26 ਮਰੀਜ਼, 13 ਬੱਚੇ 14 ਸਾਲ ਤੋਂ ਘੱਟ ਉਮਰ ਦੇ, ਸਭ ਤੋਂ ਛੋਟਾ ਸਿਰਫ਼ ਤਿੰਨ ਸਾਲ ਦਾ
ਚੰਡੀਗੜ੍ਹ : ਰੌਸ਼ਨੀ ਦੇ ਤਿਉਹਾਰ ਦਿਵਾਲੀ ਦੀਆਂ ਖੁਸ਼ੀਆਂ ਕਈ ਪਰਿਵਾਰਾਂ ਲਈ ਮਾਤਮ ਵਿੱਚ ਤਬਦੀਲ ਹੋ ਗਈਆਂ, ਜਦੋਂ ਪਟਾਕਿਆਂ ਨਾਲ ਵਾਪਰੇ ਹਾਦਸਿਆਂ ‘ਚ ਦਰਜਨਾਂ ਲੋਕ ਜ਼ਖ਼ਮੀ ਹੋ ਗਏ। ਪਿਛਲੇ 48 ਘੰਟਿਆਂ ਦੌਰਾਨ ਪੀ.ਜੀ.ਆਈ.ਐਮ.ਈ.ਆਰ ਦੇ ਐਡਵਾਂਸਡ ਆਈ ਸੈਂਟਰ ਵਿੱਚ 26 ਮਰੀਜ਼ ਇਲਾਜ ਲਈ ਪਹੁੰਚੇ, ਜਿਨ੍ਹਾਂ ਵਿਚੋਂ 13 ਬੱਚੇ 14 ਸਾਲ ਤੋਂ ਘੱਟ ਉਮਰ ਦੇ ਸਨ — ਸਭ ਤੋਂ ਛੋਟਾ ਸਿਰਫ਼ ਤਿੰਨ ਸਾਲ ਦਾ।
ਜ਼ਿਆਦਾਤਰ ਮਰੀਜ਼ਾਂ ਦੀਆਂ ਅੱਖਾਂ ਤੇ ਚਿਹਰੇ ‘ਤੇ ਗੰਭੀਰ ਸੱਟਾਂ ਆਈਆਂ। ਅੰਕੜਿਆਂ ਅਨੁਸਾਰ 23 ਪੁਰਸ਼ ਅਤੇ 3 ਮਹਿਲਾਵਾਂ ਜ਼ਖ਼ਮੀ ਹੋਏ ਹਨ। ਹਾਦਸਿਆਂ ਦੇ ਸ਼ਿਕਾਰਾਂ ‘ਚੋਂ 11 ਵਿਅਕਤੀ ਦਰਸ਼ਕ ਜਾਂ ਰਾਹਗੀਰ ਸਨ, ਜਦਕਿ ਬਾਕੀ ਪਟਾਕੇ ਚਲਾਉਂਦੇ ਸਮੇਂ ਜ਼ਖ਼ਮੀ ਹੋਏ।
ਹਾਦਸਿਆਂ ਦੇ ਕਾਰਣਾਂ ਵਿੱਚ ਬੰਬ ਪਟਾਕੇ ਸਭ ਤੋਂ ਵੱਧ ਖ਼ਤਰਨਾਕ ਸਾਬਤ ਹੋਏ, ਜਿਨ੍ਹਾਂ ਨਾਲ 11 ਲੋਕਾਂ ਦੀਆਂ ਅੱਖਾਂ ਜ਼ਖ਼ਮੀ ਹੋਈਆਂ। ਇਸ ਤੋਂ ਇਲਾਵਾ, ਸਕਾਈਸ਼ਾਟ, ਰਾਕੇਟ, ਸਪਾਰਕਲਰ ਅਤੇ ਲੈਂਟਰ ਮੋਮਬੱਤੀਆਂ ਨਾਲ ਵੀ ਨੁਕਸਾਨ ਪਹੁੰਚਿਆ।
ਪੀ.ਜੀ.ਆਈ. ਨੇ ਤਿਉਹਾਰ ਤੋਂ ਪਹਿਲਾਂ ਹੀ ਐਮਰਜੈਂਸੀ ਪ੍ਰਬੰਧ ਕੀਤੇ ਸਨ, ਜਿਸ ਨਾਲ ਸਾਰੇ ਮਰੀਜ਼ਾਂ ਦਾ ਤੁਰੰਤ ਇਲਾਜ ਸੰਭਵ ਹੋਇਆ। ਹਾਲਾਂਕਿ 10 ਮਰੀਜ਼ਾਂ ਦੀ ਸਰਜਰੀ ਤੁਰੰਤ ਕਰਨੀ ਪਈ, ਜਦਕਿ ਕੁਝ ਅਜੇ ਵੀ ਇਲਾਜ ਹੇਠ ਹਨ।
ਡਾਕਟਰਾਂ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਤਿਉਹਾਰ ਦੀ ਖੁਸ਼ੀ ਮਨਾਉਂਦੇ ਸਮੇਂ ਸੁਰੱਖਿਆ ਦੇ ਮਾਪਦੰਡਾਂ ਦੀ ਪਾਲਣਾ ਜ਼ਰੂਰ ਕੀਤੀ ਜਾਵੇ, ਤਾਂ ਜੋ ਅਜਿਹੇ ਹਾਦਸਿਆਂ ਤੋਂ ਬਚਿਆ ਜਾ ਸਕੇ।
