ਇਸਤਾਂਬੁਲ / ਇਸਲਾਮਾਬਾਦ : ਪਾਕਿਸਤਾਨ ਦੇ ਰੱਖਿਆ ਮੰਤਰੀ ਖਵਾਜਾ ਮੁਹੰਮਦ ਆਸਿਫ ਨੇ ਸਨਿਚਰਵਾਰ ਨੂੰ ਅਫਗਾਨਿਸਤਾਨ ਨਾਲ ਚੱਲ ਰਹੀਆਂ ਗੱਲਬਾਤਾਂ ਬਾਰੇ ਤਿੱਖੀ ਚਿਤਾਵਨੀ ਦਿੱਤੀ ਹੈ। ਉਨ੍ਹਾਂ ਕਿਹਾ ਹੈ ਕਿ ਜੇਕਰ ਇਸਤਾਂਬੁਲ ਵਿੱਚ ਹੋ ਰਹੀਆਂ ਚਰਚਾਵਾਂ ਦੌਰਾਨ ਦੋਵੇਂ ਦੇਸ਼ ਸਮਝੌਤੇ ’ਤੇ ਨਹੀਂ ਪਹੁੰਚੇ, ਤਾਂ ਹਾਲਾਤ ‘ਖੁੱਲ੍ਹੀ ਜੰਗ’ ਦਾ ਰੂਪ ਧਾਰ ਸਕਦੇ ਹਨ।
ਆਸਿਫ ਨੇ ਖ਼ਬਰ ਏਜੰਸੀ ਰਾਇਟਰਜ਼ ਨਾਲ ਗੱਲਬਾਤ ਦੌਰਾਨ ਕਿਹਾ, “ਅਫਗਾਨਿਸਤਾਨ ਸ਼ਾਂਤੀ ਚਾਹੁੰਦਾ ਹੈ, ਪਰ ਜੇ ਸਮਝੌਤਾ ਨਹੀਂ ਹੁੰਦਾ ਤਾਂ ਇਸਦਾ ਮਤਲਬ ਖੁੱਲ੍ਹੀ ਜੰਗ ਹੈ।”
ਦੋਵੇਂ ਦੇਸ਼ਾਂ ਵਿਚਾਲੇ ਤਣਾਅ ਤੇ ਗੱਲਬਾਤਾਂ ਦਾ ਦੂਜਾ ਦੌਰ
ਪਾਕਿਸਤਾਨੀ ਅਖ਼ਬਾਰ ਡਾਅਨ ਦੇ ਅਨੁਸਾਰ, ਅਫਗਾਨਿਸਤਾਨ ਅਤੇ ਪਾਕਿਸਤਾਨ ਵਿਚਾਲੇ ਗੱਲਬਾਤਾਂ ਦਾ ਦੂਜਾ ਦੌਰ ਸਨਿਚਰਵਾਰ ਨੂੰ ਤੁਰਕੀ ਦੇ ਇਸਤਾਂਬੁਲ ’ਚ ਸ਼ੁਰੂ ਹੋਇਆ। ਇਹ ਚਰਚਾਵਾਂ ਦੋ ਹਫ਼ਤਿਆਂ ਤੋਂ ਚੱਲ ਰਹੀਆਂ ਤੀਬਰ ਸਰਹੱਦੀ ਝੜਪਾਂ ਤੋਂ ਬਾਅਦ ਹੋ ਰਹੀਆਂ ਹਨ। ਦੋਵੇਂ ਪੱਖਾਂ ਦਾ ਟੀਚਾ ਸੁਰੱਖਿਆ ਚਿੰਤਾਵਾਂ ਨੂੰ ਦੂਰ ਕਰਨਾ ਅਤੇ ਸਾਂਝੀ ਸਰਹੱਦ ਉੱਤੇ ਸਥਾਈ ਜੰਗਬੰਦੀ ਸਥਾਪਤ ਕਰਨਾ ਹੈ।
ਇਨ੍ਹਾਂ ਝੜਪਾਂ ਵਿੱਚ ਨਾਗਰਿਕਾਂ ਸਮੇਤ ਦਰਜਨਾਂ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਹਿੰਸਾ ਦੀ ਸ਼ੁਰੂਆਤ ਮੱਧ ਕਾਬੁਲ ਵਿੱਚ ਹੋਏ ਧਮਾਕਿਆਂ ਤੋਂ ਹੋਈ ਸੀ, ਜਿਨ੍ਹਾਂ ਲਈ ਤਾਲਿਬਾਨ ਸਰਕਾਰ ਨੇ ਪਾਕਿਸਤਾਨ ਨੂੰ ਜ਼ਿੰਮੇਵਾਰ ਠਹਿਰਾਇਆ ਸੀ। ਇਸ ਤੋਂ ਬਾਅਦ ਸਰਹੱਦ ਉੱਤੇ ਦੋਹਾਂ ਪਾਸਿਆਂ ਵੱਲੋਂ ਜਵਾਬੀ ਹਮਲੇ ਹੋਏ। ਸ਼ੁਰੂ ਵਿੱਚ ਦੋਵੇਂ ਦੇਸ਼ ਜੰਗਬੰਦੀ ਉੱਤੇ ਸਹਿਮਤ ਹੋਏ ਸਨ, ਪਰ ਕੁਝ ਹੀ ਦਿਨਾਂ ਵਿੱਚ ਇਹ ਟੁੱਟ ਗਈ ਅਤੇ ਕਾਬੁਲ ਨੇ ਇਸਲਾਮਾਬਾਦ ਨੂੰ ਜ਼ਿੰਮੇਵਾਰ ਦੱਸਿਆ।
ਇਸਤਾਂਬੁਲ ਵਿਚ ਸ਼ਾਂਤੀ ਲਈ ਨਵੀਂ ਕੋਸ਼ਿਸ਼ਾਂ
ਸਨਿਚਰਵਾਰ ਨੂੰ ਇਸਤਾਂਬੁਲ ਵਿੱਚ ਹੋਈ ਗੱਲਬਾਤ ਦੌਰਾਨ ਉਮੀਦ ਜਤਾਈ ਜਾ ਰਹੀ ਹੈ ਕਿ ਦੋਵੇਂ ਪਾਸੇ ਦੋਹਾ ਗੱਲਬਾਤ ਵਿੱਚ ਹੋਏ ਸਮਝੌਤਿਆਂ ਦੇ ਆਧਾਰ ’ਤੇ ਸਥਿਰਤਾ ਬਣਾਈ ਰੱਖਣ ਲਈ ਨਵੀਂ ਰੂਪਰੇਖਾ ਤਿਆਰ ਕਰਨਗੇ। ਗੱਲਬਾਤ ਦੇ ਸਥਾਨ ਅਤੇ ਸਮੇਂ ਬਾਰੇ ਸਰਕਾਰੀ ਤੌਰ ’ਤੇ ਕੋਈ ਜਾਣਕਾਰੀ ਸਾਹਮਣੇ ਨਹੀਂ ਆਈ।
ਇਸ ਮੀਟਿੰਗ ਵਿੱਚ ਅਫਗਾਨਿਸਤਾਨ ਦੇ ਉਪ ਗ੍ਰਹਿ ਮੰਤਰੀ ਹਾਜੀ ਨਜੀਬ ਦੀ ਅਗਵਾਈ ਵਾਲਾ ਵਫ਼ਦ ਸ਼ਾਮਲ ਹੈ, ਜੋ ਸ਼ੁਕਰਵਾਰ ਨੂੰ ਤੁਰਕੀ ਪਹੁੰਚਿਆ ਸੀ। ਦੋਵੇਂ ਦੇਸ਼ਾਂ ਵਿਚਾਲੇ ਵਧਦੇ ਤਣਾਅ ਨੇ ਖੇਤਰੀ ਸੁਰੱਖਿਆ ਲਈ ਗੰਭੀਰ ਚਿੰਤਾਵਾਂ ਪੈਦਾ ਕਰ ਦਿੱਤੀਆਂ ਹਨ।
