ਫਰੀਦਾਬਾਦ ‘ਚ ਮਿਲਕ ਪਾਊਡਰ ਬਣਾਉਣ ਵਾਲੀ ਕੰਪਨੀ ਦੇ ਨਮੂਨੇ ਹੋਏ ਫੇਲ
ਫਰੀਦਾਬਾਦ/ਹਰਿਆਣਾ : ਹਰਿਆਣਾ ਦੇ ਫਰੀਦਾਬਾਦ ਆਈ.ਐਮ.ਟੀ. ਖੇਤਰ ਵਿੱਚ ਸਥਿਤ ਨਿਊਟ੍ਰੀਮੇਡ ਹੈਲਥ ਕੇਅਰ ਕੰਪਨੀ ਵੱਲੋਂ ਬਣਾਇਆ ਗਿਆ ਛੇ ਮਹੀਨੇ ਤੱਕ ਦੇ ਬੱਚਿਆਂ ਲਈ ਦੁੱਧ ਪਾਊਡਰ ਖੁਰਾਕ ਅਤੇ ਸੁਰੱਖਿਆ ਵਿਭਾਗ ਦੀ ਜਾਂਚ ਵਿੱਚ ਅਸੁਰੱਖਿਅਤ ਪਾਇਆ ਗਿਆ ਹੈ। ਲੈਬ ਰਿਪੋਰਟ ਮਿਲਣ ਤੋਂ ਬਾਅਦ ਵਿਭਾਗ ਨੇ ਕੰਪਨੀ ਨੂੰ ਨੋਟਿਸ ਭੇਜਦਿਆਂ ਤੁਰੰਤ ਉਸ ਬੈਚ ਦੇ ਸਾਰੇ ਉਤਪਾਦ ਬਾਜ਼ਾਰ ਤੋਂ ਹਟਾਉਣ ਦੇ ਹੁਕਮ ਦਿੱਤੇ ਹਨ।
ਫੂਡ ਐਂਡ ਸੇਫਟੀ ਅਧਿਕਾਰੀ ਡਾ. ਪ੍ਰਿਥਵੀ ਸਿੰਘ ਨੇ ਜਾਣਕਾਰੀ ਦਿੰਦਿਆਂ ਕਿਹਾ ਕਿ ਦੀਵਾਲੀ ਤੋਂ ਪਹਿਲਾਂ ਵੱਖ-ਵੱਖ ਭੋਜਨ ਪਦਾਰਥਾਂ — ਜਿਵੇਂ ਕਿ ਮਠਿਆਈਆਂ, ਮਾਵਾ, ਛੋਲੇ, ਚਟਨੀ ਅਤੇ ਸ਼ਿਸ਼ੂ ਦੁੱਧ ਪਾਊਡਰ — ਦੇ 67 ਨਮੂਨੇ ਇਕੱਠੇ ਕੀਤੇ ਗਏ ਸਨ। ਹੁਣ ਤੱਕ 18 ਨਮੂਨਿਆਂ ਦੀਆਂ ਰਿਪੋਰਟਾਂ ਮਿਲੀਆਂ ਹਨ, ਜਿਨ੍ਹਾਂ ਵਿੱਚੋਂ ਮਾਵੇ, ਛੋਲੇ ਦੇ ਆਟੇ ਅਤੇ ਨਿਊਟ੍ਰੀਮੇਡ ਦੇ ਦੁੱਧ ਪਾਊਡਰ ਦੇ ਨਮੂਨੇ ਫੇਲ੍ਹ ਹੋ ਗਏ ਹਨ।
ਇਸ ਖੁਲਾਸੇ ਤੋਂ ਬਾਅਦ ਮਾਪਿਆਂ ਅਤੇ ਸਿਹਤ ਅਧਿਕਾਰੀਆਂ ਵਿੱਚ ਚਿੰਤਾ ਦਾ ਮਾਹੌਲ ਬਣ ਗਿਆ ਹੈ, ਕਿਉਂਕਿ ਛੇ ਮਹੀਨੇ ਤੋਂ ਘੱਟ ਉਮਰ ਦੇ ਬੱਚਿਆਂ ਦੀ ਰੋਗ-ਪਰਤੀਰੋਧਕ ਸਮਰੱਥਾ ਕਮਜ਼ੋਰ ਹੁੰਦੀ ਹੈ ਅਤੇ ਘਟੀਆ ਗੁਣਵੱਤਾ ਵਾਲਾ ਪਾਊਡਰ ਬੱਚਿਆਂ ਦੀ ਸਿਹਤ ਲਈ ਗੰਭੀਰ ਖਤਰਾ ਪੈਦਾ ਕਰ ਸਕਦਾ ਹੈ।
ਕੰਪਨੀ ਦੇ ਮਾਲਕ ਟੀ.ਐਨ. ਤਿਵਾੜੀ ਨੇ ਦੋਸ਼ਾਂ ਨੂੰ ਸਾਜ਼ਿਸ਼ ਕਹਿੰਦੇ ਹੋਏ ਕਿਹਾ ਕਿ ਨਿਊਟ੍ਰੀਮੇਡ ਭਾਰਤ ਦੀ ਇਕ ਤੇਜ਼ੀ ਨਾਲ ਉਭਰ ਰਹੀ ਕੰਪਨੀ ਹੈ ਜੋ ਵਿਦੇਸ਼ੀ ਬ੍ਰਾਂਡਾਂ ਨੂੰ ਤਗੜਾ ਮੁਕਾਬਲਾ ਦੇ ਰਹੀ ਹੈ। ਉਨ੍ਹਾਂ ਨੇ ਵਿਭਾਗ ਤੋਂ ਨਮੂਨਿਆਂ ਦੀ ਦੁਬਾਰਾ ਜਾਂਚ ਦੀ ਮੰਗ ਕੀਤੀ ਹੈ।
ਡਾ. ਪ੍ਰਿਥਵੀ ਸਿੰਘ ਦੇ ਅਨੁਸਾਰ, ਅਸੁਰੱਖਿਅਤ ਦੁੱਧ ਪਾਊਡਰ ਬੱਚਿਆਂ ਵਿੱਚ ਦਸਤ, ਸੰਕਰਮਣ, ਗੁਰਦੇ ਅਤੇ ਜਿਗਰ ਨਾਲ ਸੰਬੰਧਤ ਬਿਮਾਰੀਆਂ ਦਾ ਕਾਰਨ ਬਣ ਸਕਦਾ ਹੈ। ਵਿਭਾਗ ਨੇ ਸਾਰੀਆਂ ਸਬੰਧਤ ਕੰਪਨੀਆਂ ਅਤੇ ਵਿਕਰੇਤਾਵਾਂ ਨੂੰ 30 ਦਿਨਾਂ ਦੇ ਅੰਦਰ ਜਵਾਬ ਦੇਣ ਦਾ ਆਦੇਸ਼ ਦਿੱਤਾ ਹੈ।
