ਸ਼ਰਮ ਅਲ-ਸ਼ੇਖ (ਮਿਸਰ), 14 ਅਕਤੂਬਰ: ਮਿਸਰ ਵਿੱਚ ਹੋਏ ਗਾਜ਼ਾ ਸੰਮੇਲਨ ਦੌਰਾਨ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵੱਲੋਂ ਇਟਲੀ ਦੀ ਪ੍ਰਧਾਨ ਮੰਤਰੀ ਜੋਰਜੀਆ ਮੇਲੋਨੀ ਨੂੰ “ਸੁੰਦਰ ਔਰਤ” ਕਹਿਣ ‘ਤੇ ਵਿਵਾਦ ਖੜਾ ਹੋ ਗਿਆ ਹੈ। ਟਰੰਪ ਦੇ ਇਸ ਬਿਆਨ ਨੇ ਰਾਜਨੀਤਿਕ ਮੰਚਾਂ ਤੋਂ ਲੈ ਕੇ ਸੋਸ਼ਲ ਮੀਡੀਆ ਤੱਕ ਚਰਚਾ ਦਾ ਮਾਹੌਲ ਬਣਾਇਆ ਹੈ।
ਸੰਮੇਲਨ ਦੌਰਾਨ ਵਿਸ਼ਵ ਦੇ 25 ਤੋਂ ਵੱਧ ਦੇਸ਼ਾਂ ਅਤੇ ਅੰਤਰਰਾਸ਼ਟਰੀ ਸੰਗਠਨਾਂ ਦੇ ਨੇਤਾ ਮੌਜੂਦ ਸਨ। ਟਰੰਪ ਨੇ ਆਪਣੀ ਗੱਲਬਾਤ ਦੌਰਾਨ 48 ਸਾਲਾ ਮੇਲੋਨੀ ਵੱਲ ਸੰਬੋਧਨ ਕਰਦੇ ਹੋਏ ਕਿਹਾ, “ਮੈਨੂੰ ਇਹ ਕਹਿਣ ਦੀ ਇਜਾਜ਼ਤ ਨਹੀਂ ਹੈ, ਕਿਉਂਕਿ ਅਮਰੀਕਾ ਵਿੱਚ ਜੇ ਤੁਸੀਂ ਕਿਸੇ ਔਰਤ ਨੂੰ ਸੁੰਦਰ ਕਹੋ, ਤਾਂ ਤੁਹਾਡੇ ਰਾਜਨੀਤਿਕ ਕਰੀਅਰ ਦਾ ਅੰਤ ਹੋ ਸਕਦਾ ਹੈ… ਪਰ ਮੈਂ ਖਤਰਾ ਲਵਾਂਗਾ — ਉਹ ਇੱਕ ਸੁੰਦਰ ਨੌਜਵਾਨ ਔਰਤ ਹੈ।”
ਟਰੰਪ ਦੀ ਇਹ ਗੱਲ ਸੁਣਕੇ ਮੇਲੋਨੀ ਮੁਸਕਰਾਈ, ਪਰ ਸਮਾਗਮ ਮੌਜੂਦ ਕਈ ਹੋਰ ਨੇਤਾਵਾਂ ਦੇ ਚਿਹਰਿਆਂ ‘ਤੇ ਹੈਰਾਨੀ ਦਿਖੀ।
ਟਰੰਪ ਨੇ ਅੱਗੇ ਕਿਹਾ, “ਅਮਰੀਕਾ ਵਿੱਚ ਜੇ ਤੁਸੀਂ ਕਿਸੇ ਔਰਤ ਦਾ ਵਰਣਨ ‘ਸੁੰਦਰ’ ਸ਼ਬਦ ਨਾਲ ਕਰੋ, ਤਾਂ ਤੁਸੀਂ ਆਪਣੀ ਰਾਜਨੀਤਿਕ ਜ਼ਿੰਦਗੀ ਨੂੰ ਖਤਮ ਸਮਝੋ, ਪਰ ਮੈਂ ਇਹ ਕਹਾਂਗਾ ਕਿ ਉਹ ਵਾਕਈ ਸੁੰਦਰ ਹੈ।”
ਉਨ੍ਹਾਂ ਨੇ ਮੇਲੋਨੀ ਦੀ ਪ੍ਰਸ਼ੰਸਾ ਜਾਰੀ ਰੱਖਦਿਆਂ ਕਿਹਾ, “ਇਟਲੀ ਵਿੱਚ ਉਸਦਾ ਬਹੁਤ ਸਤਿਕਾਰ ਕੀਤਾ ਜਾਂਦਾ ਹੈ। ਉਹ ਇੱਕ ਬਹੁਤ ਸਫਲ ਨੇਤਾ ਹੈ।” ਸੰਮੇਲਨ ਦੌਰਾਨ ਮੇਲੋਨੀ ਇਕਲੌਤੀ ਮਹਿਲਾ ਨੇਤਾ ਸੀ ਜੋ ਮੰਚ ‘ਤੇ ਹੋਰ ਵਿਸ਼ਵ ਨੇਤਾਵਾਂ ਦੇ ਨਾਲ ਬੈਠੀ ਸੀ।
ਟਰੰਪ ਦਾ ਇਹ ਵੀਡੀਓ ਹੁਣ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਗਿਆ ਹੈ। ਕਈ ਯੂਜ਼ਰਾਂ ਨੇ ਇਸਨੂੰ “ਗੈਰ-ਉਚਿਤ” ਕਹਿੰਦੇ ਹੋਏ ਟਰੰਪ ਦੀ ਆਲੋਚਨਾ ਕੀਤੀ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਗਾਜ਼ਾ ਜਿਹੇ ਸੰਵੇਦਨਸ਼ੀਲ ਵਿਸ਼ੇ ‘ਤੇ ਚਰਚਾ ਦੌਰਾਨ ਕਿਸੇ ਮਹਿਲਾ ਰਾਜ ਮੁਖੀ ਨਾਲ ਇਸ ਤਰ੍ਹਾਂ ਦਾ ਟਿੱਪਣੀ ਭਰਾ ਲਹਿਜ਼ਾ ਸ਼ੋਭਾ ਨਹੀਂ ਦਿੰਦਾ।
ਸਿਆਸੀ ਵਿਸ਼ਲੇਸ਼ਕਾਂ ਦਾ ਮੰਨਣਾ ਹੈ ਕਿ ਟਰੰਪ ਦਾ ਇਹ ਬਿਆਨ ਉਨ੍ਹਾਂ ਦੀ ਪੁਰਾਣੀ ਵਿਵਾਦਿਤ ਰਾਜਨੀਤਿਕ ਸ਼ੈਲੀ ਨੂੰ ਦੁਬਾਰਾ ਸਾਹਮਣੇ ਲਿਆਉਂਦਾ ਹੈ — ਜਿੱਥੇ ਉਹ ਅਕਸਰ ਅਣਪ੍ਰਚਲਿਤ ਬੋਲਚਾਲ ਨਾਲ ਖ਼ਬਰਾਂ ਦੀਆਂ ਸੁਰਖੀਆਂ ਬਣ ਜਾਂਦੇ ਹਨ।
