ਆਦਮਪੁਰ/ਜਲੰਧਰ: ਜੇਕਰ ਤੁਸੀਂ ਆਉਣ ਵਾਲੇ ਦਿਨਾਂ ਵਿੱਚ ਹਵਾਈ ਯਾਤਰਾ ਕਰਨ ਦੀ ਯੋਜਨਾ ਬਣਾ ਰਹੇ ਹੋ, ਤਾਂ ਇਹ ਖ਼ਬਰ ਤੁਹਾਡੇ ਲਈ ਬੇਹੱਦ ਅਹਿਮ ਹੈ। ਭਾਰਤੀ ਹਵਾਈ ਸੈਨਾ (IAF) ਵੱਲੋਂ ਰਨਵੇਅ ਦੀ ਮੁਰੰਮਤ (Recarpeting) ਦੇ ਕੰਮ ਕਾਰਨ ਪੰਜਾਬ ਦੇ ਆਦਮਪੁਰ, ਜੋਧਪੁਰ, ਸ੍ਰੀਨਗਰ ਅਤੇ ਪੁਣੇ ਹਵਾਈ ਅੱਡਿਆਂ ਤੋਂ ਉਡਾਣਾਂ ਪ੍ਰਭਾਵਿਤ ਰਹਿਣਗੀਆਂ।
ਆਦਮਪੁਰ ਹਵਾਈ ਅੱਡੇ ‘ਤੇ ਸਭ ਤੋਂ ਲੰਬੀ ਮਾਰ
ਪੰਜਾਬ ਦੇ ਯਾਤਰੀਆਂ, ਖ਼ਾਸਕਰ ਦੋਆਬਾ ਖੇਤਰ ਦੇ ਲੋਕਾਂ ਲਈ ਚਿੰਤਾ ਦੀ ਗੱਲ ਇਹ ਹੈ ਕਿ ਜਲੰਧਰ ਨੇੜਲੇ ਆਦਮਪੁਰ ਏਅਰ ਬੇਸ ‘ਤੇ ਉਡਾਣਾਂ ਸਭ ਤੋਂ ਲੰਬੇ ਸਮੇਂ ਲਈ ਬੰਦ ਰਹਿਣਗੀਆਂ। ਰਨਵੇਅ ਦੀ ਮੁਰੰਮਤ ਕਾਰਨ ਇੱਥੇ ਸਾਲ ਦੇ ਅੰਤ ਤੱਕ ਲਗਭਗ 8 ਮਹੀਨਿਆਂ ਲਈ ਹਵਾਈ ਸੇਵਾਵਾਂ ਮੁਅੱਤਲ ਰਹਿਣ ਦੀ ਉਮੀਦ ਹੈ।
ਹੋਰ ਹਵਾਈ ਅੱਡਿਆਂ ਦਾ ਸ਼ਡਿਊਲ:
ਰਨਵੇਅ ਦੇ ਕੰਮ ਕਾਰਨ ਬਾਕੀ ਸ਼ਹਿਰਾਂ ਵਿੱਚ ਵੀ ਹਵਾਈ ਸੇਵਾਵਾਂ ਪੜਾਅਵਾਰ ਤਰੀਕੇ ਨਾਲ ਪ੍ਰਭਾਵਿਤ ਹੋਣਗੀਆਂ:
-
ਜੋਧਪੁਰ ਏਅਰਪੋਰਟ: ਇੱਥੇ 29 ਮਾਰਚ ਤੋਂ 27 ਅਪ੍ਰੈਲ ਤੱਕ ਫਲਾਈਟਾਂ ਪੂਰੀ ਤਰ੍ਹਾਂ ਬੰਦ ਰਹਿਣਗੀਆਂ। ਇੰਡੀਗੋ ਅਤੇ ਏਅਰ ਇੰਡੀਆ ਵਰਗੀਆਂ ਕੰਪਨੀਆਂ ਨੇ 28 ਮਾਰਚ ਤੋਂ ਬਾਅਦ ਦੀ ਬੁਕਿੰਗ ਪਹਿਲਾਂ ਹੀ ਬੰਦ ਕਰ ਦਿੱਤੀ ਹੈ।
-
ਸ੍ਰੀਨਗਰ ਏਅਰਪੋਰਟ: ਅਗਸਤ ਤੋਂ ਅਕਤੂਬਰ ਦੇ ਵਿਚਕਾਰ ਹਰ ਵੀਕੈਂਡ (ਸ਼ਨਿੱਚਰਵਾਰ-ਐਤਵਾਰ) ‘ਤੇ ਉਡਾਣਾਂ ਪ੍ਰਭਾਵਿਤ ਹੋਣਗੀਆਂ। ਇਸ ਤੋਂ ਇਲਾਵਾ 16 ਅਕਤੂਬਰ ਤੋਂ 5 ਨਵੰਬਰ ਤੱਕ ਹਵਾਈ ਅੱਡਾ ਮੁਕੰਮਲ ਰੂਪ ਵਿੱਚ ਬੰਦ ਰਹੇਗਾ।
-
ਪੁਣੇ ਏਅਰਪੋਰਟ: ਇੱਥੇ ਵੀ ਮੁਰੰਮਤ ਦੀ ਯੋਜਨਾ ਹੈ, ਹਾਲਾਂਕਿ ਤਰੀਕਾਂ ਦਾ ਅਧਿਕਾਰਤ ਐਲਾਨ ਹੋਣਾ ਅਜੇ ਬਾਕੀ ਹੈ।
ਯਾਤਰੀਆਂ ਲਈ ਸਲਾਹ
ਹਵਾਈ ਅੱਡਿਆਂ ਦੇ ਬੰਦ ਹੋਣ ਕਾਰਨ ਯਾਤਰੀਆਂ ਨੂੰ ਸਲਾਹ ਦਿੱਤੀ ਜਾਂਦੀ ਹੈ ਕਿ ਉਹ ਆਪਣੀ ਟਿਕਟ ਬੁੱਕ ਕਰਨ ਤੋਂ ਪਹਿਲਾਂ ਸਬੰਧਤ ਏਅਰਲਾਈਨਜ਼ ਦੀ ਵੈੱਬਸਾਈਟ ‘ਤੇ ਉਡਾਣਾਂ ਦੀ ਉਪਲਬਧਤਾ ਜ਼ਰੂਰ ਚੈੱਕ ਕਰ ਲੈਣ। ਆਦਮਪੁਰ ਜਾਣ ਵਾਲੇ ਯਾਤਰੀਆਂ ਨੂੰ ਹੁਣ ਬਦਲਵੇਂ ਰੂਪ ਵਿੱਚ ਅੰਮ੍ਰਿਤਸਰ ਜਾਂ ਚੰਡੀਗੜ੍ਹ ਹਵਾਈ ਅੱਡਿਆਂ ਦੀ ਵਰਤੋਂ ਕਰਨੀ ਪੈ ਸਕਦੀ ਹੈ।
