ਵਿਆਹ ਸਮਾਰੋਹ ਤੋਂ ਵਾਪਸੀ ਦੌਰਾਨ ਬਰਾਤੀਆਂ ਨੇ ਕੀਤਾ ਕਾਤਿਲਾਨਾ ਹਮਲਾ
ਰੋਹਤਕ, 30 ਨਵੰਬਰ: (ਛਤਰਪਾਲ ਸਿੰਘ): ਰੋਹਤਕ ਜ਼ਿਲ੍ਹੇ ਦੇ ਪਿੰਡ ਹੁਮਾਯੂੰਪੁਰ ਦੇ 28 ਸਾਲਾ ਰਾਸ਼ਟਰੀ ਪੈਰਾ ਪਾਵਰਲਿਫਟਰ ਰੋਹਿਤ ਦੀ ਪੀ.ਜੀ.ਆਈ.ਐਮ.ਐਸ. ਰੋਹਤਕ ਵਿੱਚ ਦੋ ਦਿਨ ਮੌਤ ਨਾਲ ਜੂਝਣ ਤੋਂ ਬਾਅਦ ਦਰਦਨਾਕ ਮੌਤ ਹੋ ਗਈ। ਰੋਹਿਤ ‘ਤੇ ਭਿਵਾਨੀ ਵਿੱਚ ਇੱਕ ਵਿਆਹ ਸਮਾਰੋਹ ਵਿਚ 15–20 ਬਰਾਤੀਆਂ ਨੇ ਕਾਤਿਲਾਨਾ ਹਮਲਾ ਕੀਤਾ ਸੀ।
ਵਿਆਹ ਸਮਾਰੋਹ ਵਿੱਚ ਅਸ਼ਲੀਲ ਵਿਵਹਾਰ ਦਾ ਵਿਰੋਧ ਬਣਿਆ ਝਗੜੇ ਦਾ ਕਾਰਨ
ਘਟਨਾ 27 ਨਵੰਬਰ ਦੀ ਸ਼ਾਮ ਦੀ ਹੈ। ਰੋਹਿਤ ਆਪਣੇ ਦੋਸਤ ਨਾਲ ਉਸਦੇ ਰਿਸ਼ਤੇਦਾਰ ਦੇ ਵਿਆਹ ਵਿੱਚ ਸ਼ਾਮਲ ਹੋਣ ਗਏ ਸਨ। ਵਰਮਾਲਾ ਸਮਾਰੋਹ ਦੌਰਾਨ ਕੁਝ ਮਹਿਮਾਨਾਂ ਦੇ ਅਸ਼ਲੀਲ ਵਿਵਹਾਰ ਦਾ ਜਦੋਂ ਉਨ੍ਹਾਂ ਨੇ ਵਿਰੋਧ ਕੀਤਾ ਤਾਂ ਝਗੜਾ ਹੋ ਗਿਆ। ਵਿਆਹ ਤੋਂ ਵਾਪਸੀ ਦੌਰਾਨ ਤਗਦਾਨਾ ਪਿੰਡ ਦੇ 15–20 ਬਰਾਤੀਆਂ ਨੇ ਰੋਹਿਤ ਅਤੇ ਉਸਦੇ ਦੋਸਤ ਨੂੰ ਘੇਰ ਲਿਆ ਤੇ ਲੋਹੇ ਦੀਆਂ ਰਾਡਾਂ ਅਤੇ ਹਾਕੀ ਸਟਿਕਾਂ ਨਾਲ ਬੇਰਹਿਮੀ ਨਾਲ ਮਾਰਿਆ।
ਜ਼ਖਮੀ ਹਾਲਤ ਵਿੱਚ ਦਾਖਲਾ, ਦੋ ਦਿਨ ਬਾਅਦ ਦਮ ਤੋੜਿਆ
ਹਮਲੇ ਵਿੱਚ ਗੰਭੀਰ ਜ਼ਖਮੀ ਰੋਹਿਤ ਨੂੰ ਪਹਿਲਾਂ ਭਿਵਾਨੀ ਦੇ ਜਨਰਲ ਹਸਪਤਾਲ ਲਿਜਾਇਆ ਗਿਆ, ਜਿਥੇ ਹਾਲਤ ਬਿਗੜਣ ‘ਤੇ ਉਨ੍ਹਾਂ ਨੂੰ ਪੀ.ਜੀ.ਆਈ.ਐਮ.ਐਸ. ਰੋਹਤਕ ਰੈਫਰ ਕੀਤਾ ਗਿਆ। ਇਲਾਜ ਦੇ ਬਾਵਜੂਦ ਰੋਹਿਤ ਆਪਣੀਆਂ ਸੱਟਾਂ ਕਾਰਨ ਬਚ ਨਹੀਂ ਸਕੇ।
ਰੋਹਿਤ ਦੀ ਪ੍ਰਾਪਤੀਆਂ
- ਦੋ ਵਾਰ ਜੂਨੀਅਰ ਪੈਰਾ ਨੈਸ਼ਨਲ ਰਿਕਾਰਡ ਧਾਰਕ
- ਸੱਤ ਵਾਰ ਸੀਨੀਅਰ ਪੈਰਾ ਨੈਸ਼ਨਲ ਚੈਂਪੀਅਨ
- ਭਾਰਤ ਦੀ ਅੰਤਰਰਾਸ਼ਟਰੀ ਪੱਧਰ ‘ਤੇ ਪੈਰਾ ਪਾਵਰਲਿਫਟਿੰਗ ਵਿੱਚ ਪ੍ਰਤੀਨਿਧਤਾ
ਰੋਹਿਤ ਦੀ ਮੌਤ ਨਾਲ ਖੇਡ ਜਗਤ ਵਿੱਚ ਸੋਗ ਦੀ ਲਹਿਰ ਹੈ।
ਛੇ ਦੋਸ਼ੀ ਹਿਰਾਸਤ ਵਿੱਚ, ਜਾਂਚ ਜਾਰੀ
ਜਾਂਚ ਅਧਿਕਾਰੀ ਦੇਵੇਂਦਰ ਕੁਮਾਰ ਨੇ ਦੱਸਿਆ ਕਿ ਵਿਆਹ ਦੌਰਾਨ ਹੋਏ ਵਵਾਦ ਨੂੰ ਹੀ ਹਮਲੇ ਦਾ ਮੁੱਖ ਕਾਰਨ ਮੰਨਿਆ ਜਾ ਰਿਹਾ ਹੈ। ਪੁਲਿਸ ਨੇ ਤਗਦਾਨਾ ਪਿੰਡ ਦੇ ਲਗਭਗ ਛੇ ਸ਼ੱਕੀ ਲੋਕਾਂ ਨੂੰ ਹਿਰਾਸਤ ਵਿੱਚ ਲੈ ਲਿਆ ਹੈ ਅਤੇ ਹਮਲੇ ਵਿੱਚ ਵਰਤੀ ਗਈ ਗੱਡੀ ਵੀ ਜ਼ਬਤ ਕਰ ਲਈ ਹੈ।
ਪੁਲਿਸ ਨੇ ਕਿਹਾ ਹੈ ਕਿ ਪੂਰੀ ਜਾਂਚ ਤੋਂ ਬਾਅਦ ਦੋਸ਼ ਸਾਬਤ ਹੋਣ ‘ਤੇ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ। ਰੋਹਿਤ ਦੀ ਅਚਾਨਕ ਮੌਤ ਨੇ ਸਥਾਨਕ ਲੋਕਾਂ ਅਤੇ ਖੇਡ ਭਾਈਚਾਰੇ ਨੂੰ ਝੰਝੋੜ ਕੇ ਰੱਖ ਦਿੱਤਾ ਹੈ।
