ਕੋਲਕਾਤਾ: 19 ਦਸੰਬਰ (ਛਤਰਪਾਲ ਸਿੰਘ): ਸਾਬਕਾ ਭਾਰਤੀ ਕ੍ਰਿਕਟ ਟੀਮ ਦੇ ਕਪਤਾਨ ਅਤੇ ਬੀਸੀਸੀਆਈ ਦੇ ਪੂਰਵ ਪ੍ਰਧਾਨ ਸੌਰਵ ਗਾਂਗੁਲੀ ਨੇ ਕੋਲਕਾਤਾ ਵਿੱਚ ਅਰਜਨਟੀਨਾ ਫੈਨ ਕਲੱਬ ਦੇ ਪ੍ਰਧਾਨ ਉੱਤਮ ਸਾਹਾ ਖ਼ਿਲਾਫ਼ ਵੱਡੀ ਕਾਨੂੰਨੀ ਕਾਰਵਾਈ ਕੀਤੀ ਹੈ। ਗਾਂਗੁਲੀ ਨੇ ਸਾਹਾ ਉੱਤੇ ਗੰਭੀਰ ਦੋਸ਼ ਲਗਾਉਂਦੇ ਹੋਏ ₹50 ਕਰੋੜ ਦਾ ਮਾਣਹਾਨੀ ਮੁਕੱਦਮਾ ਦਾਇਰ ਕੀਤਾ ਹੈ।
ਇਹ ਮਾਮਲਾ 13 ਦਸੰਬਰ (ਸ਼ਨੀਵਾਰ) ਨੂੰ ਲੇਕ ਸਿਟੀ ਸਟੇਡੀਅਮ ਵਿੱਚ ਹੋਏ ਫੁੱਟਬਾਲ ਸਟਾਰ ਲਿਓਨਲ ਮੈਸੀ ਨਾਲ ਜੁੜੇ ਇੱਕ ਸਮਾਗਮ ਦੌਰਾਨ ਹੋਈ ਭੰਨਤੋੜ ਤੋਂ ਬਾਅਦ ਸਾਹਮਣੇ ਆਇਆ। ਗੁੱਸੇ ਵਿੱਚ ਆਏ ਪ੍ਰਸ਼ੰਸਕਾਂ ਵੱਲੋਂ ਸਮਾਗਮ ਸਥਲ ’ਤੇ ਤੋੜ-ਫੋੜ ਕੀਤੀ ਗਈ ਸੀ, ਜਿਸ ਤੋਂ ਬਾਅਦ ਉੱਤਮ ਸਾਹਾ ਨੇ ਸੌਰਵ ਗਾਂਗੁਲੀ ਉੱਤੇ ਗੰਭੀਰ ਆਰੋਪ ਲਗਾਏ।
ਲਾਲ ਬਾਜ਼ਾਰ ਵਿੱਚ ਦਾਇਰ ਕੀਤੀ ਗਈ ਸ਼ਿਕਾਇਤ ਵਿੱਚ ਗਾਂਗੁਲੀ ਨੇ ਕਿਹਾ ਕਿ ਉੱਤਮ ਸਾਹਾ ਦੇ ਬਿਆਨਾਂ ਨਾਲ ਉਸ ਦੀ ਸਾਖ ਨੂੰ ਭਾਰੀ ਨੁਕਸਾਨ ਪਹੁੰਚਿਆ ਹੈ। ਗਾਂਗੁਲੀ ਮੁਤਾਬਕ, ਉਸ ਉੱਤੇ ਲਗਾਏ ਗਏ ਦੋਸ਼ ਬਿਨਾਂ ਕਿਸੇ ਸਬੂਤ ਦੇ ਹਨ ਅਤੇ ਪੂਰੀ ਤਰ੍ਹਾਂ ਝੂਠੇ ਹਨ। ਉਨ੍ਹਾਂ ਨੇ ਸਾਹਾ ਦੇ ਬਿਆਨਾਂ ਨੂੰ “ਝੂਠਾ, ਦੁਰਭਾਵਨਾਪੂਰਨ, ਅਪਮਾਨਜਨਕ ਅਤੇ ਸਾਖ ਨੂੰ ਠੇਸ ਪਹੁੰਚਾਉਣ ਵਾਲਾ” ਕਰਾਰ ਦਿੱਤਾ ਹੈ।
ਉੱਤਮ ਸਾਹਾ ਨੇ ਦਾਅਵਾ ਕੀਤਾ ਸੀ ਕਿ ਸੌਰਵ ਗਾਂਗੁਲੀ ਸਮਾਗਮ ਦੇ ਮੁੱਖ ਪ੍ਰਬੰਧਕ ਸਤਦ੍ਰੂ ਦੱਤਾ ਦੇ ਮਾਮਲਿਆਂ ਵਿੱਚ “ਵਿਚੋਲੇ” ਦੀ ਭੂਮਿਕਾ ਨਿਭਾ ਰਹੇ ਸਨ। ਇਸ ਦਾਅਵੇ ਨੂੰ ਪੂਰੀ ਤਰ੍ਹਾਂ ਖਾਰਜ ਕਰਦੇ ਹੋਏ ਗਾਂਗੁਲੀ ਦੀ ਕਾਨੂੰਨੀ ਟੀਮ ਨੇ ਉੱਤਮ ਸਾਹਾ ਨੂੰ ਨੋਟਿਸ ਭੇਜ ਕੇ ਤੁਰੰਤ ਬਿਆਨ ਵਾਪਸ ਲੈਣ ਅਤੇ ਹਰਜਾਨਾ ਅਦਾ ਕਰਨ ਦੀ ਮੰਗ ਕੀਤੀ ਹੈ।
ਸੌਰਵ ਗਾਂਗੁਲੀ ਨੇ ਸਪੱਸ਼ਟ ਕੀਤਾ ਹੈ ਕਿ ਉਹ ਮੈਸੀ ਦੇ ਸਮਾਗਮ ਵਿੱਚ ਸਿਰਫ਼ ਇੱਕ ਮਹਿਮਾਨ ਵਜੋਂ ਸ਼ਾਮਲ ਹੋਏ ਸਨ ਅਤੇ ਸਮਾਗਮ ਦੀ ਯੋਜਨਾ ਜਾਂ ਪ੍ਰਬੰਧਨ ਨਾਲ ਉਨ੍ਹਾਂ ਦੀ ਕੋਈ ਅਧਿਕਾਰਤ ਭੂਮਿਕਾ ਨਹੀਂ ਸੀ।
