ਅਮਰੀਕਾ/ ਚੀਨ: ਅਮਰੀਕਾ ਅਤੇ ਚੀਨ ਵਿਚਕਾਰ ਵਪਾਰਕ ਤਣਾਅ ਇੱਕ ਵਾਰ ਫਿਰ ਤੇਜ਼ ਹੋ ਗਿਆ ਹੈ। ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਘੋਸ਼ਣਾ ਕੀਤੀ ਹੈ ਕਿ 1 ਨਵੰਬਰ, 2025 ਤੋਂ ਚੀਨ ਤੋਂ ਆਯਾਤ ਕੀਤੀਆਂ ਵਸਤਾਂ ‘ਤੇ 100% ਵਾਧੂ ਟੈਰਿਫ ਲਗਾਇਆ ਜਾਵੇਗਾ। ਟਰੰਪ ਦਾ ਇਹ ਕਦਮ ਚੀਨ ਦੇ ਦੁਰਲੱਭ ਧਰਤੀ ਖਣਿਜਾਂ ‘ਤੇ ਕਨਟਰੋਲ ਅਤੇ ਅਨੁਚਿਤ ਵਪਾਰਕ ਅਭਿਆਸਾਂ ਦੇ ਜਵਾਬ ਵਿੱਚ ਆਇਆ ਹੈ।
ਚੀਨ ਨੇ ਇਸ ਫੈਸਲੇ ਨੂੰ ਦੋਹਰੇ ਮਾਪਦੰਡ ਅਤੇ ਵਿਸ਼ਵ ਵਪਾਰ ਲਈ ਖ਼ਤਰਾ ਕਹਿ ਕੇ ਸਖ਼ਤ ਨਿੰਦਾ ਕੀਤੀ ਹੈ। ਚੀਨੀ ਮੰਤਰਾਲੇ ਨੇ ਦੋਸ਼ ਲਾਇਆ ਕਿ ਅਮਰੀਕਾ ਨੇ ਸਤੰਬਰ ਤੋਂ ਚੀਨ ‘ਤੇ ਆਰਥਿਕ ਦਬਾਅ ਵਧਾਇਆ ਹੈ ਅਤੇ ਵਧੇਰੇ ਟੈਰਿਫਾਂ ਦੀ ਧਮਕੀ ਨਾਲ ਗੱਲਬਾਤ ਦਾ ਮਾਹੌਲ ਖ਼ਰਾਬ ਕੀਤਾ ਹੈ। ਉਨ੍ਹਾਂ ਨੇ ਆਗਾਹ ਕੀਤਾ ਕਿ ਜੇ ਅਮਰੀਕਾ ਆਪਣੀਆਂ ਨੀਤੀਆਂ ‘ਤੇ ਕਾਇਮ ਰਹਿੰਦਾ ਹੈ, ਤਾਂ ਚੀਨ ਆਪਣੇ ਜਾਇਜ਼ ਹਿੱਤਾਂ ਦੀ ਰੱਖਿਆ ਲਈ ਠੋਸ ਕਦਮ ਚੁੱਕੇਗਾ।
ਚੀਨੀ ਬੁਲਾਰੇ ਨੇ ਸਪੱਸ਼ਟ ਕੀਤਾ, “ਅਸੀਂ ਵਪਾਰ ਯੁੱਧ ਨਹੀਂ ਚਾਹੁੰਦੇ, ਪਰ ਲੜਨ ਤੋਂ ਵੀ ਡਰਦੇ ਨਹੀਂ। ਅਸੀਂ ਅਮਰੀਕਾ ਨੂੰ ਆਪਣੀਆਂ ਗਲਤ ਨੀਤੀਆਂ ਸੁਧਾਰਨ ਦੀ ਅਪੀਲ ਕਰਦੇ ਹਾਂ।”
ਟਰੰਪ ਨੇ ਚੀਨ ਦੇ ਫੈਸਲੇ ਨੂੰ ਨੈਤਿਕ ਅਪਮਾਨ ਕਿਹਾ ਅਤੇ ਆਗਾਹ ਕੀਤਾ ਕਿ ਅਮਰੀਕਾ ਆਪਣੇ ਹਿੱਤਾਂ ਦੀ ਰੱਖਿਆ ਲਈ ਇਕਪਾਸੜ ਕਾਰਵਾਈ ਕਰੇਗਾ। ਉਨ੍ਹਾਂ ਨੇ ਦੱਸਿਆ ਕਿ ਇਹ ਟੈਰਿਫ ਮੌਜੂਦਾ ਕਿਸੇ ਵੀ ਟੈਰਿਫ ਤੋਂ ਵੱਖਰਾ ਅਤੇ ਵਾਧੂ ਹੋਵੇਗਾ, ਜਿਸ ਨਾਲ ਚੀਨ ਤੇ ਅਮਰੀਕਾ ਵਿਚਕਾਰ ਵਪਾਰਕ ਤਣਾਅ ਹੋਰ ਤੇਜ਼ ਹੋ ਸਕਦਾ ਹੈ।
