ਚੰਡੀਗੜ੍ਹ 14 ਦਸੰਬਰ (ਛਤਰਪਾਲ ਸਿੰਘ): ਰਾਜ ਚੋਣ ਕਮਿਸ਼ਨ ਵੱਲੋਂ ਪੰਜਾਬ ਵਿੱਚ ਜ਼ਿਲ੍ਹਾ ਪ੍ਰੀਸ਼ਦ ਅਤੇ ਬਲਾਕ ਸੰਮਤੀ ਚੋਣਾਂ ਦੌਰਾਨ ਕੁਝ ਬੂਥਾਂ ‘ਤੇ ਮੁੜ ਵੋਟਿੰਗ ਕਰਵਾਉਣ ਦੇ ਹੁਕਮ ਜਾਰੀ ਕੀਤੇ ਗਏ ਹਨ। ਕਮਿਸ਼ਨ ਅਨੁਸਾਰ 16 ਦਸੰਬਰ 2025 ਨੂੰ ਵੱਖ-ਵੱਖ ਜ਼ਿਲ੍ਹਿਆਂ ਦੇ ਕੁੱਲ ਚੁਣੇ ਹੋਏ ਬੂਥਾਂ ‘ਤੇ ਦੁਬਾਰਾ ਵੋਟਾਂ ਪਾਈਆਂ ਜਾਣਗੀਆਂ।
ਕਮਿਸ਼ਨ ਨੇ ਦੱਸਿਆ ਕਿ ਰਾਜ ਭਰ ਵਿੱਚ 22 ਜ਼ਿਲ੍ਹਾ ਪ੍ਰੀਸ਼ਦਾਂ ਦੇ 347 ਜ਼ੋਨਾਂ ਅਤੇ 153 ਪੰਚਾਇਤ ਸੰਮਤੀਆਂ ਦੇ 2838 ਜ਼ੋਨਾਂ ਲਈ ਹੋਈਆਂ ਆਮ ਚੋਣਾਂ ਸ਼ਾਂਤੀਪੂਰਵਕ ਅਤੇ ਤਸੱਲੀਬਖ਼ਸ਼ ਢੰਗ ਨਾਲ ਸੰਪੰਨ ਹੋਈਆਂ ਹਨ। ਕਿਤੇ ਵੀ ਕਿਸੇ ਜਾਨੀ ਨੁਕਸਾਨ ਜਾਂ ਵੱਡੀ ਹਿੰਸਕ ਘਟਨਾ ਦੀ ਰਿਪੋਰਟ ਨਹੀਂ ਮਿਲੀ।
ਰਾਜ ਚੋਣ ਕਮਿਸ਼ਨ ਵੱਲੋਂ ਹੇਠ ਲਿਖੀਆਂ ਥਾਵਾਂ ‘ਤੇ ਮੁੜ-ਪੋਲਿੰਗ ਦੇ ਹੁਕਮ ਦਿੱਤੇ ਗਏ ਹਨ:
- ਜ਼ਿਲ੍ਹਾ ਅੰਮ੍ਰਿਤਸਰ — ਬਲਾਕ ਸੰਮਤੀ ਅਟਾਰੀ ਦੇ ਜ਼ੋਨ ਨੰਬਰ 08 (ਖਾਸਾ) ਦੇ ਬੂਥ ਨੰਬਰ 52, 53, 54 ਅਤੇ 55, ਅਤੇ ਜ਼ੋਨ ਨੰਬਰ 17 (ਵਰਪਾਲ ਕਲਾਂ) ਦੇ ਬੂਥ ਨੰਬਰ 90, 91, 93, 94 ਅਤੇ 95।
- ਜ਼ਿਲ੍ਹਾ ਬਰਨਾਲਾ — ਬਲਾਕ ਸੰਮਤੀ ਚੰਨਣਵਾਲ, ਜ਼ੋਨ ਨੰਬਰ 04, ਪਿੰਡ ਰਾਏਸਰ ਪਟਿਆਲਾ ਦਾ ਬੂਥ ਨੰਬਰ 20।
- ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ — ਬਲਾਕ ਕੋਟ ਭਾਈ ਦੇ ਪਿੰਡ ਬਾਬਨੀਆ (ਬੂਥ ਨੰਬਰ 63 ਅਤੇ 64) ਅਤੇ ਪਿੰਡ ਮਧੀਰ (ਬੂਥ ਨੰਬਰ 21 ਅਤੇ 22)।
- ਜ਼ਿਲ੍ਹਾ ਗੁਰਦਾਸਪੁਰ — ਪਿੰਡ ਚੰਨ੍ਹੀਆ ਦਾ ਪੋਲਿੰਗ ਸਟੇਸ਼ਨ ਨੰਬਰ 124।
- ਜ਼ਿਲ੍ਹਾ ਜਲੰਧਰ — ਪੰਚਾਇਤ ਸੰਮਤੀ ਭੋਗਪੁਰ, ਜ਼ੋਨ ਨੰਬਰ 4 ਦਾ ਪੋਲਿੰਗ ਬੂਥ ਨੰਬਰ 72।
ਰਾਜ ਚੋਣ ਕਮਿਸ਼ਨ ਮੁਤਾਬਕ ਮੁੜ ਵੋਟਿੰਗ 16 ਦਸੰਬਰ 2025 ਨੂੰ ਸਵੇਰੇ 8 ਵਜੇ ਤੋਂ ਸ਼ਾਮ 4 ਵਜੇ ਤੱਕ ਕਰਵਾਈ ਜਾਵੇਗੀ, ਜਦਕਿ ਇਨ੍ਹਾਂ ਬੂਥਾਂ ਦੀ ਗਿਣਤੀ 17 ਦਸੰਬਰ 2025 ਨੂੰ ਆਮ ਗਿਣਤੀ ਦੇ ਨਾਲ ਕੀਤੀ ਜਾਵੇਗੀ।
