ਈਰਾਨ , 11 ਜੁਲਾਈ 2025 : ਈਰਾਨ ਨੇ ਅਮਰੀਕਾ ਨਾਲ ਪਰਮਾਣੂ ਮੁੱਦੇ ‘ਤੇ ਗੱਲਬਾਤ ਦੀ ਸਪਸ਼ਟ ਸ਼ਰਤ ਰੱਖੀ ਹੈ ਕਿ ਉਹ ਤਦ ਹੀ ਵਾਰਤਾਲਾਪ ਸ਼ੁਰੂ ਕਰੇਗਾ ਜਦੋਂ ਅਮਰੀਕਾ ਇਹ ਲਿਖਤੀ ਗਾਰੰਟੀ ਦੇਵੇ ਕਿ ਅੱਗੇ ਤੋਂ ਈਰਾਨ ‘ਤੇ ਕੋਈ ਹਮਲਾ ਨਹੀਂ ਕੀਤਾ ਜਾਵੇਗਾ। ਨਾਲ ਹੀ, ਈਰਾਨ ਨੇ ਮੰਗ ਕੀਤੀ ਹੈ ਕਿ ਅਮਰੀਕੀ ਹਮਲਿਆਂ ਦੌਰਾਨ ਉਸਦੇ ਪਰਮਾਣੂ ਠਿਕਾਣਿਆਂ ਨੂੰ ਹੋਏ ਨੁਕਸਾਨ ਲਈ ਮੁਆਵਜ਼ਾ ਦਿੱਤਾ ਜਾਵੇ।
ਈਰਾਨ ਦੇ ਵਿਦੇਸ਼ ਮੰਤਰੀ ਅੱਬਾਸ ਅਰਾਗਚੀ ਨੇ ਫਰਾਂਸੀਸੀ ਅਖਬਾਰ Le Monde ਨਾਲ ਗੱਲਬਾਤ ਦੌਰਾਨ ਕਿਹਾ ਕਿ ਡਿਪਲੋਮੇਸੀ ਦਾ ਰਾਸਤਾ ਖੁੱਲਾ ਹੈ, ਪਰ ਇਹ ਦੋ-ਪਾਸਾ ਹੁੰਦਾ ਹੈ। ਅਮਰੀਕਾ ਨੂੰ ਆਪਣੇ ਹਾਲੀਆ ਹਮਲਿਆਂ ਦੀ ਜ਼ਿੰਮੇਵਾਰੀ ਲੈਣੀ ਹੋਵੇਗੀ, ਖਾਸ ਕਰਕੇ ਉਹ ਹਮਲੇ ਜੋ ਆਈਏਈਏ ਦੀ ਨਿਗਰਾਨੀ ਹੇਠ ਆਉਣ ਵਾਲੀਆਂ ਠਿਕਾਣਿਆਂ ‘ਤੇ ਹੋਏ ਹਨ।
ਅਰਾਗਚੀ ਨੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਇਸ ਦਾਅਵੇ ਨੂੰ ਵੀ ਖਾਰਜ ਕਰ ਦਿੱਤਾ ਕਿ ਹਮਲਿਆਂ ਕਾਰਨ ਈਰਾਨ ਦਾ ਪਰਮਾਣੂ ਕਾਰਜਕ੍ਰਮ “ਨਸ਼ਟ” ਹੋ ਗਿਆ ਹੈ। ਉਨ੍ਹਾਂ ਨੇ ਆਈਏਈਏ ਦੇ ਡਾਇਰੈਕਟਰ ਰਾਫੇਲ ਗ੍ਰੋਸੀ ਦਾ ਹਵਾਲਾ ਦਿੰਦਿਆਂ ਕਿਹਾ ਕਿ ਇਹ ਕਾਰਜਕ੍ਰਮ ਸਿਰਫ ਕੁਝ ਮਹੀਨਿਆਂ ਲਈ ਪਿੱਛੇ ਹੋਇਆ ਹੈ, ਨਸ਼ਟ ਨਹੀਂ ਹੋਇਆ। ਉਨ੍ਹਾਂ ਨੇ ਜ਼ੋਰ ਦਿੱਤਾ ਕਿ ਈਰਾਨ ਦੀਆਂ ਪਰਮਾਣੂ ਗਤੀਵਿਧੀਆਂ ਆਈਏਈਏ ਦੀ ਨਿਗਰਾਨੀ ਹੇਠ ਹਨ ਅਤੇ ਅੰਤਰਰਾਸ਼ਟਰੀ ਕਾਨੂੰਨਾਂ ਦੇ ਅਨੁਸਾਰ ਚੱਲਦੀਆਂ ਹਨ।
