ਮੁੰਬਈ : ਮਨੋਰੰਜਨ ਦੀ ਦੁਨੀਆ ਤੋਂ ਹਰ ਰੋਜ਼ ਕੋਈ ਨਾ ਕੋਈ ਬੁਰੀ ਖ਼ਬਰ ਸਾਹਮਣੇ ਆਉਂਦੀ ਰਹਿੰਦੀ ਹੈ। ਹੁਣ ਹਾਲ ਹੀ ਵਿੱਚ ਖ਼ਬਰ ਆਈ ਹੈ ਕਿ ਮਸ਼ਹੂਰ ਅਦਾਕਾਰ ਅਤੇ ਟੀ.ਵੀ ਸਟਾਰ ਹਲਕ ਹੋਗਨ ਹੁਣ ਇਸ ਦੁਨੀਆ ਵਿੱਚ ਨਹੀਂ ਰਹੇ। ਉਨ੍ਹਾਂ ਦਾ 71 ਸਾਲ ਦੀ ਉਮਰ ਵਿੱਚ ਦੇਹਾਂਤ ਹੋ ਗਿਆ। ਹਲਕ ਨਾ ਸਿਰਫ਼ ਇਕ ਫਿਲਮ ਅਤੇ ਟੀ.ਵੀ ਸਟਾਰ ਸਨ, ਸਗੋਂ ਇਕ ਵਿਸ਼ਵ ਪ੍ਰਸਿੱਧ ਪਹਿਲਵਾਨ ਵੀ ਸੀ। ਉਹ ਕੁਸ਼ਤੀ ਦੀ ਦੁਨੀਆ ਵਿੱਚ ਇਕ ਵੱਡਾ ਨਾਮ ਸਨ। ਹੁਣ ਜਿਵੇਂ ਹੀ ਉਨ੍ਹਾਂ ਦੀ ਮੌਤ ਦੀ ਖ਼ਬਰ ਸਾਹਮਣੇ ਆਈ, ਉਨ੍ਹਾਂ ਦੇ ਪ੍ਰਸ਼ੰਸਕਾਂ ਨੂੰ ਝਟਕਾ ਲੱਗਾ ਹੈ। ਹਲਕ ਹੋਗਨ ਦਾ ਅਸਲੀ ਨਾਮ ਟੈਰੀ ਜੀਨ ਬੋਲੀਆ ਸੀ। ਇਕ ਰਿਪੋਰਟ ਅਨੁਸਾਰ, ਇਸ ਮਸ਼ਹੂਰ ਸਟਾਰ ਦੀ ਮੌਤ ਦਿਲ ਦਾ ਦੌਰਾ ਪੈਣ ਨਾਲ ਹੋਈ।
ਹਲਕ ਹੋਗਨ ਨੇ “ਰੌਕੀ III ” ਅਤੇ “ਥੰਡਰ ਇਨ ਪੈਰਾਡਾਈਜ਼” ਵਰਗੀਆਂ ਫਿਲਮਾਂ ਅਤੇ ਟੀ.ਵੀ ਸ਼ੋਅ ਵਿੱਚ ਵੀ ਕੰਮ ਕੀਤਾ। ਉਨ੍ਹਾਂ ਦੇ ਹਾਸੇ-ਮਜ਼ਾਕ ਅਤੇ ਜੋਸ਼ੀਲੇ ਸ਼ਖਸੀਅਤ ਨੇ ਦਰਸ਼ਕਾਂ ਦਾ ਦਿਲ ਜਿੱਤ ਲਿਆ। ਇਸ ਤੋਂ ਇਲਾਵਾ, ਉਨ੍ਹਾਂ ਨੇ ਕੁਸ਼ਤੀ ਦੀ ਦੁਨੀਆ ਵਿੱਚ ਬਹੁਤ ਨਾਮ ਕਮਾਇਆ। ਹੋਗਨ ਨੇ 1980 ਅਤੇ 1990 ਦੇ ਦਹਾਕੇ ਵਿੱਚ WWE (ਉਸ ਸਮੇਂ WWF) ਨੂੰ ਨਵੀਆਂ ਉਚਾਈਆਂ ‘ਤੇ ਪਹੁੰਚਾਇਆ। ਉਨ੍ਹਾਂ ਦਾ ਲਾਲ ਅਤੇ ਪੀਲਾ ਪਹਿਰਾਵਾ, ਲੰਬੇ ਸੁਨਹਿਰੇ ਵਾਲ ਅਤੇ “ਹਲਕ ਮੀਨੀਆ ” ਨਾਅਰਾ ਪ੍ਰਸ਼ੰਸਕਾਂ ਵਿੱਚ ਬਹੁਤ ਮਸ਼ਹੂਰ ਸੀ।
ਹਲਕ ਹੋਗਨ ਨੇ ਛੇ ਵਾਰ WWE ਵਰਲਡ ਹੈਵੀਵੇਟ ਚੈਂਪੀਅਨਸ਼ਿਪ ਜਿੱਤੀ ਅਤੇ ਰੈਸਲਮੇਨੀਆ ਵਰਗੇ ਵੱਡੇ ਮੁਕਾਬਲਿਆਂ ਵਿੱਚ ਹਿੱਸਾ ਲਿਆ। ਉਨ੍ਹਾਂ ਦੇ ਆਂਦਰੇ ਦ ਜਾਇੰਟ, ਰੈਂਡੀ ਸੇਵੇਜ ਅਤੇ ਦ ਰੌਕ ਵਰਗੇ ਪਹਿਲਵਾਨਾਂ ਨਾਲ ਯਾਦਗਾਰੀ ਮੈਚ ਹੋਏ। ਹਾਲਾਂਕਿ ਹਾਲ ਹੀ ਦੇ ਸਾਲਾਂ ਵਿੱਚ ਹਲਕ ਹੋਗਨ ਨੇ ਆਪਣੇ ਆਪ ਨੂੰ ਕੁਸ਼ਤੀ ਤੋਂ ਦੂਰ ਕਰ ਲਿਆ ਸੀ, ਪਰ ਉਹ ਟੀ.ਵੀ ਅਤੇ ਸੋਸ਼ਲ ਮੀਡੀਆ ਰਾਹੀਂ ਪ੍ਰਸ਼ੰਸਕਾਂ ਨਾਲ ਜੁੜੇ ਰਹੇ।
