ਕਾਬੁਲ : ਅਫਗਾਨਿਸਤਾਨ ਨੇ ਇੱਕ ਵਾਰ ਫਿਰ ਆਪਣੇ ਖੇਤਰੀ ਸਬੰਧਾਂ ਵਿੱਚ ਨਵੀਂ ਦਿਸ਼ਾ ਲੈਂਦਿਆਂ ਚੀਨ ਨਾਲ ਕੂਟਨੀਤਕ ਨੇੜਤਾ ਵਧਾਉਣ ਦਾ ਸੰਕੇਤ ਦਿੱਤਾ ਹੈ। ਬੀਤੇ ਦਿਨ ਅਫਗਾਨਿਸਤਾਨ ਦੇ ਡਿਪਟੀ ਵਿਦੇਸ਼ ਮੰਤਰੀ ਮੁਹੰਮਦ ਨਈਮ ਅਤੇ ਚੀਨ ਦੇ ਰਾਜਦੂਤ ਯੂ ਸ਼ਿਆਓਯੋਂਗ ਵਿਚਕਾਰ ਹੋਈ ਮਹੱਤਵਪੂਰਣ ਮੀਟਿੰਗ ਨੇ ਕਈ ਜਿਓ-ਪੋਲਿਟਿਕਲ ਸੁਨੇਹੇ ਛੱਡੇ ਹਨ।
ਨਈਮ ਨੇ ਮੀਟਿੰਗ ਦੌਰਾਨ ਕਿਹਾ ਕਿ ਚੀਨ ਅਤੇ ਅਫਗਾਨਿਸਤਾਨ ਗੁਆਂਢੀ ਦੇਸ਼ ਹੋਣ ਦੇ ਨਾਤੇ ਖੇਤਰੀ ਸਥਿਰਤਾ ਲਈ ਮਿਲ ਕੇ ਕੰਮ ਕਰਨਗੇ। ਉਨ੍ਹਾਂ ਨੇ ਜ਼ੋਰ ਦਿੱਤਾ ਕਿ ਦੋਵਾਂ ਦੇਸ਼ਾਂ ਵਿਚਕਾਰ ਇਤਿਹਾਸਕ, ਆਰਥਿਕ ਅਤੇ ਸੱਭਿਆਚਾਰਕ ਸਮਾਨਤਾਵਾਂ ਸਬੰਧਾਂ ਨੂੰ ਹੋਰ ਮਜ਼ਬੂਤ ਕਰਨਗੀਆਂ।
ਇਸ ਮੁਲਾਕਾਤ ਦੌਰਾਨ ਦੋਵਾਂ ਆਗੂਆਂ ਨੇ ਖੇਤਰੀ ਸੁਰੱਖਿਆ, ਵਪਾਰਕ ਸਹਿਯੋਗ ਅਤੇ ਪਾਕਿਸਤਾਨ-ਤਾਲਿਬਾਨ ਤਣਾਅ ’ਤੇ ਵੀ ਵਿਸਥਾਰ ਨਾਲ ਚਰਚਾ ਕੀਤੀ। ਨਈਮ ਨੇ ਇਸ ਮੌਕੇ ਤੇ ਪਾਕਿਸਤਾਨ ’ਤੇ ਸਖ਼ਤ ਸ਼ਬਦਾਂ ਵਿੱਚ ਨਿਸ਼ਾਨਾ ਲਾਉਂਦਿਆਂ ਕਿਹਾ ਕਿ,
“ਪਾਕਿਸਤਾਨ ਪਿਛਲੇ ਚਾਰ ਸਾਲਾਂ ਤੋਂ ਇਸਲਾਮਿਕ ਅਮੀਰਾਤ ਦੇ ਸਬਰ ਦੀ ਪਰਖ ਕਰ ਰਿਹਾ ਹੈ, ਪਰ ਅਸੀਂ ਆਪਣੇ ਦੇਸ਼ ਦੀ ਸਰਹੱਦਾਂ ਦੀ ਰੱਖਿਆ ਕਰਨ ਲਈ ਮਜਬੂਰ ਹਾਂ।”
ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਅਫਗਾਨਿਸਤਾਨ ਦੀ ਧਰਤੀ ਕਿਸੇ ਵੀ ਦੇਸ਼ ਵਿਰੁੱਧ ਵਰਤੀ ਨਹੀਂ ਜਾਵੇਗੀ, ਜਿਸਨੂੰ ਅਮਰੀਕਾ ਲਈ ਸਾਫ਼ ਸੰਦੇਸ਼ ਮੰਨਿਆ ਜਾ ਰਿਹਾ ਹੈ।
ਖ਼ਬਰਾਂ ਮੁਤਾਬਕ, ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੁਬਾਰਾ ਬਗਰਾਮ ਏਅਰਬੇਸ ’ਤੇ ਕਬਜ਼ਾ ਕਰਨ ਦੀ ਯੋਜਨਾ ਬਣਾ ਰਹੇ ਹਨ, ਜਿਸ ਨਾਲ ਚੀਨ ਦੀ ਗਤੀਵਿਧੀਆਂ ’ਤੇ ਨਿਗਰਾਨੀ ਰੱਖਣ ਦੀ ਕੋਸ਼ਿਸ਼ ਕੀਤੀ ਜਾ ਸਕੇ। ਪਰ ਤਾਲਿਬਾਨ ਨੇ ਇਸ ਪ੍ਰਸਤਾਵ ਨੂੰ ਪੂਰੀ ਤਰ੍ਹਾਂ ਠੁਕਰਾ ਦਿੱਤਾ ਹੈ। ਨਈਮ ਦੇ ਬਿਆਨ ਨਾਲ ਇਹ ਸਪੱਸ਼ਟ ਹੋ ਗਿਆ ਹੈ ਕਿ ਅਮਰੀਕਾ ਨੂੰ ਅਫਗਾਨ ਧਰਤੀ ’ਤੇ ਫੌਜੀ ਮੌਜੂਦਗੀ ਦੀ ਇਜਾਜ਼ਤ ਨਹੀਂ ਦਿੱਤੀ ਜਾਵੇਗੀ, ਜਿਸ ਨਾਲ ਵਾਸ਼ਿੰਗਟਨ ਦੀ ਚਿੰਤਾ ਵੱਧ ਗਈ ਹੈ।
ਚੀਨੀ ਰਾਜਦੂਤ ਸ਼ਿਆਓਯੋਂਗ ਨੇ ਅਫਗਾਨ ਸਰਕਾਰ ਨਾਲ ਆਰਥਿਕ ਸਹਿਯੋਗ, ਊਰਜਾ ਪ੍ਰੋਜੈਕਟਾਂ ਅਤੇ ਖਣਿਜ ਨਿਵੇਸ਼ ਖੇਤਰ ਵਿੱਚ ਸਹਿਯੋਗ ਵਧਾਉਣ ’ਤੇ ਸਹਿਮਤੀ ਜਤਾਈ। ਦੋਵਾਂ ਨੇ ਸਾਂਝੇ ਤੌਰ ’ਤੇ ਕਿਹਾ ਕਿ ਅਫਗਾਨਿਸਤਾਨ-ਚੀਨ ਸਬੰਧ ਨਵੀਂ ਦਿਸ਼ਾ ਵਿੱਚ ਅੱਗੇ ਵਧ ਰਹੇ ਹਨ, ਜੋ ਖੇਤਰੀ ਰਾਜਨੀਤਿਕ ਸੰਤੁਲਨ ਲਈ ਮਹੱਤਵਪੂਰਣ ਹੋਵੇਗਾ।
ਇਸ ਮੀਟਿੰਗ ਨਾਲ ਜਿੱਥੇ ਅਫਗਾਨ-ਚੀਨ ਨੇੜਤਾ ਦਾ ਨਵਾਂ ਪੜਾਅ ਸ਼ੁਰੂ ਹੋਇਆ ਹੈ, ਉੱਥੇ ਹੀ ਪਾਕਿਸਤਾਨ ਅਤੇ ਅਮਰੀਕਾ ਦੋਵਾਂ ਦੇ ਰਾਜਨੀਤਿਕ ਕੈਂਪਾਂ ਵਿੱਚ ਨਵੀਂ ਚਿੰਤਾ ਦੀ ਲਹਿਰ ਦੌੜ ਗਈ ਹੈ।
