ਵਾਸ਼ਿੰਗਟਨ : (ਸ਼.ਅ.ਬਿਓਰੋ) : ਇੱਕ ਤਾਜ਼ਾ ਅਮਰੀਕੀ ਰਿਪੋਰਟ ਵਿੱਚ ਦਾਅਵਾ ਕੀਤਾ ਗਿਆ ਹੈ ਕਿ ਚੀਨ ਨੇ ਮਈ 2025 ਵਿੱਚ ਭਾਰਤ ਅਤੇ ਪਾਕਿਸਤਾਨ ਵਿਚਕਾਰ ਹੋਏ ਚਾਰ ਦਿਨਾਂ ਦੇ ਛੋਟੇ ਜਿਹੇ ਟਕਰਾਅ ਨੂੰ ਆਪਣੇ ਨਵੇਂ ਫੌਜੀ ਹਥਿਆਰਾਂ ਦੀ ਮੈਦਾਨੀ ਜਾਂਚ ਅਤੇ ਇਸ਼ਤਿਹਾਰਬਾਜ਼ੀ ਲਈ ਵਰਤਿਆ। ਹਾਲਾਂਕਿ ਚੀਨ ਸਿੱਧੇ ਤੌਰ ’ਤੇ ਟਕਰਾਅ ਵਿੱਚ ਸ਼ਾਮਲ ਨਹੀਂ ਹੋਇਆ, ਪਰ ਇਸਨੇ ਹਾਲਾਤ ਦਾ ਫਾਇਦਾ ਉਠਾਉਂਦੇ ਹੋਏ ਆਪਣੇ ਹਥਿਆਰਾਂ ਦੀ ਸਮਰੱਥਾ ਦਾ ਪ੍ਰਦਰਸ਼ਨ ਕੀਤਾ।
ਅਮਰੀਕੀ ਕਾਂਗਰਸ ਦੀ ਯੂਐਸ-ਚਾਈਨਾ ਆਰਥਿਕ ਅਤੇ ਸੁਰੱਖਿਆ ਸਮੀਖਿਆ ਕਮਿਸ਼ਨ ਦੁਆਰਾ ਜਾਰੀ ਕੀਤੀ ਰਿਪੋਰਟ ਦੇ ਅਨੁਸਾਰ, ਚੀਨ ਨੇ ਇਸ ਟਕਰਾਅ ਨੂੰ ‘ਲਾਈਵ ਟੈਸਟਿੰਗ ਗਰਾਊਂਡ’ ਵਜੋਂ ਵਰਤਦਿਆਂ HQ-9 ਏਅਰ ਡਿਫੈਂਸ ਸਿਸਟਮ, PL-15 ਏਅਰ-ਟੂ-ਏਅਰ ਮਿਜ਼ਾਈਲ ਅਤੇ J-10 ਜੈੱਟ ਵਰਗੇ ਉੱਨਤ ਹਥਿਆਰ ਪਹਿਲੀ ਵਾਰ ਅਸਲੀ ਲੜਾਈ ਦੀ ਸਥਿਤੀ ਵਿੱਚ ਤਾਇਨਾਤ ਕੀਤੇ। ਇਸ ਨਾਲ ਚੀਨ ਨੂੰ ਕਾਫੀ ਅਸਲ ਡੇਟਾ ਮਿਲਿਆ, ਜਿਸਨੂੰ ਬਾਅਦ ਵਿੱਚ ਅੰਤਰਰਾਸ਼ਟਰੀ ਹਥਿਆਰ ਮਾਰਕੀਟ ਵਿੱਚ ਆਪਣੇ ਸਾਮਾਨ ਦੇ ਪ੍ਰਚਾਰ ਲਈ ਵਰਤਿਆ ਗਿਆ।
ਰਿਪੋਰਟ ਦਾ ਕਹਿਣਾ ਹੈ ਕਿ ਇਹ ਤਰੀਕਾ ਚੀਨ ਦੇ ਵਧਦੇ ਰੱਖਿਆ ਉਦਯੋਗੀ ਅਰਮਾਨਾਂ ਅਤੇ ਭਾਰਤ ਨਾਲ ਸਰਹੱਦੀ ਤਣਾਅ ਦੇ ਮਾਹੌਲ ਵਿੱਚ ਇਸਦੇ ਰਣਨੀਤਕ ਹਿੱਤਾਂ ਲਈ ਲਾਹੇਵੰਦ ਸਾਬਤ ਹੋਇਆ।
ਇਹ ਵੀ ਦਾਅਵਾ ਕੀਤਾ ਗਿਆ ਹੈ ਕਿ ਜੂਨ 2025 ਵਿੱਚ ਚੀਨ ਨੇ ਪਾਕਿਸਤਾਨ ਨੂੰ 40 J-35 ਪੰਜਵੀਂ ਪੀੜ੍ਹੀ ਦੇ ਜੰਗੀ ਜਹਾਜ਼ਾਂ, KJ-500 ਜਹਾਜ਼ ਅਤੇ ਬੈਲਿਸਟਿਕ ਮਿਜ਼ਾਈਲ ਰੱਖਿਆ ਪ੍ਰਣਾਲੀਆਂ ਦੀ ਵਿਕਰੀ ਦੀ ਪੇਸ਼ਕਸ਼ ਕੀਤੀ। ਟਕਰਾਅ ਤੋਂ ਬਾਅਦ ਚੀਨੀ ਦੂਤਾਵਾਸਾਂ ਵੱਲੋਂ ਜਨਤਕ ਤੌਰ ’ਤੇ ਇਹ ਕਿਹਾ ਗਿਆ ਕਿ ਭਾਰਤ-ਪਾਕਿਸਤਾਨ ਝੜਪਾਂ ਵਿੱਚ ਚੀਨੀ ਹਥਿਆਰਾਂ ਦਾ ਪ੍ਰਦਰਸ਼ਨ ਵੱਖਰਾ ਅਤੇ ਸਫਲ ਰਿਹਾ, ਜਿਸਦਾ ਉਦੇਸ਼ ਵਿਸ਼ਵ ਪੱਧਰ ’ਤੇ ਚੀਨ ਦੀ ਰੱਖਿਆ ਵਿਕਰੀ ਵਿੱਚ ਵਾਧਾ ਕਰਨਾ ਸੀ।
