IRGC ਅਤੇ ਸਾਂਝੀਆਂ ਫੌਜਾਂ ਨੇ ਆਪ੍ਰੇਸ਼ਨ ਦੌਰਾਨ ਦੁਸ਼ਮਣ ਦੇ ਉਡਾਣ ਉਪਕਰਣ ਨਸ਼ਟ ਕਰਨ ਦਾ ਕੀਤਾ ਐਲਾਨ; ਅਮਰੀਕਾ ਵੱਲੋਂ ਹਾਲੇ ਤੱਕ ਪੁਸ਼ਟੀ ਨਹੀਂ
ਤਹਿਰਾਨ/ਇਸਫ਼ਹਾਨ: ਈਰਾਨ ਅਤੇ ਅਮਰੀਕਾ ਵਿਚਾਲੇ ਚੱਲ ਰਹੀ ਜੰਗੀ ਖਿੱਚੋਤਾਣ ਦੌਰਾਨ ਈਰਾਨੀ ਫੌਜ ਨੇ ਇੱਕ ਵੱਡਾ ਦਾਅਵਾ ਕਰਦਿਆਂ ਕਿਹਾ ਹੈ ਕਿ ਉਨ੍ਹਾਂ ਨੇ ਇਸਫ਼ਹਾਨ ਦੇ ਅਸਮਾਨ ਵਿੱਚ ਇੱਕ ਅਮਰੀਕੀ C-130 ਹਰਕਿਊਲਿਸ ਜਹਾਜ਼ ਨੂੰ ਮਾਰ ਗਿਰਾਇਆ ਹੈ। ਈਰਾਨੀ ਅਧਿਕਾਰੀਆਂ ਅਨੁਸਾਰ, ਇਹ ਜਹਾਜ਼ ਇੱਕ ਗੁਪਤ ਪਾਇਲਟ ਬਚਾਅ ਮਿਸ਼ਨ (Rescue Mission) ਵਿੱਚ ਸ਼ਾਮਲ ਸੀ।
ਪਰਮਾਣੂ ਕੇਂਦਰ ਦੇ ਨੇੜੇ ਕਾਰਵਾਈ
ਈਰਾਨ ਦੀ ਪੁਲਿਸ ਕਮਾਂਡ ਅਤੇ ਇਸਲਾਮਿਕ ਰੈਵੋਲਿਊਸ਼ਨਰੀ ਗਾਰਡ ਕੋਰ (IRGC) ਨੇ ਸਾਂਝੇ ਬਿਆਨ ਵਿੱਚ ਦੱਸਿਆ ਕਿ ਇਸਫ਼ਹਾਨ ਪ੍ਰਮਾਣੂ ਕੇਂਦਰ ਦੇ ਨੇੜੇ ਇੱਕ ਹੋਰ ਅਮਰੀਕੀ ਜਹਾਜ਼ ਨੂੰ ਨਿਸ਼ਾਨਾ ਬਣਾਇਆ ਗਿਆ। ਈਰਾਨੀ ਫੌਜ ਅਨੁਸਾਰ, “ਏਅਰਸਪੇਸ, ਜ਼ਮੀਨੀ ਫੌਜਾਂ, ਬਾਸੀਜ ਅਤੇ ਪੁਲਿਸ ਕਮਾਂਡ ਦੇ ਇੱਕ ਸਾਂਝੇ ਆਪ੍ਰੇਸ਼ਨ ਦੌਰਾਨ ਦੁਸ਼ਮਣ ਦੇ ਉਡਾਣ ਉਪਕਰਣਾਂ ਨੂੰ ਪੂਰੀ ਤਰ੍ਹਾਂ ਨਸ਼ਟ ਕਰ ਦਿੱਤਾ ਗਿਆ ਹੈ।”
ਅਮਰੀਕਾ ਦੀ ਪ੍ਰਤੀਕਿਰਿਆ
ਦੂਜੇ ਪਾਸੇ, ਅਮਰੀਕਾ ਨੇ ਇਸ ਮਿਸ਼ਨ ਦੌਰਾਨ ਆਪਣੇ ਦੋ ਬਲੈਕ ਹਾਕ ਹੈਲੀਕਾਪਟਰਾਂ ਦੇ ਤਬਾਹ ਹੋਣ ਦੀ ਪਹਿਲਾਂ ਹੀ ਪੁਸ਼ਟੀ ਕਰ ਦਿੱਤੀ ਸੀ, ਪਰ C-130 ਜਹਾਜ਼ ਦੇ ਡੇਗੇ ਜਾਣ ਬਾਰੇ ਅਜੇ ਤੱਕ ਵਾਸ਼ਿੰਗਟਨ ਵੱਲੋਂ ਕੋਈ ਅਧਿਕਾਰਤ ਟਿੱਪਣੀ ਨਹੀਂ ਕੀਤੀ ਗਈ ਹੈ। ਅਮਰੀਕੀ ਰੱਖਿਆ ਵਿਭਾਗ ਦੇ ਸੂਤਰਾਂ ਦਾ ਕਹਿਣਾ ਹੈ ਕਿ ਉਹ ਸਥਿਤੀ ਦਾ ਜਾਇਜ਼ਾ ਲੈ ਰਹੇ ਹਨ।
ਖੇਤਰ ਵਿੱਚ ਵਧਿਆ ਜੰਗ ਦਾ ਖ਼ਤਰਾ
ਈਰਾਨ ਦੇ ਇਸਫ਼ਹਾਨ ਇਲਾਕੇ ਵਿੱਚ ਹੋਈ ਇਸ ਕਾਰਵਾਈ ਨੇ ਖਾੜੀ ਦੇਸ਼ਾਂ ਵਿੱਚ ਹੜਕੰਪ ਮਚਾ ਦਿੱਤਾ ਹੈ। ਕਿਉਂਕਿ ਇਹ ਘਟਨਾ ਈਰਾਨ ਦੇ ਸੰਵੇਦਨਸ਼ੀਲ ਪਰਮਾਣੂ ਕੇਂਦਰ ਦੇ ਬਿਲਕੁਲ ਨੇੜੇ ਵਾਪਰੀ ਹੈ, ਇਸ ਲਈ ਮਾਹਰ ਇਸ ਨੂੰ ਦੋਵਾਂ ਦੇਸ਼ਾਂ ਵਿਚਾਲੇ ਸਿੱਧੀ ਜੰਗ ਦੀ ਸ਼ੁਰੂਆਤ ਵਜੋਂ ਦੇਖ ਰਹੇ ਹਨ। ਈਰਾਨੀ ਮੀਡੀਆ ਅਨੁਸਾਰ, ਦੇਸ਼ ਦੀਆਂ ਸਾਰੀਆਂ ਫੌਜੀ ਇਕਾਈਆਂ ਨੂੰ ਹਾਈ ਅਲਰਟ ‘ਤੇ ਰੱਖਿਆ ਗਿਆ ਹੈ।
