ਮਿਰਜ਼ਾਪੁਰ/ਲਖਨਊ:18 ਮਈ (ਛਤਰਪਾਲ ਸਿੰਘ):ਉੱਤਰ ਪ੍ਰਦੇਸ਼ ਦੇ ਮਿਰਜ਼ਾਪੁਰ ਜ਼ਿਲ੍ਹੇ ਦੇ ਰਹਿਣ ਵਾਲੇ ਇੱਕ 25 ਸਾਲਾ ਭਾਰਤੀ ਮਰਚੈਂਟ ਨੇਵੀ ਅਫ਼ਸਰ ਮਨੀਸ਼ ਦਿਵੇਦੀ ਦੇ ਅਮਰੀਕਾ ਵਿੱਚ ਸ਼ੱਕੀ ਹਾਲਾਤ ਵਿੱਚ ਲਾਪਤਾ ਹੋਣ ਦੀ ਬੇਹੱਦ ਚਿੰਤਾਜਨਕ ਖ਼ਬਰ ਸਾਹਮਣੇ ਆਈ ਹੈ। ਮਨੀਸ਼ ਪਿਛਲੇ 10 ਦਿਨਾਂ ਤੋਂ ਅਮਰੀਕਾ ਦੇ ਪੈਨਸਿਲਵੇਨੀਆ ਰਾਜ ਵਿੱਚੋਂ ਲਾਪਤਾ ਹੈ, ਜਿਸ ਕਾਰਨ ਉਸ ਦੇ ਭਾਰਤ ਵਿੱਚ ਰਹਿ ਰਹੇ ਬਜ਼ੁਰਗ ਮਾਤਾ-ਪਿਤਾ ਅਤੇ ਪਰਿਵਾਰ ਗਹਿਰੇ ਸਦਮੇ ਵਿੱਚ ਹਨ ਅਤੇ ਕਿਸੇ ਅਣਹੋਣੀ ਦੇ ਡਰੋਂ ਬੁਰੀ ਤਰ੍ਹਾਂ ਘਬਰਾਏ ਹੋਏ ਹਨ।
ਸਾਥੀ ਵਾਪਸ ਆਏ, ਮਨੀਸ਼ ਨਹੀਂ ਪਰਤਿਆ
ਗਾਇਬ ਹੋਏ ਅਫ਼ਸਰ ਦੇ ਪਿਤਾ ਸੰਤੋਸ਼ ਦਿਵੇਦੀ ਨੇ ਘਟਨਾ ਦੇ ਵੇਰਵੇ ਸਾਂਝੇ ਕਰਦਿਆਂ ਦੱਸਿਆ ਕਿ ਬੀਤੀ 6 ਮਈ ਨੂੰ ਫਿਲਾਡੇਲਫੀਆ ਬੰਦਰਗਾਹ (Philadelphia Port) ’ਤੇ ਜਹਾਜ਼ ਰੁਕਣ ਤੋਂ ਬਾਅਦ, ਮਨੀਸ਼ ਆਪਣੇ ਦੋ ਰੂਸੀ ਸਾਥੀ ਅਧਿਕਾਰੀਆਂ ਨਾਲ ਉੱਥੋਂ ਦੇ ਇੱਕ ਸਥਾਨਕ ਸ਼ਾਪਿੰਗ ਮਾਲ ਵਿੱਚ ਗਿਆ ਸੀ। ਪਿਤਾ ਮੁਤਾਬਕ, ‘‘ਦੋਵੇਂ ਵਿਦੇਸ਼ੀ ਅਧਿਕਾਰੀ ਤਾਂ ਸ਼ਾਪਿੰਗ ਤੋਂ ਬਾਅਦ ਜਹਾਜ਼ ’ਤੇ ਸੁਰੱਖਿਅਤ ਵਾਪਸ ਆ ਗਏ, ਪਰ ਮਨੀਸ਼ ਵਾਪਸ ਨਹੀਂ ਪਰਤਿਆ ਅਤੇ ਉਦੋਂ ਤੋਂ ਹੀ ਉਸ ਦਾ ਮੋਬਾਈਲ ਅਤੇ ਹੋਰ ਸੰਪਰਕ ਸਾਧਨ ਪੂਰੀ ਤਰ੍ਹਾਂ ਬੰਦ ਆ ਰਹੇ ਹਨ।’’
7 ਮਈ ਦੀ ਸਵੇਰ ਨੂੰ ਆਇਆ ਸੀ ਆਖ਼ਰੀ ਮੈਸੇਜ
ਪਰਿਵਾਰ ਨੂੰ ਮਨੀਸ਼ ਵੱਲੋਂ ਆਖ਼ਰੀ ਸੰਦੇਸ਼ 7 ਮਈ ਦੀ ਸਵੇਰ ਨੂੰ ਮਿਲਿਆ ਸੀ। ਪਿਤਾ ਸੰਤੋਸ਼ ਦਿਵੇਦੀ ਨੇ ਦੱਸਿਆ, “ਜਦੋਂ ਜਹਾਜ਼ ਅਮਰੀਕੀ ਬੰਦਰਗਾਹ ’ਤੇ ਲੱਗਿਆ, ਤਾਂ ਉਸ ਸਮੇਂ ਭਾਰਤ ਵਿੱਚ ਸਵੇਰ ਦੇ ਲਗਭਗ 4 ਵਜੇ ਸਨ। ਮਨੀਸ਼ ਸਾਨੂੰ ਅਸਮੇਂ ਫ਼ੋਨ ਕਰਕੇ ਪਰੇਸ਼ਾਨ ਨਹੀਂ ਕਰਨਾ ਚਾਹੁੰਦਾ ਸੀ, ਇਸ ਲਈ ਉਸ ਨੇ ਸਿਰਫ਼ ਇੱਕ ਮੈਸੇਜ ਭੇਜਿਆ ਕਿ ‘ਜਹਾਜ਼ ਲੱਗ ਗਿਆ ਹੈ’। ਉਸ ਟੈਕਸਟ ਮੈਸੇਜ ਤੋਂ ਬਾਅਦ ਸਾਡੀ ਉਸ ਨਾਲ ਕੋਈ ਗੱਲਬਾਤ ਨਹੀਂ ਹੋ ਸਕੀ ਅਤੇ ਉਸ ਦਾ ਕੁਝ ਪਤਾ ਨਹੀਂ ਲੱਗ ਰਿਹਾ।”
ਵਿਦੇਸ਼ ਮੰਤਰਾਲੇ ਅਤੇ ਕੇਂਦਰੀ ਮੰਤਰੀ ਨੂੰ ਮਦਦ ਦੀ ਅਪੀਲ
ਪਿਛਲੇ ਕਈ ਦਿਨਾਂ ਤੋਂ ਅਮਰੀਕੀ ਪ੍ਰਸ਼ਾਸਨ ਅਤੇ ਸ਼ਿਪਿੰਗ ਕੰਪਨੀ ਵੱਲੋਂ ਕੋਈ ਪੁਖ਼ਤਾ ਜਾਣਕਾਰੀ ਨਾ ਮਿਲਣ ਕਾਰਨ ਪ੍ਰੇਸ਼ਾਨ ਪਰਿਵਾਰ ਨੇ ਹੁਣ ਭਾਰਤ ਸਰਕਾਰ ਦਾ ਬੂਹਾ ਖੜਕਾਇਆ ਹੈ। ਪੀੜਤ ਪਰਿਵਾਰ ਨੇ ਕੇਂਦਰੀ ਮੰਤਰੀ ਅਨੁਪ੍ਰਿਆ ਪਟੇਲ ਅਤੇ ਭਾਰਤੀ ਵਿਦੇਸ਼ ਮੰਤਰਾਲੇ (MEA) ਨੂੰ ਲਿਖਤੀ ਅਪੀਲ ਭੇਜ ਕੇ ਮਨੀਸ਼ ਦੀ ਸਲਾਮਤੀ ਯਕੀਨੀ ਬਣਾਉਣ ਅਤੇ ਅਮਰੀਕਾ ਵਿੱਚ ਭਾਰਤੀ ਦੂਤਾਵਾਸ ਰਾਹੀਂ ਉਸ ਦੀ ਭਾਲ ਲਈ ਤੁਰੰਤ ਵੱਡੇ ਪੱਧਰ ‘ਤੇ ਕਾਰਵਾਈ ਸ਼ੁਰੂ ਕਰਵਾਉਣ ਦੀ ਗੁਹਾਰ ਲਗਾਈ ਹੈ।
