ਸ੍ਰੀ ਅਨੰਦਪੁਰ ਸਾਹਿਬ, 8 ਮਈ 2026(ਛਤਰਪਾਲ ਸਿੰਘ): ਸਰਕਾਰੀ ਕਾਲਜ ਮਹੈਣ ਸ੍ਰੀ ਅਨੰਦਪੁਰ ਸਾਹਿਬ ਵਿਖੇ ਪ੍ਰਿੰਸੀਪਲ ਵਿਨੀਤਾ ਆਨੰਦ ਦੀ ਅਗਵਾਈ ਹੇਠ ਵਿਦਿਆਰਥੀਆਂ ਨੂੰ ਆਨਲਾਈਨ ਗੇਮਾਂ ਦੀ ਲਤ ਅਤੇ ਇਸ ਦੇ ਭਿਆਨਕ ਦੁਰਪ੍ਰਭਾਵਾਂ ਬਾਰੇ ਜਾਗਰੂਕ ਕਰਨ ਲਈ ਇੱਕ ਵਿਸ਼ੇਸ਼ ਸੈਮੀਨਾਰ ਕਰਵਾਇਆ ਗਿਆ। ਪ੍ਰੋ: ਵਿਪਨ ਕੁਮਾਰ ਨੇ ਦੱਸਿਆ ਕਿ ਇਸ ਸੈਮੀਨਾਰ ਦੌਰਾਨ ਵਿਦਿਆਰਥੀਆਂ ਨੇ ਹੈਰਾਨੀਜਨਕ ਅੰਕੜੇ ਪੇਸ਼ ਕਰਦਿਆਂ ਇਸ ਨੂੰ ਸਮਾਜਿਕ ਕੋਹੜ ਕਰਾਰ ਦਿੱਤਾ।
ਆਨਲਾਈਨ ਗੇਮਿੰਗ: ਬਰਬਾਦੀ ਦਾ ਵੱਡਾ ਬਾਜ਼ਾਰ
ਸੈਮੀਨਾਰ ਵਿੱਚ ਪਹਿਲਾ ਸਥਾਨ ਹਾਸਲ ਕਰਨ ਵਾਲੇ ਜਸਕਰਨ ਸਿੰਘ (ਬੀ.ਏ. ਭਾਗ ਦੂਜਾ) ਅਤੇ ਅਮਨਦੀਪ ਸਿੰਘ (ਬੀ.ਏ. ਭਾਗ ਤੀਜਾ) ਨੇ ਦੱਸਿਆ ਕਿ ਭਾਰਤ ਵਿੱਚ ਕਰੀਬ 45 ਕਰੋੜ ਲੋਕ ਆਨਲਾਈਨ ਗੇਮਾਂ ਖੇਡਦੇ ਹਨ। ਉਨ੍ਹਾਂ ਦੱਸਿਆ:
-
ਦੇਸ਼ ਵਿੱਚ ਸਾਲਾਨਾ ਕਰੀਬ 20 ਹਜ਼ਾਰ ਕਰੋੜ ਰੁਪਏ ਆਨਲਾਈਨ ਗੇਮਾਂ ‘ਤੇ ਬਰਬਾਦ ਹੋ ਰਹੇ ਹਨ।
-
ਸਾਲ 2025 ਤੱਕ ਭਾਰਤ ਦਾ ਆਨਲਾਈਨ ਗੇਮਿੰਗ ਬਾਜ਼ਾਰ 23 ਹਜ਼ਾਰ ਕਰੋੜ ਰੁਪਏ ਤੱਕ ਪਹੁੰਚ ਚੁੱਕਾ ਹੈ।
-
ਕਰਨਾਟਕ ਵਿੱਚ ਮਹਿਜ਼ 31 ਮਹੀਨਿਆਂ ‘ਚ ਇਸ ਲਤ ਕਾਰਨ 32 ਲੋਕਾਂ ਨੇ ਖ਼ੁਦਕੁਸ਼ੀ ਕੀਤੀ।
-
ਉੱਤਰ ਪ੍ਰਦੇਸ਼ ਦੇ ਇੱਕ 13 ਸਾਲਾ ਬੱਚੇ ਵੱਲੋਂ 14 ਲੱਖ ਰੁਪਏ ਹਾਰਨ ਮਗਰੋਂ ਅਤੇ ਮੈਸੂਰ ਦੇ ਇੱਕ ਪਰਿਵਾਰ ਵੱਲੋਂ 80 ਲੱਖ ਰੁਪਏ ਦੇ ਨੁਕਸਾਨ ਕਾਰਨ ਖ਼ੁਦਕੁਸ਼ੀ ਕਰਨ ਵਰਗੇ ਦੁਖਦਾਈ ਮਾਮਲੇ ਸਾਹਮਣੇ ਆਏ ਹਨ।
ਸਿਹਤ ਅਤੇ ਮਾਨਸਿਕਤਾ ‘ਤੇ ਮਾਰੂ ਅਸਰ
ਦੂਜੇ ਸਥਾਨ ‘ਤੇ ਰਹੀਆਂ ਨਾਜੀਆ ਅਤੇ ਜੋਤੀ ਨੇ ਦੱਸਿਆ ਕਿ ਘੰਟਿਆਂ ਬੱਧੀ ਸਕਰੀਨ ਸਾਹਮਣੇ ਬੈਠਣ ਨਾਲ ਨਾ ਸਿਰਫ਼ ਅੱਖਾਂ ਦੀ ਰੋਸ਼ਨੀ ਘਟਦੀ ਹੈ, ਸਗੋਂ ਚਿੜਚਿੜਾਪਣ, ਉਦਾਸੀ, ਇਕੱਲਾਪਨ ਅਤੇ ਸਰਵਾਈਕਲ ਵਰਗੀਆਂ ਗੰਭੀਰ ਸਰੀਰਕ ਸਮੱਸਿਆਵਾਂ ਪੈਦਾ ਹੁੰਦੀਆਂ ਹਨ। ਇਸ ਨਾਲ ਦਿਲ ਦੀ ਧੜਕਣ ਵਧਣ ਅਤੇ ਮਾਨਸਿਕ ਕਮਜ਼ੋਰੀ ਦਾ ਖ਼ਤਰਾ ਵੀ ਬਣਿਆ ਰਹਿੰਦਾ ਹੈ।
ਪੜ੍ਹਾਈ ਅਤੇ ਰਿਸ਼ਤਿਆਂ ‘ਚ ਦੂਰੀ
ਤੀਜੇ ਸਥਾਨ ‘ਤੇ ਰਹੀਆਂ ਸ਼ਿਖਾ ਰਾਨੀ ਅਤੇ ਅਨੂੰ ਦੇਵੀ ਨੇ ਚਿੰਤਾ ਪ੍ਰਗਟਾਈ ਕਿ ਬੱਚੇ ਪੜ੍ਹਾਈ ਤੋਂ ਦੂਰ ਹੋ ਕੇ ਮੋਬਾਈਲ ਵਿੱਚ ਗੁਆਚ ਰਹੇ ਹਨ, ਜਿਸ ਨਾਲ ਉਨ੍ਹਾਂ ਦੇ ਇਮਤਿਹਾਨਾਂ ਦੇ ਨਤੀਜੇ ਅਤੇ ਪਰਿਵਾਰਕ ਰਿਸ਼ਤੇ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋ ਰਹੇ ਹਨ। ਉਨ੍ਹਾਂ ਅਪੀਲ ਕੀਤੀ ਕਿ ਨੌਜਵਾਨਾਂ ਨੂੰ ਆਪਣੀ ਊਰਜਾ ਰਚਨਾਤਮਕ ਕਾਰਜਾਂ ਵਿੱਚ ਲਗਾਉਣੀ ਚਾਹੀਦੀ ਹੈ।
ਇਸ ਪ੍ਰੋਗਰਾਮ ਨੂੰ ਸਫ਼ਲ ਬਣਾਉਣ ਵਿੱਚ ਪ੍ਰੋ: ਬੋਬੀ, ਪ੍ਰੋ: ਅਮਿਤ ਕੁਮਾਰ ਯਾਦਵ ਅਤੇ ਪ੍ਰੋ: ਸਰਨਦੀਪ ਨੇ ਅਹਿਮ ਯੋਗਦਾਨ ਪਾਇਆ। ਅੰਤ ਵਿੱਚ ਬੁਲਾਰਿਆਂ ਨੇ ਕਿਹਾ ਕਿ ਅੱਜ ਮਾਪਿਆਂ ਅਤੇ ਅਧਿਆਪਕਾਂ ਲਈ ਇਹ ‘ਮੌਲਿਕ ਲੋੜ’ ਬਣ ਗਈ ਹੈ ਕਿ ਉਹ ਬੱਚਿਆਂ ਨੂੰ ਇਸ ਡਿਜੀਟਲ ਜਾਲ਼ ਤੋਂ ਬਚਾਉਣ।
