ਕਾਕਰੋਚ ਲਹਿਰ: ਜੰਤਰ ਮੰਤਰ ਰੈਲੀ ਅਤੇ ਸਿਆਸੀ ਭਵਿੱਖ

ਨਵੀਂ ਦਿੱਲੀ, 9ਜੂਨ (ਹਰਸ਼ਪ੍ਰੀਤ ਕੌਰ): ਨਵੀਂ ਦਿੱਲੀ ਦੇ ਇਤਿਹਾਸਕ ਜੰਤਰ ਮੰਤਰ ਵਿਖੇ ਕਾਕਰੋਚ ਜਨਤਾ ਪਾਰਟੀ (CJP) ਵੱਲੋਂ ਕੀਤੀ ਗਈ ਰੋਸ ਰੈਲੀ ਪੁਰਅਮਨ ਢੰਗ ਨਾਲ ਨੇਪਰੇ ਚੜ੍ਹ ਗਈ ਹੈ। ਇਸ ਰੈਲੀ ਦੇ ਸ਼ਾਂਤੀਪੂਰਵਕ ਮੁਕੰਮਲ ਹੋਣ ਨਾਲ ਦਿੱਲੀ ਪੁਲੀਸ ਅਤੇ ਕੇਂਦਰ ਦੀ ਹੁਕਮਰਾਨ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਨੇ ਸੁੱਖ ਦਾ ਸਾਹ ਲਿਆ ਹੈ। ‘ਸੀ.ਜੇ.ਪੀ.’ ਦੀ ਇਸ ਪਹਿਲੀ ਜਨਤਕ ਰੈਲੀ ਨੂੰ ਲੋਕਾਂ, ਖ਼ਾਸ ਕਰਕੇ ਨੌਜਵਾਨਾਂ ਵੱਲੋਂ ਭਰਵਾਂ ਹੁੰਗਾਰਾ ਮਿਲਿਆ। ਹਾਲਾਂਕਿ ਪ੍ਰਬੰਧਕਾਂ ਨੇ ਹਜ਼ਾਰਾਂ ਦੀ ਗਿਣਤੀ ਦਾ ਦਾਅਵਾ ਕੀਤਾ ਹੈ, ਪਰ ਦਿੱਲੀ ਪੁਲੀਸ ਅਤੇ ਨਿਰਪੱਖ ਮੀਡੀਆ ਅਨੁਸਾਰ ਇਹ ਗਿਣਤੀ 1500 ਤੋਂ 2000 ਦੇ ਵਿਚਕਾਰ ਸੀ।

ਸਖ਼ਤ ਗਰਮੀ ਅਤੇ ਅਨਿਸ਼ਚਿਤਤਾ ਦੇ ਬਾਵਜੂਦ ਜੁਟੀ ਭੀੜ

ਭਰ ਗਰਮੀ ਅਤੇ ਬਿਨਾਂ ਕਿਸੇ ਮਜ਼ਬੂਤ ਜਥੇਬੰਦਕ ਢਾਂਚੇ ਦੇ ਇੰਨੀ ਗਿਣਤੀ ਵਿੱਚ ਨੌਜਵਾਨਾਂ ਦਾ ਇਕੱਠੇ ਹੋਣਾ ਆਪਣੇ ਆਪ ਵਿੱਚ ਇੱਕ ਵੱਡੀ ਗੱਲ ਹੈ, ਖ਼ਾਸ ਕਰਕੇ ਉਦੋਂ ਜਦੋਂ ਰੈਲੀ ਦੀ ਪ੍ਰਵਾਨਗੀ ਨੂੰ ਲੈ ਕੇ ਸਥਿਤੀ ਅਸਪਸ਼ਟ ਸੀ। ਰੈਲੀ ਦੌਰਾਨ ਟਕਰਾਅ ਪੈਦਾ ਕਰਨ ਦੀਆਂ ਕਿਆਸਅਰਾਈਆਂ ਵੀ ਸਨ, ਪਰ ਦਿੱਲੀ ਪੁਲੀਸ ਨੇ ਮੁਸਤੈਦੀ ਦਿਖਾਉਂਦਿਆਂ ਵਿਘਨ ਪਾਉਣ ਵਾਲੇ ਅਨਸਰਾਂ ਨੂੰ ਪਹਿਲਾਂ ਹੀ ਹਿਰਾਸਤ ਵਿੱਚ ਲੈ ਲਿਆ।

ਸੀ.ਜੇ.ਪੀ. ਦੇ ਸੰਸਥਾਪਕ ਅਭਿਜੀਤ ਦੀਪਕੇ ਦੇ ਅਮਰੀਕਾ ਤੋਂ ਦਿੱਲੀ ਪਹੁੰਚਣ ‘ਤੇ ਉਨ੍ਹਾਂ ਨੂੰ ਮੀਡੀਆ ਦੀ ਹਾਜ਼ਰੀ ਵਿੱਚ ਪ੍ਰਵਾਨਗੀ ਪੱਤਰ ਸੌਂਪਿਆ ਗਿਆ। ਇਹ ਰੈਲੀ ਕੇਂਦਰੀ ਸਿੱਖਿਆ ਮੰਤਰੀ ਧਰਮੇਂਦਰ ਪ੍ਰਧਾਨ ਦੇ ਅਸਤੀਫ਼ੇ ਦੀ ਮੰਗ ਨੂੰ ਲੈ ਕੇ ਸਮਾਪਤ ਹੋਈ, ਜਿਸ ਲਈ ਪਹਿਲਾਂ 5 ਘੰਟੇ ਅਤੇ ਬਾਅਦ ਵਿੱਚ 7 ਦਿਨਾਂ ਦਾ ਅਲਟੀਮੇਟਮ ਦਿੱਤਾ ਗਿਆ।

ਸਿੱਖਿਆ ਪ੍ਰਣਾਲੀ ਦੀਆਂ ਨਾਕਾਮੀਆਂ ਅਤੇ ਜਨਤਾ ਦਾ ਗੁੱਸਾ

ਦੇਸ਼ ਭਰ ਦੇ ਨੌਜਵਾਨਾਂ ਅਤੇ ਮਾਪਿਆਂ ਵਿੱਚ ਇਸ ਵੇਲੇ ਭਾਰੀ ਬੇਚੈਨੀ ਅਤੇ ਗੁੱਸਾ ਹੈ। ਇਸ ਦੇ ਮੁੱਖ ਕਾਰਨ ਹਨ:

• ‘ਨੀਟ’ (NEET) ਪੇਪਰ ਲੀਕ ਮਾਮਲਾ ਅਤੇ ਪ੍ਰੀਖਿਆਵਾਂ ਨੂੰ ਰੱਦ ਕਰਕੇ ਮੁੜ-ਪ੍ਰੀਖਿਆ ਕਰਵਾਉਣ ਦੀ ਨੌਬਤ ਆਉਣਾ।

• ਸੀ.ਬੀ.ਐਸ.ਈ. (CBSE) ਦੀ 12ਵੀਂ ਜਮਾਤ ਦੇ ਮੁਲਾਂਕਣ ਅਤੇ ਨਤੀਜੇ ਤਿਆਰ ਕਰਨ ਵਾਲੇ ਸੌਫ਼ਟਵੇਅਰ ਦੀ ਨਾਕਾਮੀ।

“ਭਾਵੇਂ ਸਿੱਖਿਆ ਮੰਤਰੀ ਇਨ੍ਹਾਂ ਖ਼ਾਮੀਆਂ ਲਈ ਸਿੱਧੇ ਤੌਰ ‘ਤੇ ਜ਼ਿੰਮੇਵਾਰ ਨਹੀਂ ਹਨ, ਪਰ ਮੰਤਰਾਲੇ ਦੇ ਮੁਖੀ ਹੋਣ ਦੇ ਨਾਤੇ ਇਖ਼ਲਾਕੀ ਆਧਾਰ ‘ਤੇ ਉਨ੍ਹਾਂ ਦੇ ਅਸਤੀਫ਼ੇ ਦੀ ਮੰਗ ਨੂੰ ਗ਼ਲਤ ਨਹੀਂ ਠਹਿਰਾਇਆ ਜਾ ਸਕਦਾ। ਪਰ ਅੱਜ ਦੇ ਦੌਰ ਵਿੱਚ ਲਾਲ ਬਹਾਦਰ ਸ਼ਾਸਤਰੀ ਵਰਗੇ ਆਦਰਸ਼ਵਾਦ ਦੀ ਉਮੀਦ ਕਰਨਾ ਮੁਸ਼ਕਿਲ ਹੈ।”

ਧਰਮੇਂਦਰ ਪ੍ਰਧਾਨ ਪਹਿਲਾਂ ਪੈਟਰੋਲੀਅਮ ਅਤੇ ਹੁਨਰ ਵਿਕਾਸ ਮੰਤਰਾਲੇ ਵਿੱਚ ਆਪਣੀ ਕੁਸ਼ਲ ਕਾਰਗੁਜ਼ਾਰੀ ਲਈ ਜਾਣੇ ਜਾਂਦੇ ਸਨ, ਪਰ ਮੌਜੂਦਾ ਸਿੱਖਿਆ ਮੰਤਰਾਲੇ ਦੇ ਵਿਵਾਦਾਂ ਕਾਰਨ ਮੋਦੀ ਸਰਕਾਰ ਦੇ ਅਕਸ ਨੂੰ ਠੇਸ ਪਹੁੰਚੀ ਹੈ। ਰਹੀ-ਸਹੀ ਕਸਰ ਸੋਸ਼ਲ ਮੀਡੀਆ ‘ਤੇ ਸਵਾਲ ਚੁੱਕਣ ਵਾਲਿਆਂ ਨੂੰ ‘ਪਾਕਿਸਤਾਨੀ’ ਜਾਂ ‘ਵਿਦੇਸ਼ੀ ਏਜੰਟ’ ਕਹਿ ਕੇ ਟ੍ਰੋਲ ਕਰਨ ਵਾਲਿਆਂ ਨੇ ਪੂਰੀ ਕਰ ਦਿੱਤੀ, ਜਿਸ ਨਾਲ ਲੋਕਾਂ ਦਾ ਗੁੱਸਾ ਹੋਰ ਭੜਕ ਗਿਆ।

ਰੋਸ ਪ੍ਰਦਰਸ਼ਨ ਵਿੱਚੋਂ ਸਿਆਸੀ ਲਾਲਸਾ ਦੀ ਬੂ?

ਇਸ ਲੋਕ-ਰੋਹ ਦਾ ਲਾਹਾ ਅਭਿਜੀਤ ਦੀਪਕੇ ਅਤੇ ਉਨ੍ਹਾਂ ਦੇ ਸਾਥੀਆਂ ਨੇ ਚੁੱਕਿਆ ਹੈ। ਜਿਸ ਕਾਹਲ ਵਿੱਚ ਇਸ ਮੁਹਿੰਮ ਨੂੰ ਸਿਆਸੀ ਰੰਗਤ ਦੇ ਕੇ ‘ਸੀ.ਜੇ.ਪੀ.’ ਨੂੰ ਇੱਕ ਸਿਆਸੀ ਪਾਰਟੀ ਵਿੱਚ ਬਦਲਣ ਦੀ ਬਿਆਨਬਾਜ਼ੀ ਸ਼ੁਰੂ ਹੋਈ ਹੈ, ਉਸ ਤੋਂ ਇਸ ਅੰਦੋਲਨ ਪਿੱਛੇ ਸਿਆਸੀ ਲਾਲਸਾਵਾਂ ਸਾਫ਼ ਝਲਕਦੀਆਂ ਹਨ।

ਦੂਜੇ ਪਾਸੇ, ਕਾਂਗਰਸ ਸਮੇਤ ਹੋਰ ਸਥਾਪਿਤ ਵਿਰੋਧੀ ਪਾਰਟੀਆਂ ਨੇ ਇਸ ਲਹਿਰ ਤੋਂ ਦੂਰੀ ਬਣਾਈ ਹੋਈ ਹੈ ਅਤੇ ਭਾਜਪਾ ਨੇ ਵੀ ਸੰਜਮ ਤੋਂ ਕੰਮ ਲਿਆ ਹੈ। ਇਸ ਤੋਂ ਸਪਸ਼ਟ ਹੁੰਦਾ ਹੈ ਕਿ ਮੁੱਖ ਧਾਰਾ ਦੀਆਂ ਰਾਜਸੀ ਧਿਰਾਂ ਨਵੇਂ ਪ੍ਰਦਰਸ਼ਨਕਾਰੀਆਂ ਲਈ ਮੈਦਾਨ ਖਾਲੀ ਛੱਡਣ ਦੇ ਰੌਂਅ ਵਿੱਚ ਨਹੀਂ ਹਨ। ਵਿਸ਼ਲੇਸ਼ਕਾਂ ਮੁਤਾਬਕ, ਭਾਰਤ ਦੇ ਰਾਜਨੀਤਿਕ ਹਾਲਾਤ ਨੂੰ ਬੰਗਲਾਦੇਸ਼ ਜਾਂ ਨੇਪਾਲ ਦੇ ਚਸ਼ਮੇ ਤੋਂ ਦੇਖਣਾ ਗ਼ੈਰ-ਵਿਹਾਰਕ ਅਤੇ ਬਚਕਾਨਾ ਹੋਵੇਗਾ।