚੁਣਿਆ ਗਿਆ ਹੈ। ਇਸ ਸ਼ੋਅ ਵਿੱਚ ਜੇਤੂਆਂ ਦੀ ਚੋਣ ਕਰਨ ਲਈ ਅੰਤਰਰਾਸ਼ਟਰੀ ਪੱਧਰ ਦੇ ਜੱਜ ਅੰਜਲੀ ਵੈਦ (ਦਿੱਲੀ) ਅਤੇ ਐਸ. ਕ੍ਰਿਸ਼ਨਾਮੂਰਤੀ (ਕੋਇੰਬਟੂਰ) ਵਿਸ਼ੇਸ਼ ਤੌਰ ‘ਤੇ ਪਹੁੰਚੇ। ਇਸ ਦੌਰਾਨ ‘ਡੌਗ ਆਫ਼ ਦੀ ਈਅਰ’ ਅਤੇ ‘ਬੈਸਟ ਪੱਪੀ ਆਫ਼ ਦਾ ਈਅਰ’ ਵਰਗੇ ਵੱਕਾਰੀ ਖਿਤਾਬਾਂ ਲਈ ਅੰਕ ਦਿੱਤੇ ਗਏ।
ਮੁੱਖ ਸ਼ਖ਼ਸੀਅਤਾਂ ਦੀ ਸ਼ਮੂਲੀਅਤ
ਸ਼ੋਅ ਦੌਰਾਨ ਪਟਿਆਲਾ ਦੇ ਜ਼ਿਲ੍ਹਾ ਅਤੇ ਸੈਸ਼ਨ ਜੱਜ ਅਵਤਾਰ ਸਿੰਘ, ਲੁਧਿਆਣਾ ਦੇ ਵਧੀਕ ਜ਼ਿਲ੍ਹਾ ਅਤੇ ਸੈਸ਼ਨ ਜੱਜ ਗੁਰਪ੍ਰਤਾਪ ਸਿੰਘ, ਏ.ਡੀ.ਸੀ. (ਸ਼ਹਿਰੀ ਵਿਕਾਸ) ਡਾ. ਇਸਮਤ ਵਿਜੇ ਸਿੰਘ ਅਤੇ ਐਸ.ਡੀ.ਐਮ. ਹਰਜੋਤ ਕੌਰ ਮਾਵੀ ਨੇ ਸ਼ਿਰਕਤ ਕੀਤੀ।
“ਪਟਿਆਲਾ ਕੈਨਲ ਕਲੱਬ ਪਿਛਲੇ 35 ਸਾਲਾਂ ਤੋਂ ਲਗਾਤਾਰ ਇਹ ਸ਼ੋਅ ਕਰਵਾ ਰਿਹਾ ਹੈ। ਇਹ ਪਲੇਟਫਾਰਮ ਨਾ ਸਿਰਫ਼ ਕੁੱਤਿਆਂ ਦੀਆਂ ਨਸਲਾਂ ਬਾਰੇ ਜਾਗਰੂਕਤਾ ਵਧਾਉਂਦਾ ਹੈ, ਬਲਕਿ ਪਟਿਆਲਾ ਨੂੰ ਕੌਮਾਂਤਰੀ ਨਕਸ਼ੇ ‘ਤੇ ਵੀ ਉਭਾਰਦਾ ਹੈ।” — ਡਾ. ਇਸਮਤ ਵਿਜੇ ਸਿੰਘ, ਏ.ਡੀ.ਸੀ.
ਇਸ ਮੌਕੇ ਸ਼ੋਅ ਦੀ ਯਾਦ ਵਿੱਚ ਇੱਕ ਸੁੰਦਰ ਸੋਵੀਨੀਅਰ (Souvenir) ਵੀ ਜਾਰੀ ਕੀਤਾ ਗਿਆ। ਅਫਗਾਨ ਹਾਉਂਡ, ਸਾਈਬੇਰੀਅਨ ਹਸਕੀ ਅਤੇ ਰਾਜ ਪਾਲਯਨ ਵਰਗੀਆਂ ਦੁਰਲੱਭ ਨਸਲਾਂ ਨੇ ਮੇਲੇ ਵਿੱਚ ਆਈ ਸੰਗਤ ਦਾ ਵਿਸ਼ੇਸ਼ ਧਿਆਨ ਖਿੱਚਿਆ।
