ਪਾਲਮਪੁਰ, 5 ਜੁਲਾਈ (ਚੌਧਰੀ ਪ੍ਰਭਜੀਤ ਸਿੰਘ):ਹਿਮਾਚਲ ਪ੍ਰਦੇਸ਼ ਦੇ ਕਾਂਗੜਾ ਜ਼ਿਲ੍ਹੇ ਦੇ ਪ੍ਰਸਿੱਧ ਸੈਲਾਨੀ ਸਥਾਨ ‘ਨਿਊਗਲ ਖੱਡ’ ਵਿੱਚ ਪਾਣੀ ਦਾ ਪੱਧਰ ਅਚਾਨਕ ਵਧਣ ਕਾਰਨ ਫਸੇ ਦੋ ਬੱਚਿਆਂ ਸਮੇਤ ਪੰਜਾਬ ਦੇ ਸੱਤ ਸੈਲਾਨੀਆਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ ਹੈ।
ਜਲੰਧਰ ਦਾ ਰਹਿਣ ਵਾਲਾ ਇਹ ਪਰਿਵਾਰ ਉਸ ਸਮੇਂ ਇੱਕ ਵੱਡੇ ਹਾਦਸੇ ਤੋਂ ਵਾਲ-ਵਾਲ ਬਚ ਗਿਆ, ਜਦੋਂ ਅਚਾਨਕ ਆਏ ਹੜ੍ਹ ਕਾਰਨ ਇੱਕ ਅਸਥਾਈ ਪੁਲ ਵਹਿ ਗਿਆ ਅਤੇ ਉਹ ਖੱਡ ਦੇ ਦੂਜੇ ਪਾਸੇ ਫਸ ਗਏ।
ਅਧਿਕਾਰੀਆਂ ਮੁੱਖ ਮੁਤਾਬਕ, ਇਹ ਸੈਲਾਨੀ ਪਿਛਲੇ ਦੋ ਦਿਨਾਂ ਤੋਂ ਨਜ਼ਦੀਕੀ ਕੈਫੇ ਵਿੱਚ ਰੁਕੇ ਹੋਏ ਸਨ ਅਤੇ ਸ਼ਨੀਵਾਰ ਦੁਪਹਿਰ ਨੂੰ ਨਦੀ ਦੇ ਨੇੜੇ ਸਮਾਂ ਬਿਤਾ ਰਹੇ ਸਨ। ਇਸੇ ਦੌਰਾਨ ਇੱਕ ਨੇੜਲੇ ਹਾਈਡਲ (ਪਣ-ਬਿਜਲੀ) ਪ੍ਰੋਜੈਕਟ ਤੋਂ ਪਾਣੀ ਛੱਡੇ ਜਾਣ ਕਾਰਨ ਨਦੀ ਵਿੱਚ ਪਾਣੀ ਦਾ ਪੱਧਰ ਅਚਾਨਕ ਬਹੁਤ ਜ਼ਿਆਦਾ ਵੱਧ ਗਿਆ।
ਦੱਸਿਆ ਜਾ ਰਿਹਾ ਹੈ ਕਿ ਪਾਣੀ ਛੱਡਣ ਤੋਂ ਪਹਿਲਾਂ ਚੇਤਾਵਨੀ ਸਾਈਰਨ ਵਜਾਇਆ ਗਿਆ ਸੀ, ਪਰ ਸਥਾਨਕ ਸੁਰੱਖਿਆ ਨਿਯਮਾਂ ਤੋਂ ਅਣਜਾਣ ਹੋਣ ਕਰਕੇ ਸੈਲਾਨੀ ਇਸ ਅਲਰਟ ਨੂੰ ਸਮਝ ਨਹੀਂ ਸਕੇ। ਕੁਝ ਹੀ ਮਿੰਟਾਂ ਵਿੱਚ, ਪਾਣੀ ਦੇ ਤੇਜ਼ ਵਹਾਅ ਨੇ ਅਸਥਾਈ ਪੁਲ ਨੂੰ ਰੋੜ੍ਹ ਦਿੱਤਾ, ਜਿਸ ਕਾਰਨ ਪਰਿਵਾਰ ਦੇ ਬਾਹਰ ਨਿਕਲਣ ਦਾ ਰਸਤਾ ਪੂਰੀ ਤਰ੍ਹਾਂ ਬੰਦ ਹੋ ਗਿਆ।
ਫਾਇਰ ਬ੍ਰਿਗੇਡ ਦੀ ਟੀਮ ਨੇ ਚਲਾਈ ਬਚਾਅ ਮੁਹਿੰਮ
ਘਟਨਾ ਦੀ ਸੂਚਨਾ ਮਿਲਦੇ ਹੀ ਪਾਲਮਪੁਰ ਦੇ ਐੱਸ.ਡੀ.ਐੱਮ. (SDM) ਡਾ. ਓ.ਪੀ. ਯਾਦਵ ਤੁਰੰਤ ਫਾਇਰ ਬ੍ਰਿਗੇਡ ਦਫ਼ਤਰ ਪਹੁੰਚੇ ਅਤੇ ਬਚਾਅ ਟੀਮ ਦੇ ਨਾਲ ਖ਼ੁਦ ਮੌਕੇ ‘ਤੇ ਰਵਾਨਾ ਹੋਏ।
ਫਾਇਰ ਬ੍ਰਿਗੇਡ ਅਫ਼ਸਰ ਸੁਰਿੰਦਰ ਕੁਮਾਰ ਦੀ ਅਗਵਾਈ ਹੇਠ ਬਚਾਅ ਕਰਮਚਾਰੀਆਂ ਨੇ ਇੱਕ ਘੰਟੇ ਤੱਕ ਚੱਲੀ ਚੁਣੌਤੀਪੂਰਨ ਮੁਹਿੰਮ ਨੂੰ ਅੰਜਾਮ ਦਿੱਤਾ। ਖ਼ਤਰਨਾਕ ਹਾਲਾਤ ਦੇ ਬਾਵਜੂਦ, ਟੀਮ ਨੇ ਇੱਕ ਅਸਥਾਈ ਲੰਘਣ ਦਾ ਰਸਤਾ ਤਿਆਰ ਕੀਤਾ ਅਤੇ ਸਾਰੇ ਸੱਤ ਸੈਲਾਨੀਆਂ — ਜਿਨ੍ਹਾਂ ਵਿੱਚ ਦੋ ਮਰਦ, ਤਿੰਨ ਔਰਤਾਂ ਅਤੇ ਦੋ ਬੱਚੇ ਸ਼ਾਮਲ ਸਨ — ਨੂੰ ਇੱਕ-ਇੱਕ ਕਰਕੇ ਸੁਰੱਖਿਅਤ ਬਾਹਰ ਕੱਢ ਲਿਆ।
