ਫਰੀਦਕੋਟ:( ਸ਼.ਅ.ਬਿਓਰੋ) : ਸੁਖਾਂਵਾਲਾ ਪਿੰਡ ‘ਚ ਨੌਜਵਾਨ ਗੁਰਵਿੰਦਰ ਸਿੰਘ ਦੀ ਦਰਦਨਾਕ ਮੌਤ ਦੇ ਮਾਮਲੇ ਵਿੱਚ ਪੁਲਿਸ ਨੇ ਪਰਤਾਂ ਖੋਲ੍ਹਦਿਆਂ ਹੈਰਾਨ ਕਰਨ ਵਾਲੀ ਸੱਚਾਈ ਸਾਹਮਣੇ ਲਿਆਈ ਹੈ। ਜਾਂਚ ਅਨੁਸਾਰ, ਗੁਰਵਿੰਦਰ ਦੀ ਆਪਣੀ ਪਤਨੀ ਰੁਪਿੰਦਰ ਕੌਰ ਅਤੇ ਉਸ ਦੇ ਪ੍ਰੇਮੀ ਹਰਕੰਵਲ ਸਿੰਘ ਨੇ ਮਿਲ ਕੇ ਯੋਜਨਾ ਤਹਿਤ ਕਤਲ ਕੀਤਾ।
ਪਹਿਲਾਂ ਜ਼ਹਿਰ, ਫਿਰ ਗਲਾ ਘੁੱਟ ਕੇ ਮਾਰਿਆ
ਪੋਸਟਮਾਰਟਮ ਰਿਪੋਰਟ ਵਿੱਚ ਇਹ ਸਾਫ਼ ਹੋਇਆ ਕਿ ਗੁਰਵਿੰਦਰ ਨੂੰ ਜ਼ਹਿਰ ਦਿੱਤਾ ਗਿਆ ਸੀ ਅਤੇ ਉਸ ਤੋਂ ਬਾਅਦ ਗਲਾ ਘੁੱਟ ਕੇ ਉਸਦੀ ਹੱਤਿਆ ਕੀਤੀ ਗਈ। ਰਿਪੋਰਟ ਵਿੱਚ 10–12 ਸੱਟਾਂ ਦੇ ਨਿਸ਼ਾਨ ਵੀ ਮਿਲੇ ਹਨ, ਜੋ ਹਿੰਸਾ ਵੱਲ ਇਸ਼ਾਰਾ ਕਰਦੇ ਹਨ।
ਪੁਲਿਸ ਮੁਤਾਬਕ ਰੁਪਿੰਦਰ ਕੌਰ ਨੇ ਕਤਲ ਦੌਰਾਨ ਆਪਣੇ ਪਤੀ ਦੀ ਬਾਂਹ ਫੜੀ ਹੋਈ ਸੀ, ਜਦਕਿ ਹਰਕੰਵਲ ਨੇ ਉਸ ਦਾ ਗਲਾ ਦਬਾ ਕੇ ਮੌਤ ਦੇ ਘਾਟ ਉਤਾਰ ਦਿੱਤਾ।
ਕਤਲ ਤੋਂ ਬਾਅਦ ਚੰਡੀਗੜ੍ਹ ਭੱਜੇ, ਮੁੰਬਈ ਜਾਣ ਦੀ ਤਿਆਰੀ
ਕਤਲ ਕਰਕੇ ਹਰਕੰਵਲ ਸਿੰਘ ਆਪਣੇ ਦੋਸਤ ਵਿਸ਼ਵਜੀਤ ਨਾਲ ਚੰਡੀਗੜ੍ਹ ਨਿਕਲ ਗਿਆ। ਉਸ ਨੇ ਆਪਣੇ ਦੋਸਤ ਨੂੰ ਸੱਚ ਦੱਸਿਆ ਵੀ ਨਹੀਂ ਅਤੇ ਮੁੰਬਈ ਭੱਜਣ ਦੀ ਯੋਜਨਾ ਬਣਾ ਰਿਹਾ ਸੀ। ਇਸੇ ਦੌਰਾਨ ਪਰਿਵਾਰ ਤੋਂ ਮਿਲੀ ਜਾਣਕਾਰੀ ਦੇ ਅਧਾਰ ’ਤੇ ਕਿ ਪੁਲਿਸ ਉਸਦੇ ਘਰ ਪਹੁੰਚ ਚੁੱਕੀ ਹੈ ਅਤੇ ਉਸਦੇ ਪਿਤਾ ਨੂੰ ਵੀ ਕਾਬੂ ਕਰ ਚੁੱਕੀ ਹੈ—ਹਰਕੰਵਲ ਗਭਰਾ ਗਿਆ।
ਉਹ ਚੰਡੀਗੜ੍ਹ ਤੋਂ ਇਕੱਲਾ ਹੀ ਵਾਪਸ ਫਰੀਦਕੋਟ ਆਇਆ ਅਤੇ ਸਿੱਧਾ ਅਦਾਲਤ ਵਿੱਚ ਆਤਮ ਸਮਰਪਣ ਕਰ ਦਿੱਤਾ। ਬਾਅਦ ਵਿੱਚ ਪੁਲਿਸ ਨੇ ਵਿਸ਼ਵਦੀਪ ਨੂੰ ਵੀ ਗ੍ਰਿਫ਼ਤਾਰ ਕਰ ਲਿਆ।
ਕਮੀਜ਼ ਸੜਕ ‘ਤੇ ਸੁੱਟੀ, ਪੁਲਿਸ ਨੇ ਕੀਤੀ ਬਰਾਮਦ
ਪੁਲਿਸ ਦਾ ਕਹਿਣਾ ਹੈ ਕਿ ਕਤਲ ਤੋਂ ਬਾਅਦ ਹਰਕੰਵਲ ਗੁਰਵਿੰਦਰ ਦੀ ਕਮੀਜ਼ ਆਪਣੇ ਨਾਲ ਲੈ ਗਿਆ ਅਤੇ ਫਿਰ ਰਸਤੇ ਵਿਚ ਸੁੱਟ ਦਿੱਤੀ। ਸਟੇਸ਼ਨ ਇੰਚਾਰਜ ਨੂੰ ਪਏ ਕੱਪੜੇ ‘ਤੇ ਸ਼ੱਕ ਹੋਇਆ ਅਤੇ ਜਾਂਚ ਦੌਰਾਨ ਇਹ ਮਹੱਤਵਪੂਰਨ ਸਬੂਤ ਵਜੋਂ ਮਿਲ ਗਿਆ।
ਮਾਮਲੇ ਦੀ ਜਾਂਚ ਹੋਰ ਗੰਭੀਰ ਰੁੱਖ ‘ਤੇ
ਪੁਲਿਸ ਹੁਣ ਇਹ ਪੜਤਾਲ ਕਰ ਰਹੀ ਹੈ ਕਿ ਕਤਲ ਦੀ ਯੋਜਨਾ ਕਿੰਨੇ ਸਮੇਂ ਤੋਂ ਬਣ ਰਹੀ ਸੀ ਅਤੇ ਜ਼ਹਿਰ ਕਿਵੇਂ ਪ੍ਰਾਪਤ ਕੀਤਾ ਗਿਆ। ਪਤਨੀ ਰੁਪਿੰਦਰ ਕੌਰ ਅਤੇ ਹਰਕੰਵਲ ਸਿੰਘ ਖ਼ਿਲਾਫ਼ ਕਤਲ ਅਤੇ ਸਾਜ਼ਿਸ਼ ਦੇ ਸਖ਼ਤ ਧਾਰਾਵਾਂ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ।
ਫਰੀਦਕੋਟ ਦਾ ਇਹ ਕਤਲ ਕਾਂਡ ਪੂਰੇ ਇਲਾਕੇ ਵਿੱਚ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ।
