ਨਵੀਂ ਦਿੱਲੀ:20ਜੂਨ (ਛਤਰਪਾਲ ਸਿੰਘ):ਸਾਬਕਾ ਰਾਜ ਸਭਾ ਮੈਂਬਰ ਨਰੇਸ਼ ਗੁਜਰਾਲ ਇੱਕ ਵੱਡੇ ਸਾਈਬਰ ਧੋਖਾਧੜੀ ਮਾਮਲੇ ਦਾ ਸ਼ਿਕਾਰ ਹੋ ਗਏ ਹਨ। ਦੋਸ਼ ਹੈ ਕਿ ਠੱਗਾਂ ਨੇ ਸੋਸ਼ਲ ਮੀਡੀਆ ਮੈਸੇਜਿੰਗ ਪਲੇਟਫਾਰਮ ‘ਤੇ ਉਨ੍ਹਾਂ ਦੀ ਨਕਲੀ ਪਹਿਚਾਣ ਬਣਾ ਕੇ ਉਨ੍ਹਾਂ ਦੇ ਇੱਕ ਕਰਮਚਾਰੀ ਨੂੰ ਠੱਗ ਲਿਆ ਅਤੇ ਇਸ ਤਰ੍ਹਾਂ 7.68 ਕਰੋੜ ਰੁਪਏ ਵੱਖ-ਵੱਖ ਬੈਂਕ ਖਾਤਿਆਂ ਵਿੱਚ ਟਰਾਂਸਫਰ ਕਰਵਾ ਲਏ।
ਪੁਲਿਸ ਮੁਤਾਬਕ ਇਹ ਧੋਖਾਧੜੀ 12 ਜੂਨ ਤੋਂ 16 ਜੂਨ ਦੇ ਦਰਮਿਆਨ ਹੋਈ। ਦੋਸ਼ੀਆਂ ਨੇ ਨਰੇਸ਼ ਗੁਜਰਾਲ ਦੀ ਤਸਵੀਰ ਦੀ ਵਰਤੋਂ ਕਰਕੇ ਇੱਕ ਜਾਅਲੀ ਮੈਸੇਜਿੰਗ ਅਕਾਊਂਟ ਬਣਾਇਆ ਹੈ ਅਤੇ ਉਸ ਕਰਮਚਾਰੀ ਨਾਲ ਸੰਪਰਕ ਕੀਤਾ ਹੈ , ਜੋ ਸਾਬਕਾ ਸੰਸਦ ਮੈਂਬਰ ਦੇ ਵਿੱਤੀ ਲੈਣ-ਦੇਣ ਦੀ ਦੇਖਭਾਲ ਕਰਨ ਲਈ ਅਧਿਕਾਰਤ ਸੀ।
ਕਰਮਚਾਰੀ ਨੇ ਇਹ ਸਮਝ ਕੇ ਕਿ ਸੁਨੇਹੇ ਨਰੇਸ਼ ਗੁਜਰਾਲ ਵੱਲੋਂ ਹੀ ਭੇਜੇ ਗਏ ਹਨ, ਉਨ੍ਹਾਂ ਦੇ ਨਿਰਦੇਸ਼ਾਂ ਅਨੁਸਾਰ ਕਈ ਬੈਂਕ ਖਾਤਿਆਂ ਵਿੱਚ ਵੱਡੀ ਰਕਮ ਟਰਾਂਸਫਰ ਕਰ ਦਿੱਤੀ। ਲੈਣ-ਦੇਣ ਪੂਰੇ ਹੋਣ ਤੋਂ ਬਾਅਦ ਜਦੋਂ ਸੁਨੇਹਿਆਂ ਦੀ ਅਸਲਿਯਤ ‘ਤੇ ਸ਼ੱਕ ਹੋਇਆ ਤਾਂ ਇਸ ਧੋਖਾਧੜੀ ਦਾ ਪਰਦਾਫਾਸ਼ ਹੋਇਆ।
ਪੁਲਿਸ ਨੇ ਦੱਸਿਆ ਕਿ ਇਸ ਤਰੀਕੇ ਨਾਲ ਕੁੱਲ 7.68 ਕਰੋੜ ਰੁਪਏ ਦੀ ਠੱਗੀ ਕੀਤੀ ਗਈ। ਮਾਮਲਾ ਦਰਜ ਕਰ ਲਿਆ ਗਿਆ ਹੈ ਅਤੇ ਜਾਂਚ ਟੀਮ ਬੈਂਕ ਖਾਤਿਆਂ, ਡਿਜੀਟਲ ਸਬੂਤਾਂ ਅਤੇ ਸੰਚਾਰ ਰਿਕਾਰਡਾਂ ਦੀ ਜਾਂਚ ਕਰ ਰਹੀ ਹੈ।
78 ਸਾਲਾ ਨਰੇਸ਼ ਗੁਜਰਾਲ ਸਾਬਕਾ ਪ੍ਰਧਾਨ ਮੰਤਰੀ ਇੰਦਰ ਕੁਮਾਰ ਗੁਜਰਾਲ ਦੇ ਪੁੱਤਰ ਹਨ। ਇੰਦਰ ਕੁਮਾਰ ਗੁਜਰਾਲ ਨੇ ਅਪ੍ਰੈਲ 1997 ਤੋਂ ਮਾਰਚ 1998 ਤੱਕ ਭਾਰਤ ਦੇ 12ਵੇਂ ਪ੍ਰਧਾਨ ਮੰਤਰੀ ਵਜੋਂ ਸੇਵਾ ਨਿਭਾਈ ਸੀ। ਨਰੇਸ਼ ਗੁਜਰਾਲ ਖੁਦ ਵੀ ਇੱਕ ਪ੍ਰਮੁੱਖ ਸਿਆਸੀ ਆਗੂ ਰਹੇ ਹਨ ਅਤੇ ਰਾਜ ਸਭਾ ਦੇ ਮੈਂਬਰ ਵਜੋਂ ਸੇਵਾ ਕਰ ਚੁੱਕੇ ਹਨ।
