ਪਟਨਾ: (ਜਤਿੰਦਰ ਗਰਗ) : ਬਿਹਾਰ ਵਿਧਾਨ ਸਭਾ ਚੋਣਾਂ 2025 ਦੇ ਪਹਿਲੇ ਪੜਾਅ ਵਿੱਚ 243 ਵਿੱਚੋਂ 121 ਹਲਕਿਆਂ ‘ਚ 6 ਨਵੰਬਰ ਨੂੰ ਹੋਈ ਵੋਟਿੰਗ ਦੌਰਾਨ ਰਿਕਾਰਡ 64.69 ਪ੍ਰਤੀਸ਼ਤ ਵੋਟਰ ਟਰਨਆਉਟ ਦਰਜ ਕੀਤਾ ਗਿਆ। ਚੋਣ ਆਯੋਗ ਦੇ ਅਨੁਸਾਰ, ਇਹ ਬਿਹਾਰ ਦੇ ਇਤਿਹਾਸ ਵਿੱਚ ਕਿਸੇ ਵੀ ਰਾਜ ਜਾਂ ਲੋਕ ਸਭਾ ਚੋਣ ਲਈ ਸਭ ਤੋਂ ਵੱਧ ਵੋਟਿੰਗ ਦਰ ਹੈ।
ਚੋਣਾਂ ਦਾ ਦੂਜਾ ਪੜਾਅ 11 ਨਵੰਬਰ ਨੂੰ ਹੋਵੇਗਾ, ਜਿਸ ਵਿੱਚ ਬਾਕੀ ਰਹਿੰਦੇ 122 ਹਲਕਿਆਂ ਲਈ ਵੋਟ ਪਾਈ ਜਾਵੇਗੀ। ਨਤੀਜੇ 14 ਨਵੰਬਰ ਨੂੰ ਘੋਸ਼ਿਤ ਕੀਤੇ ਜਾਣਗੇ।
ਇਸ ਵਾਰ ਬਿਹਾਰ ਦਾ ਰਾਜਨੀਤਿਕ ਮੈਦਾਨ ਮੁੱਖ ਤੌਰ ‘ਤੇ ਰਾਸ਼ਟਰੀ ਜਨਤਕ ਗਠਜੋੜ (NDA) ਅਤੇ ਵਿਰੋਧੀ ਮਹਾਗਠਬੰਧਨ ਵਿਚਕਾਰ ਸਿੱਧੀ ਟੱਕਰ ਦਾ ਗਵਾਹ ਬਣ ਰਿਹਾ ਹੈ।
NDA ਵਿਚ ਭਾਜਪਾ ਅਤੇ ਜਨਤਾ ਦਲ (ਯੂਨਾਈਟਡ) ਸਮੇਤ ਕਈ ਸਾਥੀ ਪਾਰਟੀਆਂ ਸ਼ਾਮਲ ਹਨ, ਜਦਕਿ ਮਹਾਗਠਬੰਧਨ ਵਿਚ ਰਾਸ਼ਟਰੀ ਜਨਤਾ ਦਲ (RJD) ਅਤੇ ਕਾਂਗਰਸ ਮੁੱਖ ਸਾਥੀ ਹਨ।
ਇਸ ਤੋਂ ਇਲਾਵਾ, ਪ੍ਰਸ਼ਾਂਤ ਕਿਸੋਰ ਦੀ ਜਨ ਸੁਰਾਜ ਪਾਰਟੀ ਅਤੇ ਅਸਦੁੱਦੀਨ ਓਵੇਸੀ ਦੀ AIMIM ਵੀ ਚੋਣੀ ਮੈਦਾਨ ਵਿੱਚ ਹੈ। ਯਾਦ ਰਹੇ ਕਿ 2020 ਦੀਆਂ ਚੋਣਾਂ ਵਿੱਚ AIMIM ਨੇ ਸੀਮਾਂਚਲ ਖੇਤਰ ਤੋਂ ਪੰਜ ਸੀਟਾਂ ਜਿੱਤੀਆਂ ਸਨ — ਇਹ ਖੇਤਰ ਇਸ ਵਾਰ ਦੂਜੇ ਪੜਾਅ ਵਿੱਚ ਵੋਟਿੰਗ ਕਰੇਗਾ।
ਸੱਤਾ ਧਾਰੀ NDA ਮੁੱਖ ਮੰਤਰੀ ਨੀਤਿਸ਼ ਕੁਮਾਰ ਦੇ 20 ਸਾਲਾਂ ਦੇ ਸ਼ਾਸਨ ਅਤੇ ਕੇਂਦਰ ਵਿੱਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ 11 ਸਾਲਾਂ ਦੀ ਸਰਕਾਰ ਦੇ ਵਿਕਾਸ ਮਾਡਲ ‘ਤੇ ਮੁੜ ਚੋਣ ਮੰਗ ਰਹੀ ਹੈ। ਦੂਜੇ ਪਾਸੇ, ਮਹਾਗਠਬੰਧਨ ਨੇ ਸਰਕਾਰ ਵਿਰੁੱਧ ਬੇਰੁਜ਼ਗਾਰੀ, ਭ੍ਰਿਸ਼ਟਾਚਾਰ ਅਤੇ ਕੁਸ਼ਾਸਨ ਦੇ ਮੁੱਦੇ ਉੱਠਾਏ ਹਨ।
ਅੱਜ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਔਰੰਗਾਬਾਦ ਅਤੇ ਭਭੂਆ ਵਿੱਚ ਚੋਣ ਰੈਲੀਆਂ ਨੂੰ ਸੰਬੋਧਨ ਕਰਨਗੇ, ਜਦਕਿ ਵਿਰੋਧੀ ਪੱਖ ਵਲੋਂ ਤੇਜਸਵੀ ਯਾਦਵ ਅਤੇ ਰਾਹੁਲ ਗਾਂਧੀ ਵੀ ਬਿਹਾਰ ਵਿੱਚ ਚੋਣ ਪ੍ਰਚਾਰ ਕਰਣਗੇ।
