ਵਾਸ਼ਿੰਗਟਨ ਡੀ.ਸੀ. [ਅਮਰੀਕਾ], 20 ਜਨਵਰੀ 2026 (ANI): ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਪੁਸ਼ਟੀ ਕੀਤੀ ਹੈ ਕਿ ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੂੰ ਪ੍ਰਸਤਾਵਿਤ ਗਾਜ਼ਾ ਬੋਰਡ ਆਫ਼ ਪੀਸ ਵਿੱਚ ਸ਼ਾਮਿਲ ਹੋਣ ਲਈ ਸੱਦਾ ਦਿੱਤਾ ਗਿਆ ਹੈ। ਟਰੰਪ ਨੇ ਪੁਤਿਨ ਨੂੰ ਉਹਨਾਂ ਵਿਸ਼ਵ ਨੇਤਾਵਾਂ ਵਿੱਚੋਂ ਇੱਕ ਦੱਸਿਆ ਹੈ, ਜੋ ਇਸ ਅੰਤਰਰਾਸ਼ਟਰੀ ਪਹਿਲ ਦਾ ਹਿੱਸਾ ਬਣ ਸਕਦੇ ਹਨ।
ਮੀਡੀਆ ਨਾਲ ਗੱਲਬਾਤ ਦੌਰਾਨ ਟਰੰਪ ਨੇ ਕਿਹਾ ਕਿ ਗਾਜ਼ਾ ਬੋਰਡ ਆਫ਼ ਪੀਸ ਮੱਧ ਪੂਰਬ ਵਿੱਚ ਚੱਲ ਰਹੇ ਸੰਘਰਸ਼ ਨੂੰ ਖਤਮ ਕਰਨ ਲਈ ਤਿਆਰ ਕੀਤੇ ਗਏ 20-ਪੌਇੰਟ ਪੀਸ ਪਲਾਨ ਦੇ ਫੇਜ਼-2 ਦਾ ਹਿੱਸਾ ਹੈ। ਇਸ ਬੋਰਡ ਦਾ ਮਕਸਦ ਗਾਜ਼ਾ ਪੱਟੀ ਵਿੱਚ ਸਥਿਰਤਾ ਕਾਇਮ ਕਰਨਾ ਅਤੇ ਜੰਗ ਤੋਂ ਬਾਅਦ ਪੁਨਰ-ਨਿਰਮਾਣ ਦੀ ਨਿਗਰਾਨੀ ਕਰਨਾ ਹੈ।
ਰਿਪੋਰਟਰਾਂ ਦੇ ਸਵਾਲਾਂ ਦੇ ਜਵਾਬ ਵਿੱਚ ਟਰੰਪ ਨੇ ਕਿਹਾ, “ਹਾਂ, ਪੁਤਿਨ ਉਨ੍ਹਾਂ ਲੋਕਾਂ ਵਿੱਚੋਂ ਇੱਕ ਹਨ। ਇਹ ਸਾਰੇ ਵਿਸ਼ਵ ਨੇਤਾ ਹਨ ਅਤੇ ਜਵਾਬ ਹਾਂ ਹੈ।” ਟਰੰਪ ਨੇ ਦੱਸਿਆ ਕਿ ਇਸ ਬੋਰਡ ਵਿੱਚ ਦੁਨੀਆ ਭਰ ਦੇ ਲਗਭਗ 60 ਦੇਸ਼ਾਂ ਦੇ ਨੇਤਾਵਾਂ ਨੂੰ ਸ਼ਾਮਿਲ ਹੋਣ ਦਾ ਸੱਦਾ ਦਿੱਤਾ ਗਿਆ ਹੈ।
ਵ੍ਹਾਈਟ ਹਾਊਸ ਵੱਲੋਂ ਜਾਰੀ ਬਿਆਨ ਅਨੁਸਾਰ, ਗਾਜ਼ਾ ਬੋਰਡ ਆਫ਼ ਪੀਸ ਦੇ ਐਗਜ਼ਿਕਿਊਟਿਵ ਮੈਂਬਰ ਗਵਰਨੈਂਸ ਮਜ਼ਬੂਤੀ, ਖੇਤਰੀ ਸੰਬੰਧ, ਪੁਨਰ-ਨਿਰਮਾਣ, ਨਿਵੇਸ਼ ਆਕਰਸ਼ਣ, ਵੱਡੇ ਪੱਧਰ ਦੀ ਫੰਡਿੰਗ ਅਤੇ ਕੈਪੀਟਲ ਮੋਬਿਲਾਈਜ਼ੇਸ਼ਨ ਵਰਗੇ ਅਹਿਮ ਮਾਮਲਿਆਂ ਦੀ ਦੇਖਰੇਖ ਕਰਨਗੇ।
ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਵੀ ਟਰੰਪ ਵੱਲੋਂ ਇਸ ਬੋਰਡ ਵਿੱਚ ਸ਼ਾਮਿਲ ਹੋਣ ਦਾ ਸੱਦਾ ਦਿੱਤਾ ਗਿਆ ਹੈ। ਯੋਜਨਾ ਅਨੁਸਾਰ, ਜੋ ਦੇਸ਼ 1 ਅਰਬ ਡਾਲਰ ਦੀ ਰਕਮ ਯੋਗਦਾਨ ਦੇਣਗੇ, ਉਨ੍ਹਾਂ ਨੂੰ ਬੋਰਡ ਵਿੱਚ ਸਥਾਈ ਸੀਟ ਮਿਲੇਗੀ, ਜਦਕਿ ਹੋਰ ਦੇਸ਼ ਤਿੰਨ ਸਾਲਾਂ ਲਈ ਮੈਂਬਰ ਬਣ ਸਕਣਗੇ।
ਇਸੇ ਦੌਰਾਨ ਟਰੰਪ ਨੇ ਫ਼ਰਾਂਸ ਦੇ ਰਾਸ਼ਟਰਪਤੀ ਇਮੈਨੂਅਲ ਮੈਕਰੋਂ ਨੂੰ ਵੀ ਨਿਸ਼ਾਨੇ ’ਤੇ ਲਿਆ। ਮੀਡੀਆ ਰਿਪੋਰਟਾਂ ਮੁਤਾਬਕ ਮੈਕਰੋਂ ਵੱਲੋਂ ਬੋਰਡ ਵਿੱਚ ਸ਼ਾਮਿਲ ਹੋਣ ਤੋਂ ਇਨਕਾਰ ਕਰਨ ’ਤੇ ਟਰੰਪ ਨੇ ਫ਼ਰਾਂਸ ਤੋਂ ਆਉਣ ਵਾਲੀ ਵਾਈਨ ਅਤੇ ਸ਼ੈਂਪੇਨ ’ਤੇ 200 ਫੀਸਦੀ ਟੈਰਿਫ਼ ਲਗਾਉਣ ਦੀ ਧਮਕੀ ਦਿੱਤੀ।
ਟਰੰਪ ਨੇ ਤੰਜ਼ ਕਰਦਿਆਂ ਕਿਹਾ, “ਕੋਈ ਵੀ ਉਸਨੂੰ ਨਹੀਂ ਚਾਹੁੰਦਾ ਕਿਉਂਕਿ ਉਹ ਜਲਦੀ ਹੀ ਅਹੁਦੇ ਤੋਂ ਬਾਹਰ ਹੋਣ ਵਾਲਾ ਹੈ।” ਉਨ੍ਹਾਂ ਨੇ ਹੋਰ ਕਿਹਾ, “ਮੈਂ ਉਸ ਦੀ ਵਾਈਨ ਅਤੇ ਸ਼ੈਂਪੇਨ ’ਤੇ 200 ਫੀਸਦੀ ਟੈਰਿਫ਼ ਲਗਾ ਦਿਆਂਗਾ, ਫਿਰ ਉਹ ਆਪ ਹੀ ਸ਼ਾਮਿਲ ਹੋ ਜਾਵੇਗਾ, ਹਾਲਾਂਕਿ ਉਸ ’ਤੇ ਕੋਈ ਜ਼ਬਰਦਸਤੀ ਨਹੀਂ।”
ਗਾਜ਼ਾ ਬੋਰਡ ਆਫ਼ ਪੀਸ ਨੂੰ ਲੈ ਕੇ ਅੰਤਰਰਾਸ਼ਟਰੀ ਸਿਆਸਤ ਵਿੱਚ ਨਵੀਂ ਚਰਚਾ ਛਿੜ ਗਈ ਹੈ ਅਤੇ ਆਉਣ ਵਾਲੇ ਦਿਨਾਂ ਵਿੱਚ ਇਸ ਪਹਿਲ ਦੇ ਗਲੋਬਲ ਪ੍ਰਭਾਵ ਸਾਫ਼ ਹੋਣ ਦੀ ਸੰਭਾਵਨਾ ਹੈ।
