ਜੋਧਪੁਰ : ਤਿਉਹਾਰਾਂ ਦੇ ਸੀਜ਼ਨ ਦੀ ਸ਼ੁਰੂਆਤ ਤੋਂ ਠੀਕ ਪਹਿਲਾਂ ਜੋਧਪੁਰ ਸ਼ਹਿਰ ਵਿੱਚ ਇੱਕ ਭਿਆਨਕ ਹਾਦਸਾ ਵਾਪਰਿਆ। ਦੇਵ ਨਗਰ ਪੁਲਿਸ ਸਟੇਸ਼ਨ ਖੇਤਰ ਵਿੱਚ ਪਹਿਲੀ ਪੁਲੀ ਦੇ ਨੇੜੇ ਸਥਿਤ “ਰਸ ਸਾਗਰ” ਨਾਮਕ ਇੱਕ ਵੱਡੀ ਪੇਂਟ ਦੀ ਦੁਕਾਨ ਵਿੱਚ ਬੀਤੀ ਰਾਤ ਅਚਾਨਕ ਅੱਗ ਲੱਗ ਗਈ। ਅੱਗ ਇੰਨੀ ਤੇਜ਼ੀ ਨਾਲ ਫੈਲੀ ਕਿ ਪੂਰੀ ਦੁਕਾਨ ਅਤੇ ਗੋਦਾਮ ਸੜ ਕੇ ਖਾਕ ਹੋ ਗਏ। ਅੱਗ ‘ਚ ਦੀਵਾਲੀ ਲਈ ਇਕੱਠਾ ਕੀਤਾ ਗਿਆ ਸਾਰਾ ਸਟਾਕ ਸੜ ਗਿਆ, ਜਿਸ ਨਾਲ ਲੱਖਾਂ ਰੁਪਏ ਦਾ ਵੱਡਾ ਨੁਕਸਾਨ ਹੋਇਆ।
ਦੇਵ ਨਗਰ ਥਾਣਾ ਅਧਿਕਾਰੀ (SHO) ਸੋਮਕਰਨ ਨੇ ਦੱਸਿਆ ਕਿ ਅੱਗ ਲੱਗਣ ਦੀ ਸੂਚਨਾ ਰਾਤ ਕਰੀਬ 9:30 ਵਜੇ ਮਿਲੀ, ਜਿਸ ਤੋਂ ਬਾਅਦ ਤੁਰੰਤ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਮੌਕੇ ‘ਤੇ ਪਹੁੰਚ ਗਈਆਂ। ਫਾਇਰ ਅਫ਼ਸਰ ਪ੍ਰਸ਼ਾਂਤ ਸਿੰਘ ਦੇ ਮੁਤਾਬਕ, ਦੁਕਾਨ ਦੇ ਅੰਦਰ ਥਿਨਰ ਅਤੇ ਕਲਰ ਵਰਗੇ ਜਲਣਸ਼ੀਲ ਕੈਮੀਕਲ ਵੱਡੀ ਮਾਤਰਾ ਵਿੱਚ ਮੌਜੂਦ ਸਨ, ਜਿਸ ਕਾਰਨ ਅੱਗ ਵਾਰ-ਵਾਰ ਭੜਕ ਉੱਠਦੀ ਸੀ। ਫਾਇਰ ਫਾਈਟਰਜ਼ ਨੇ ਲਗਾਤਾਰ 8 ਘੰਟਿਆਂ ਦੀ ਮਿਹਨਤ ਤੋਂ ਬਾਅਦ ਸਵੇਰੇ 6 ਵਜੇ ਦੇ ਕਰੀਬ ਅੱਗ ‘ਤੇ ਕਾਬੂ ਪਾਇਆ।
ਅੱਗ ਦੀ ਭਿਆਨਕਤਾ ਨੂੰ ਦੇਖਦੇ ਹੋਏ ਸ਼ਾਸਤਰੀ ਨਗਰ, ਨਾਗੋਰੀ ਗੇਟ ਸਮੇਤ ਵੱਖ-ਵੱਖ ਸਟੇਸ਼ਨਾਂ ਤੋਂ 15 ਤੋਂ ਵੱਧ ਫਾਇਰ ਐਂਜਨਾਂ ਮੰਗਵਾਈਆਂ ਗਈਆਂ, ਜਿਨ੍ਹਾਂ ਨੇ 150 ਤੋਂ ਵੱਧ ਫੇਰੇ ਲਗਾਏ। ਸਥਿਤੀ ‘ਤੇ ਕਾਬੂ ਪਾਉਣ ਲਈ ਏਅਰਫੋਰਸ ਦੀਆਂ ਫਾਇਰ ਐਂਜਨਾਂ ਦੀ ਮਦਦ ਵੀ ਲਈ ਗਈ।
ਫਿਲਹਾਲ ਅੱਗ ਲੱਗਣ ਦੇ ਕਾਰਨਾਂ ਦੀ ਜਾਂਚ ਜਾਰੀ ਹੈ। ਸ਼ੁਰੂਆਤੀ ਅਨੁਮਾਨ ਮੁਤਾਬਕ, ਦੀਵਾਲੀ ਲਈ ਇਕੱਠੀ ਕੀਤੀ ਜਲਣਸ਼ੀਲ ਸਮੱਗਰੀ ਕਾਰਨ ਹਾਦਸਾ ਹੋਇਆ। ਪ੍ਰਸ਼ਾਸਨ ਵੱਲੋਂ ਕਿਹਾ ਗਿਆ ਹੈ ਕਿ ਜੇਕਰ ਨਿਯਮਾਂ ਦੀ ਉਲੰਘਣਾ ਸਾਹਮਣੇ ਆਈ, ਤਾਂ ਜ਼ਿੰਮੇਵਾਰਾਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।
