ਇਹ ਮਾਂ ਸੱਚਮੁੱਚ ਉਹ ਦੀਵਾ ਬਣ ਗਈ ਹੈ ਜਿਸਦੀ ਰੌਸ਼ਨੀ ਨੇ ਆਪਣੇ ਬੱਚੇ ਦੀ ਜ਼ਿੰਦਗੀ ਰੌਸ਼ਨ ਕਰ ਦਿੱਤੀ
ਨਵੀਂ ਦਿੱਲੀ – ਮਾਂ ਦੇ ਪਿਆਰ ਅਤੇ ਅਟੁੱਟ ਹਿੰਮਤ ਦੀ ਇਕ ਅਨੋਖੀ ਕਹਾਣੀ ਮੱਧ ਪ੍ਰਦੇਸ਼ ਦੇ ਸਿਉਨੀ ਜ਼ਿਲ੍ਹੇ ‘ਚ ਸਾਹਮਣੇ ਆਈ ਹੈ, ਜਿੱਥੇ 40 ਸਾਲ ਦੀ ਗੀਤਾ ਸਨੋਦੀਆ ਨੇ ਦੀਵਾਲੀ ਤੋਂ ਇਕ ਦਿਨ ਪਹਿਲਾਂ ਆਪਣੇ ਜਿਗਰ ਦਾ ਹਿੱਸਾ ਦਾਨ ਕਰਕੇ 10 ਸਾਲ ਦੇ ਪੁੱਤਰ ਸ਼ੌਰਿਆ ਨੂੰ ਨਵੀਂ ਜ਼ਿੰਦਗੀ ਬਖ਼ਸ਼ੀ।
ਗੀਤਾ ਅਤੇ ਉਸਦਾ ਪਤੀ ਤੇਜਲਾਲ ਸਨੋਦੀਆ ਪਿੰਡ ਨੰਦੌਰਾ ਦੇ ਰਹਿਣ ਵਾਲੇ ਹਨ। ਕੁਝ ਸਾਲ ਪਹਿਲਾਂ ਉਨ੍ਹਾਂ ਦੀ ਧੀ ਦਾ ਪੇਟ ਦਰਦ ਕਾਰਨ ਦੇਹਾਂਤ ਹੋ ਗਿਆ ਸੀ। ਬਾਅਦ ਵਿਚ ਡਾਕਟਰਾਂ ਨੇ ਦੱਸਿਆ ਕਿ ਜਿਗਰ ਫੇਲ੍ਹ ਹੋਣ ਕਾਰਨ ਉਸ ਦੀ ਮੌਤ ਹੋਈ ਸੀ। ਇਹੀ ਦੁੱਖਦਾਈ ਇਤਿਹਾਸ ਫਿਰ ਦੁਹਰਾਇਆ ਗਿਆ ਜਦੋਂ ਪੁੱਤਰ ਸ਼ੌਰਿਆ ਨੂੰ ਵੀ ਪੇਟ ਦਰਦ ਦੀ ਸਮੱਸਿਆ ਰਹਿਣ ਲੱਗੀ। ਦਿੱਲੀ ਏਮਜ਼ ਦੀ ਜਾਂਚ ਨੇ ਚੋੰਕਾ ਦਿੱਤਾ — ਬੱਚੇ ਦਾ ਜਿਗਰ 80 ਫੀਸਦੀ ਖਰਾਬ ਹੋ ਚੁੱਕਾ ਸੀ।
ਹੈਦਰਾਬਾਦ ਦੇ ਹਸਪਤਾਲ ਨੇ ਇਲਾਜ ਉੱਤੇ 40 ਲੱਖ ਰੁਪਏ ਦਾ ਅਨੁਮਾਨ ਲਾਇਆ, ਜੋ ਕਿ ਇਕ ਛੋਟੇ ਕਿਸਾਨ ਪਰਿਵਾਰ ਲਈ ਅਸੰਭਵ ਰਕਮ ਸੀ। ਪਰ ਹਿੰਮਤ ਨਹੀਂ ਹਾਰੀ ਗਈ। ਗੁਆਂਢੀਆਂ ਤੇ ਸਮਾਜ ਸੇਵਕਾਂ ਨੇ ਮਦਦ ਲਈ ਹੱਥ ਵਧਾਏ। ਕਿਸਾਨ ਤੇਜਲਾਲ ਨੇ ਆਪਣੀ ਜ਼ਮੀਨ ਵੇਚ ਕੇ ਤੇ ਉਧਾਰ ਲੈ ਕੇ 22 ਲੱਖ ਰੁਪਏ ਜੁਟਾਏ।
ਜਦੋਂ ਡਾਕਟਰਾਂ ਨੇ ਦੱਸਿਆ ਕਿ ਸ਼ੌਰਿਆ ਦਾ ਜਿਗਰ ਬਦਲਣਾ ਹੀ ਇਕਲੌਤਾ ਵਿਕਲਪ ਹੈ, ਤਾਂ ਮਾਂ ਗੀਤਾ ਸਨੋਦੀਆ ਨੇ ਬਿਨਾ ਇਕ ਪਲ ਸੋਚੇ ਅੱਗੇ ਆ ਕੇ ਕਿਹਾ — “ਜੇ ਮੇਰਾ ਜਿਗਰ ਮੇਰੇ ਬੱਚੇ ਦੀ ਜ਼ਿੰਦਗੀ ਬਚਾ ਸਕਦਾ ਹੈ, ਤਾਂ ਇਹ ਮੇਰੇ ਲਈ ਸਭ ਤੋਂ ਵੱਡੀ ਦੀਵਾਲੀ ਹੋਵੇਗੀ।”
ਦੀਵਾਲੀ ਤੋਂ ਇਕ ਦਿਨ ਪਹਿਲਾਂ ਦਿੱਲੀ ਦੇ ਨਾਰਾਇਣਾ ਹਸਪਤਾਲ ਵਿਚ ਹੋਇਆ ਇਹ ਟਰਾਂਸਪਲਾਂਟ ਪੂਰੀ ਤਰ੍ਹਾਂ ਸਫਲ ਰਿਹਾ। ਡਾਕਟਰਾਂ ਨੇ ਦੱਸਿਆ ਕਿ ਮਾਂ ਤੇ ਪੁੱਤਰ ਦੋਵੇਂ ਦੀ ਹਾਲਤ ਹੁਣ ਸਥਿਰ ਹੈ।
ਗੀਤਾ ਸਨੋਦੀਆ ਦੀ ਹਿੰਮਤ ਨੇ ਨਾ ਸਿਰਫ਼ ਸਿਉਨੀ ਦੇ ਲੋਕਾਂ ਨੂੰ ਪ੍ਰੇਰਿਤ ਕੀਤਾ ਹੈ, ਸਗੋਂ ਇਹ ਮਾਂ ਦੇ ਪਿਆਰ ਦੀ ਉਹ ਅਮਰ ਕਹਾਣੀ ਬਣ ਗਈ ਹੈ ਜਿਸ ਨੇ ਸਭ ਦੇ ਦਿਲ ਛੂਹ ਲਏ ਹਨ।
ਪਰਿਵਾਰ ਹੁਣ ਸ਼ੌਰਿਆ ਦੀ ਅੱਗੇ ਦੀ ਦੇਖਭਾਲ ਅਤੇ ਦਵਾਈਆਂ ਦੇ ਖਰਚੇ ਲਈ ਸਮਾਜ ਤੋਂ ਸਹਿਯੋਗ ਦੀ ਉਮੀਦ ਕਰ ਰਿਹਾ ਹੈ।
